ຜູ້ຂຽນ: Phong DAVONG

ເນື້ອຮ້ອງ & ທຳນອງ : ສ. ແສງສິຣິວັນ (≲1975)
ນັກຮ້ອງຕົ້ນສະບັບ : ຄຳເຕີມ ຊານຸບານ

1) ແສນ… ງາມເຫຼືອ ເມື່ອໄດ້ມາເຫັນ
ຫາດຊາຍຍາມເຢັນ ຕາມລຳແມ່ຂອງ
ງາມ… ນໍ້າຟອງ ນໍ້າຂອງສອງຝັ່ງ
ຍາມເມື່ອສອງເຮົານັ່ງ ຢູ່ຮິມຝັ່ງຫາດຊາຍ

2) ແສງ… ຕາວັນ ຈະລັບລາໄປ
ຫຼຽວມາແຕ່ໄກ ງາມຫາດດອນຈັນ
ດັ່ງ… ສວັນ ໄດ້ມາສ້າງໄວ້
ໜຸ່ມບ່າວສາວຕິດໃຈ ຊວນກັນໄປເຫຼັ້ນທຸກເວລາ

• ງາມ… ເຮືອນ້ອຍ ເຮືອໄວ
ຊຶ່ງແລ່ນໄລ່ໄຕ່ຕາມ ໜ້ານໍ້າງາມຕາ
ເຮືອນ້ອຍແລ່ນໄປ ເຮືອໄວແລ່ນມາ
ສນຸກໃຈຈິງໜາ ພາໃຫ້ຊື່ນຊີວີ

3) ແມ່… ນໍ້າຂອງ ແລະຫາດດອນຈັນ
ເກີດມາຄູ່ກັນ ໝາຍໝັ້ນຊີວີ
ສວຍ… ງາມດີ ດ້ວຍທັມມະຊາດ
ສີສົດໃສສວາດ ທັມມະຊາດສ້າງໄວ້ໃຫ້ຊົມ…

ເນື້ອຮ້ອງ & ທຳນອງ : ພົມມະ ພິມມະສອນ (1970)
ນັກຮ້ອງຕົ້ນສະບັບ : ພົມມະ ພິມມະສອນ (ສະບັບປີ 1983)

1) ຈົ່ງລືມເສັຽທີ ວ່າມີອ້າຍຢູ່
ໂປຣດເຖີດຍອດຊູ້ ໂປຣດຈົ່ງຈຳໃຈ
ຈົ່ງຕັດຄວາມຮັກໃຫ້ຫ່າງ ຂີດຊື່ຂອງອ້າຍຈາກໃຈ
ຢ່າຫ່ວງອາລັຍ ຫ່ວງໃຍສັມພັນ

2) ເມື່ອເຮົາສອງຄົນ ຝັນຄົນລະຢ່າງ
ກໍສຸດໃຈຫວັງ ຕ້ອງຫ່າງໄກກັນ
ຢູ່ໄປຄົງຊໍ້າຣະທົມ ຂື່ນຂົມຈົນຊົ່ວຊີວັນ
ຈະທໍຣະມານ ຫົວໃຈໄຮ້ຄ່າ

• ແຕ່ຈົ່ງຟັງສຽງ ຂອງອ້າຍນີ້ກ່ອນ
ກ່ອນຈະຈາກຈອນ ພາກໄກຫາຍໜ້າ
ໂປຣດຈົ່ງມອງອ້າຍ ດ້ວຍແວວເມດຕາ
ເຖິງຈະຈາກລາ ກໍຈົ່ງດ້ວຍດີ

3) ຫາກມີເມື່ອໃດ ຫົວໃຈກົງກັນ
ຫາກເທບສວັນ ທ່ານໂປຣດປຣານີ
ຈຶ່ງຄ່ອຍມາຮັກກັນໃໝ່ ຮ່ວມໃຈຮ່ວມກັນຝັນດີ
ຊົ່ວນາຕາປີ ຊີບນີ້ມະລາຍ…

ເນື້ອຮ້ອງ & ທຳນອງ : ມ. ເມືອງໃຕ້ (1968)
ນັກຮ້ອງຕົ້ນສະບັບ : ມ. ເມືອງໃຕ້

1) ພໍເຊືອບແລ ຟາດສາຍຕາໄປຍັງສາມລໍ້
ໂອ້ໂຫລະອໍ ສາວນັ່ງຊູຄໍມາຢ່າງເສີດສາຍ
ບໍ່ຮູ້ພາສາ ເພາະຍັງບໍ່ໄດ້ທັກທາຍ
ຈັກແມ່ນຝຣັ່ງຫຼືໄທ ຫຼືລາວກໍບໍ່ຊ່າງຊິວ່າ

2) ເມື່ອເຫຼືອບແລ ຟາດສາຍຕາຕໍ່າລົງເລັກນ້ອຍ
ໂທ້ເອີຍໃຈຂ້ອຍ ເປັນຫຍັງມັນເຕັ້ນເກືອບຫຼຸດອອກມາ
ນັ່ງທ່າສະບາຍ ເຫຼືອເກີນບໍ່ຫ່ວງແຄ່ງຂາ
ຂາຂາວໆຈັ່ງແມ່ນຕາ ນີ້ປານຫົງກາເບິ່ງຂານ້ອງນາງ

• ພວກສັຕຣີ ສມັຍນີ້ກຳລັງເລີງຫຼິ້ນ
ທັງຫຼາຍນຸ່ງສິ້ນ ແຕ່ບາງຄົນປີ້ນປ່ຽນແນວທາງ
ບໍ່ວ່າຂຶ້ນສາວ ຫຼືວ່າແກ່ເກືອບຈະໄດ້ຝັງ
ບໍ່ຮໍ່າເພິງອີ່ຫຍັງ ບໍ່ປິດບໍ່ບັງກັນເລີຍແມ່ນາງ…

(ເວົ້າ) ໂອ້ຍ! ມັນກະໂພດອີ່ຫຼີ ອັນຍາໝ່ອມເອີຍ
ອັນນັ່ງສາມລໍ້ຫັ້ນໜາ ເປັນອີ່ສັງບໍ່ລະວັງແຄ່ງລະວັງຂາ
ມັນເຫັນຈັ່ງຊີ້ມັນໂລດລະລາຍໃຈ ອຸກແທ້ໃດອັນຍາໝ່ອມເອີຍ…

ເນື້ອຮ້ອງ & ທຳນອງ : ຄຳຕຸ່ນ ວົງສນິດ (~1970)
ນັກຮ້ອງຕົ້ນສະບັບ : ຄຳຕຸ່ນ ວົງສນິດ

1) ຜິດຫວັງແລ້ວ ມານັ່ງຮ້ອງໄຫ້
ແມ່ນຜູ່ໃດ ບອກເຈົ້າຫຼາຍໃຈ
ຜິດຫວັງໄປ ມັນຄັກໃຈເຈົ້າບໍ່ນາງ…
(ສອຍ)
2) ຜິດຫວັງແລ້ວ ມານັ່ງຄວນຄາງ
ບອກໃຫ້ນາງ ຢ່າຈັບປາຫຼາຍທາງ
ຜິດພາດພັ້ງ ແລ້ວມານັ່ງໜ້າງໍ…
(ສອຍ)
3) ບອກແລ້ວ ຕັ້ງຫຼາຍໆຄັ້ງ
ບອກໃຫ້ນາງ ຮັກດຽວກະພໍ
ຮັກກັບອ້າຍ ປານນີ້ຄົງໄດ້ຮ່ວມຫໍ
ເຈົ້າກະຍັງບໍ່ພໍ ດັນຮັກອື່ນໝື່ນແສນ…
(ສອຍ)
4) ຮັກອ້າຍນັ້ນ ມັນດີສຸດແສນ
ບໍ່ມີແຄນ ຮັບຮອງບໍ່ແຄ້ນ
ເສືອກມີແຟນ ມັນຄັກໃຈເຈົ້າລະບໍ່…
(ສອຍ)

(ເວົ້າ) ເຮິໆ! ເປັນຈັ່ງໃດລະຍານ້ອງ
ຢາກຫຼາຍໃຈລະອາກລາກບໍ່ລະ ເຮິໆ!

ເນື້ອຮ້ອງ & ທຳນອງ : ຄຳຕຸ່ນ ວົງສນິດ (~1970)
ນັກຮ້ອງຕົ້ນສະບັບ : ຄຳຕຸ່ນ ວົງສນິດ

(ສອຍ) ຕິບ່ອນໃດເຈົ້າຕິອ້າຍບ່ອນໃດ ຊັ້ນຕິບ່ອນໃດເຈົ້າຕິອ້າຍບ່ອນໃດ

1) ຕິອ້າຍຈ່ອຍ ຊັ້ນບໍລະຄົນດີ
ຕິອ້າຍບໍ່ພີ ແຄ່ງຂາບໍ່ໃຫຍ່
ຕິຜູ່ນ້ອຍ ຮວ້າຍ! ປາຊິວກະຍັງໄຂ່
ຊັ້ນຕິບ່ອນໃດ ເຈົ້າຕິອ້າຍບ່ອນໃດ…

2) ຫຼືວ່າ ເຈົ້າຕັ້ງກຽດຊັງ
ຄິດຢາກຫາທາງ ໄປມີຮັກໃໝ່
ຈຶ່ງຫາເຣື່ອງນີ້ ເຣື່ອງນັ້ນມາໃສ່
ຊັ້ນຍອດດວງໃຈ ເຈົ້າຕິອ້າຍບ່ອນໃດ…
(ສອຍ)
3) ຕິອ້າຍຈົນ ຊັ້ນບໍລະຄົນດີ
ຕິອ້າຍບໍ່ມີ ຖານະຍິ່ງໃຫຍ່
ຕິຂີ້ຮ້າຍ ຮວ້າຍ! ໃຜວ່າຫຼໍ່ໃດ
ຊັ້ນຕິບ່ອນໃດ ເຈົ້າຕິອ້າຍບ່ອນໃດ…

4) ຫຼືວ່າ ເຈົ້າໄດ້ໃໝ່ດີ
ທີ່ສົມກຽດສັກສີ ເຈົ້າແລ້ວແກ້ວໃຈ
ນ້ອງຈຶ່ງບໍ່ເວົ້າ ບໍ່ລົມອ້າຍໄດ້
ຊັ້ນຍອດດວງໃຈ ເຈົ້າຕິອ້າຍບ່ອນໃດ…
(ສອຍ)

(ເວົ້າ) ເຮິໆ! ຕິບ່ອນໃດນໍນ້ອງນໍ້
ຕິວ່າຫົວອ້າຍຫຍອງຊັ້ນບໍ ໄກ່ຍອງແມ່ນ້ອງກະຍັງລ້ຽງ
ຫຼືວ່າຕິວ່າຫົວອ້າຍລ້ານ ລານນ້ອງກະຍັງແປນ
ຕິວ່າອ້າຍຂີ້ຈ່ອຍຊັ້ນບໍ ເຮິໆ!
ອ້າຍຕັ້ງຄົນກະດູກຫຼາຍຊື່ໆດອກເວີ້ຍ ເຮິໆ!

ເນື້ອຮ້ອງ & ທຳນອງ : ມະນັດ ລຳລາມັຍ (∼1970)
ນັກຮ້ອງຕົ້ນສະບັບ : ສົມບູນ ລຳລາມັຍ

1) ສາຍນໍ້າຈະໄຫຼນອງ ຮັກເຂົາແລ້ວຈຶ່ງຕ້ອງ
ເສົ້າໝົ່ນໝອງ ນອງນໍ້າຕາ
ໃຈເອີຍໃຈ ໃຜລືມສັນຍາ
ບໍ່ຄືນມາ ອຸຣານ້ອງໝອງໃຈ

2) ສາຍນໍ້າບໍ່ໄຫຼຄືນ ໃຈນ້ອງແສນສະອື້ນ
ສຸດໃຈຝືນ ຕຣົມຣຶທັຍ
ໃຈຂອງເຮົາ ໃຜມາຢືມໄປ
ຍາມຫຼັບໃຫຼ ຫົວໃຈປະວິງທຸກວັນ

• ສາຍນໍ້າ ສາຍໃຈ
ມິໄດ້ຫຼັ່ງໄຫຼ ເຊັ່ນກາຍໄປນັ້ນ
ບໍ່ຍອມຄືນເຫຫັນ ເຂົາສິ້ນສັມພັນ
ແລ້ວມາຈາກໄປ ດັ່ງຝັນສລາຍ

3) ສາຍນໍ້າຈະຫຼັ່ງໄຫຼ ຈະໄກຫຼືຈະໃກ້
ສຸດຈະໝາຍ ແຄ່ຢັ່ງເຖິງໃຈ
ນ້ອງຂໍວອນ ເຖິງອົງເທບທ່ານ
ຫາກສິ້ນກັນ ຂໍຕາຍຢູ່ໜ້າສຸສານ…

ເນື້ອຮ້ອງ & ທຳນອງ : ມະນັດ ລຳລາມັຍ (∼1970)
ນັກຮ້ອງຕົ້ນສະບັບ : ຄຳສອນ ພົມມະຈັນ

1) ສາຍນໍ້າຈະໄຫຼນອງ ຄິດເຖິງນວນອະນົງ
ທີ່ສອງເຮົາ ເຄີຍຮ່ວມຮັກກັນ
ສາຍໃຈເອີຍ ເຈົ້າລືມຄຳໝັ້ນ
ປ່ຽນແປຜັນ ຮັກເຮົາເລີຍໝົ່ນໝອງໃຈ

2) ສາຍນໍ້າບໍ່ໄຫຼຄືນ ໃຈອ້າຍແສນສະອື້ນ
ສຸດໃຈຝືນ ຕື້ນຣຶທັຍ
ໃຈເອີຍໃຈ ເຈົ້າມາລືມງ່າຍ
ອ້າຍອາລັຍ ເຈົ້າໄກຫ່າງກັນລືມ

• ສາຍນໍ້າ ສາຍໃຈ
ເຈົ້າມີແຕ່ໄຫຼ ແຝງກາຍຫຼິ້ນ
ສິ້ນຄວາມຮັກທີ່ມີ ສາຍໃຈຄົນດີ
ສິ້ນຄວາມປຣານີ ທີ່ເຄີຍສຸກສັນ

3) ສາຍນໍ້າຈະຫຼັ່ງໄຫຼ ຈະໄກຫຼືຈະໃກ້
ສຸດຈະໝາຍ ແຄ່ຍາມຊຶ້ງກັນ
ຂ້າຂໍວອນ ເທບໄທ້ທຸກທ່ານ
ໃຫ້ເຮົານັ້ນ ຮັກກັນຊົ່ວຟ້າເອີຍ…

ເນື້ອຮ້ອງ & ທຳນອງ : ຄຳຄົມ ເມືອງນະຄອນ & ສ. ບົວລະພັນ (~1970)
ນັກຮ້ອງຕົ້ນສະບັບ : ກ. ແກ້ວກໍ່າພ້າ

1) ຄົນງາມໆ ເປັນຫຍັງໃຈດຳໃຈແຫຼ້
ງາມຄັກງາມແທ້ ໃຈເຈົ້າແຫຼ້ປານກາ
ຮູບຮ່າງໜ້າຮັກ ປາກກໍຄັກປານເພັຊຣາ
ບໍ່ໜ້າບໍ່ໜ້າ ບໍ່ໜ້າເປັນຄົນໃຈດຳ

2) ຄົນຈົບດີ ເປັນຫຍັງມັກມີຫຼາຍໃຈ
ຫຼອກໄດ້ຫຼອກໄປ ອ້າຍຂໍຈື່ຂໍຈຳ
ທ່ຽວເອົາຄວາມງາມ ຫຼອກຜູ່ຊາຍໃຫ້ເຈັບໃຫ້ຊໍ້າ
ຈະຈື່ຈະຈຳ ຄົນງາມເຊື່ອໃຈບໍ່ໄດ້

• ໄປນຳຄົນອື່ນ ອ້າຍແສບຫົວໃຈຈິຕາຍ
ຕຳຕາຕຳໃຈ ສາບານອ້າຍວ່າຈັ່ງໃດ
ເມື່ອຍາມຮັກກັນ ບອກວ່າອ້າຍນີ້ດີກວ່າໃຜ
ໄດ້ພໍ້ຄົນໃໝ່ ຮັ່ງມີກໍລືມອ້າຍໄປ

3) ຄົນງາມໆ ເປັນຫຍັງໃຈດຳໃຈແຫຼ້
ໃຈອ້າຍເຈັບແທ້ ຍ້ອນເຊື່ອອົກເຊື່ອໃຈ
ອ້າຍເປັນຄົນຈົນ ໄປໃຫ້ພົ້ນໄປມີແຟນໃໝ່
ຫຼີກທາງໃຫ້ໄກ ຕາມໃຈຄົນງາມໃຈແຫຼ້…

ເນື້ອຮ້ອງ & ທຳນອງ : ສຸວັນ ສຸວັນນະຣາຊ (∼1965)
ນັກຮ້ອງຕົ້ນສະບັບ : ຊຳນານ ຈົ່ງຮັກ

1) ເມືອງນຶ່ງນັ້ນ ເປັນເມືອງທີ່ລືກະເດື່ອງ
ມີນາມສາມໝື່ນເມືອງເຟືອງ ລືຈົນເຟື້ອງທົ່ວແດນອານາ
ເຖິງແມ່ນເປັນເມືອງ ຢູ່ຕາມຫວ່າງພູຮ່ອມຜາ
ເຈົ້າຍັງສົດສວຍງາມຕາ ດັ່ງເທວາສວັນສັນສ້າງ

2) ສາມໝື່ນນີ້ ເປັນແດນຝູງຊົນຝັນໃຝ່
ທິວທັດກໍງາມຈັບໃຈ ວິໄລໄປທົ່ວທຸກທິດທາງ
ຫາກໃຜໄດ້ເຫັນ ບໍ່ເວັ້ນຫົວໃຈເວັ້ນວາງ
ອຸດົມສົມບູນທຸກຢ່າງ ຫາກເຢືອນຢັ້ງເຖິງແດນແຫ່ງນີ້

• ສາມໝື່ນເມືອງເຟືອງ ເຖິງບໍ່ເຮືອງເໝືອນເມືອງອື່ນໆ
ແຕ່ກໍອຸດົມຊົມຊື່ນ ດ້ວຍຊັບສິນໃນດິນມາກມີ
ຝູງຊົນປະຊາ ວາຈາກໍຫວານເຫຼືອດີ
ຖືກັນເປັນມິດໄມຕຣີ ເມື່ອມີເມືອງອື່ນຢ້ຽມຢາມ

3) ສາມໝື່ນນີ້ ເປັນເມືອງນັບວ່າເປັນນຶ່ງ
ພູຜາສູງຊັນຊາບຊຶ້ງ ສວຍສງ່າຣາວັນງົດງາມ
ຜາຕຶ້ງຜາເລືອງ ເປັ່ງແສງເມື່ອຍາມຄ້ອຍຄໍ່າ
ຜາທໍ່ໜໍ່ຄຳແສນງາມ ເປັນມິ່ງຂວັນປຣະດັບຂອງເມືອງ…

ເນື້ອຮ້ອງ & ທຳນອງ : ຄຳໃບ ຄຳຊະນະ (∼1970)
ນັກຮ້ອງຕົ້ນສະບັບ : ພົງສວັນ

1) ຢ່າອວດຢ່າອົ່ງ ໄປເລີຍນ້ອງສາວ
ນ້ອງຢ່າຄິດຟ້າວ ຊອກຫາເອົາບ່າວຄຽງຄູ່ເດີນໂຊ
ອ້າຍບໍ່ໃສ່ໃຈ ເຖິງນ້ອງຈະໄດ້ຄູ່ຄອງອັກໂຂ
ນ້ອງສາວເຈົ້າຢ່າຄຸຍໂມ້ ອວດໂຕວ່າເດັ່ນວ່າດີ

2) ຢ່າອວດຢ່າອົ່ງ ໄປເລີຍອະນົງ
ຮູບງາມບໍ່ສົ່ງ ໃຫ້ນ້ອງເປັນຫົງຕລອດຊີວີ
ໜ້ອຍນຶ່ງກໍແກ່ ຂາດຊາຍຫຼຽວແລຢ່າມາອວດດີ
ເນື້ອໜັງຫ່ຽວແຫ້ງທຸກທີ ບໍ່ມີໃຜຈະຫົວຊາ

• ຕາຍໃຫ້ຕາຍ ກໍຕາຍແລ້ວເອີຍ
ອ້າຍນີ້ບໍ່ເຄີຍ ບໍ່ເຄີຍຄິດຝັນແກ້ວຕາ
ຜູ່ຍິງທັງເມືອງ ບໍ່ອຶດບໍ່ຢາກດອກໜາ
ຂໍນ້ອງເນື້ອທອງເຈົ້າຢ່າ ອວດທ່າເຫັນມີແຟນໃໝ່

3) ຢ່າອວດຢ່າອົ່ງ ໄປເລີຍການດາ
ເຈົ້າງາມໂສພາ ເໝືອນເທວະດາບົນຟ້າເມື່ອໃດ
ເຈົ້າອາດຜິດຫວັງ ຄົງມີອີກຄັ້ງເຈົ້າຈະເສັຽໃຈ
ເມື່ອເຂົາສິ້ນຄວາມອາລັຍ ຊາມວັຍຈະສິ້ນໂສພາ…