ເນື້ອຮ້ອງ & ທຳນອງ : ຄຳຫຼ້າ ໜໍ່ແກ້ວ (1968)
ນັກຮ້ອງຕົ້ນສະບັບ : ຄຳຕຸ່ນ ວົງສະນິດ

1) ຮັກກັນ ເໝືອນຈະກືນກິນໄດ້
ໄປໃສມາໃສ ສຸດອາລັຍແສນຫ່ວງ
ຢ້ານແຕ່ຄົນຮັກ ຄຶດຫຼອກຄຶດລວງ
ທັງຫວງທັງຫ່ວງ ຢ້ານເຂົາຄວງຄົນອື່ນ

2) ຊັງກັນ ຄຶດຢາກບິນໜີໄດ້
ຮັກຫຼາຍຊັງຫຼາຍ ບໍ່ເຫັນໃຈຄາຍຊື່ນ
ຄຳໝັ້ນສັນຍາ ຫຼົບໜ້າສົ່ງຄືນ
ຈາກຫວານເປັນຂື່ນ ຄືນຄວາມຮັກຈາກຈອນ

• ຊັງກັນ ນັ້ນມັນງ່າຍແທ້ໜໍ
ມິໄດ້ຕິດຕໍ່ ຂໍຄວາມເຫັນໃຈກ່ອນ
ຜິດໃຈໜ້ອຍດຽວ ບໍ່ແລບໍ່ຫຼຽວບໍ່ອາທອນ
ຮັກກັນຕ້ອງເຝົ້າອາວອນ ງໍ້ງອນຢູ່ທຸກຄືນວັນ

3) ຮັກກັນ ນອນກະຝັນເຫັນໜ້າ
ຂ້າມຫ້ວຍຂ້າມຜາ ປຣາຖນາຮັກນັ້ນ
ບັດຊັງຂຶ້ນມາ ຢາກຂ້າຢາກຟັນ
ຢາກໜີໜ້າກັນ ບໍ່ຢາກພົບພານອີກເລີຍ…

ເນື້ອຮ້ອງ : ວິລລ້ຽມ ດິດທະວົງສ໌- ທຳນອງເພງຝຣັ່ງ (1973)
ນັກຮ້ອງຕົ້ນສະບັບ : ວິລລ້ຽມ ດິດທະວົງສ໌

ພໍແລ້ວ ເຈັບແລ້ວ ສາບແລ້ວ ຄວາມຮັກ…

1) ຄວາມທຸກຄວາມເສົ້າແຜດເຜົາເມື່ອຮັກສິ້ນຄ່າ
ຄວາມຫຼັງທີ່ມັນຜ່ານມາກໍສູນສິ້ນຄ່າໄປດ້ວຍເຊັ່ນກັນ
ຢ່າຫວັງວ່າເຂົາຈະຄຶດເຖິງຄວາມສັມພັນ
ຄວາມຮັກທີ່ເຄີຍສຸກນັ້ນຄົງບໍ່ມີວັນທີ່ຈະກັບມາ…

• ຖິ້ມເອົາໄວ້ພຽງຄວາມເສົ້າເຫຼືອພຽງເງົາທີ່ໂສກາ
ຢູ່ກໍຢູ່ກັບນໍ້າຕາເໝືອນຟ້າຄອຍລົງໂທດທັນ
ໂອ້ຄວາມຮັກບໍ່ແນ່ນອນຄອຍຫຼອກຫຼອນທຸກຄືນວັນ
ອັນຄວາມເຈັບທີ່ຕື້ນຕັນຄົງບໍ່ມີວັນຈະຫາຍ…

2) ພໍແລ້ວເຈັບແລ້ວສາບແລ້ວຄວາມຮັກຂໍໜ່າຍ
ຄວາມຮັກທີ່ສິ້ນຄວາມໝາຍຖືກເຂົາທຳລາຍນໍ້າຕານອງໜ້າ
ໂຊກດີເຖີດນ້ອງຢ່າໝອງເໝືອນຮັກຂອງຂ້າ
ມີຮັກແລ້ວຢ່າຈາກລາສົດຊື່ນເຖີດໜານາງຟ້າຂ້າເອີຍ…

ຮືໆ ຮືໆ ຮືໆໆ ຮືໆໆ ຮືໆ ຮືໆ ຮືໆໆ ຮືໆໆ…

ເນື້ອຮ້ອງ & ທຳນອງ : ວິລລ້ຽມ ດິດທະວົງສ໌ (1972)
ນັກຮ້ອງຕົ້ນສະບັບ : ວິລລ້ຽມ ດິດທະວົງສ໌

1) ອັນຄວາມຮັກເຮົາ ນັ້ນຄົງມີເວນຫຼືກັມ
ຜູ່ໃຫຍ່ກັບມາທຳ ໃຫ້ສອງເຮົາພາກຈາກກັນ
ສອງເຮົາຕ່າງຮັກ ເທີດຮັກດ້ວຍຄວາມຍຶດໝັ້ນ
ຕ່າງກໍສາບານກັນ ຈະຮັກຊົ່ວຟ້ານິຣັນ

2) ແຕ່ແລ້ວຮັກເຮົາ ນັ້ນມາບໍ່ສົມດັ່ງໝາຍ
ຄວາມຮັກຖືກທຳລາຍ ພາກເຮົາໃຫ້ຫ່າງໄກກັນ
ນ້ອງຖືກບັງຄັບ ຕັດຮັກເຮົາໃຫ້ຂາດກັນ
ນັບຕັ້ງແຕ່ວັນນັ້ນ ສວັນກາຍເປັນນໍ້າຕາ

• ໂອ້… ເມັຽເອີຍ ຄົງເປັນເວນກັມຂອງເຮົາ
ອ້າຍເອງກໍແສນຈະເສົ້າ ເຝົ້າແຕ່ຄິດເຖິງແກ້ວຕາ
ຄຶດເປັນຫ່ວງ ລູກນ້ອຍກໍສຸດຄະນາ
ຕັ້ງແຕ່ລູກເກີດມາ ໜ້າຕາອ້າຍຍັງບໍ່ເຫັນ

3) ເຂົາຕັດຮັກເຮົາ ເຂົາເຜົາບໍ່ເຫຼືອຫຍັງເລີຍ
ນ້ອງເອງກັບທຳເສີຍ ໂທ້ເອີຍ ໂອ້ ເວນໜໍເວນ
ອ້າຍຈະທົນຮັກ ທົນຄອຍດ້ວຍຄວາມຈຳເປັນ
ຊີວິດຄົງບໍ່ເວັ້ນ ຊໍ້າໃຈຕາຍແທ້ເອີຍ…

ເນື້ອຮ້ອງ & ທຳນອງ : …?…
ນັກຮ້ອງຕົ້ນສະບັບ : ນະຣຽມ (~1970)

1) ຄິດດູ ເສັຽກ່ອນຄວາມຮັກ
ຕຶກຕອງໃຫ້ໜັກ ຄ່ອຍລົງມືປັກໝາຍ
ວູບວາມ ຕັດສິນງ່າຍໄປ
ຈະປວດດວງໃຈ ເມື່ອຄວາມຮັກສັ້ນ

2) ທະເລ ເຂົາວ່າເລິກລົ້ນ
ແຕ່ໃຈຂອງຄົນ ນັ້ນເລິກເກີນອະນັນ
ເບິ່ງໄປ ໃຫ້ຊຶ້ງນານວັນ
ເທບເທິງສວັນ ຈະທານຮັກຈິງ

• ຂໍ ຄິດດູເສັຽກ່ອນ
ແນ່ນອນ ນ້ອງບໍ່ປະວິງ
ຫາກເກີດ ຈາກໃຈແທ້ຈິງ
ທຸກສິ່ງມອບໃຫ້ ດັ່ງໝາຍ

3) ຄິດດູ ເສັຽກ່ອນທີ່ຮັກ
ນ້ອງປຽບເໝືອນຜັກ ທີ່ຊົງຄວາມອ່ອນໄຫວ
ຖືກລົມ ຈະຊໍ້າງ່າຍດາຍ
ໂປຣດຢ່າທຳລາຍ ຜູ່ຍິງໃຫ້ຕຣົມ…

ເນື້ອຮ້ອງ & ທຳນອງ : …?…
ນັກຮ້ອງຕົ້ນສະບັບ : ແສງອາຣຸນ ສິດທິພັນ (~1970)

1) ຖ້າຫາກນ້ອງມີ ຊາຍອື່ນທີ່ດີກວ່າອ້າຍ
ຄວາມຫວັງໃດໆ ທີ່ອ້າຍໃຫ້ຕົວນ້ອງມາ
ບວກຄວາມຮັກແທ້ ທີ່ອ້າຍມອບໃຫ້ແກ້ວຕາ
ເທີດທູນເໜືອດວງຊີວາ ບໍ່ເຄີຍຄິດຈະທຳລາຍ

2) ຖ້າຫາກນ້ອງມີ ຊາຍອື່ນທີ່ດີກວ່ານີ້
ອ້າຍຂໍຍອມພລີ ພາກໜີໃຫ້ນ້ອງເດີນໄປ
ບໍ່ຂໍອ້ອນວອນ ໃຫ້ນ້ອງເມດຕາເຫັນໃຈ
ພ້ອມທັງຄວາມຫວັງໃດໆ ຍິນດີໃຫ້ນ້ອງປະຫານ

• ເພາະສອງເຮົາ ຕ່າງເຝົ້າແຕ່ເຂົ້າໃຈຜິດ
ເຝົ້າແຕ່ຈະຄິດ ຖືຜິດຢູ່ທຸກຄືນວັນ
ຄວາມສຸກຄວາມຊື່ນ ກັບເປັນຂົມຂື່ນດວງມານ
ເມື່ອບໍ່ຮັກຈົ່ງປະຫານ ອ້າຍນັ້ນຍອມເສັຽນໍ້າຕາ

3) ຖ້າຫາກນ້ອງມີ ຊາຍອື່ນທີ່ດີກວ່າອ້າຍ
ມີທັງນໍ້າໃຈ ຍົດສັກມີຮັກບູຊາ
ຂໍນ້ອງຈົ່ງຮັກ ໃຫ້ສົມດັ່ງປຣາຖນາ
ອ້າຍຈົນຂໍທົນໜີໜ້າ ຕາມທາງຂອງຜູ່ມີກັມ…

ເນື້ອຮ້ອງ & ທຳນອງ : ພົມມະ ພິມມະສອນ (~1965)
ນັກຮ້ອງຕົ້ນສະບັບ : ພົມມະ ພິມມະສອນ

1) ດວງໃຈ ນ້ອງຢູ່ໃສ ອ້າຍຄິດເຖິງນ້ອງ
ດວງໃຈ ອ້າຍໝົ່ນໝອງ ບໍ່ເຫັນໜ້າ
ດວງໃຈ ນັບຈາກກັນ ວັນນັ້ນມາ
ຢູ່ຢ່າງໃດໜາ ທີ່ຮັກ ອ້າຍເປັນຫ່ວງໃຍ

2) ດວງໃຈ ນ້ອງຢູ່ໃສ ອ້າຍເປັນທຸກໜັກ
ດວງໃຈ ເຈົ້າແຫ່ງຮັກ ຮູ້ບໍ່ແກ້ວໃຈ
ດວງໃຈ ພຽງຂາດນາງ ມາຊິດໃກ້
ເປົ່າປ່ຽວດຽວດາຍ ເຫວວ້າ ທຸກຣາຕຣີການ

• ສຸດທີ່ຮັກ ສຸດທີ່ຮັກ ເຈົ້າຢູ່ໃສ
ສຸດຫົວໃຈ ສຸດຫົວໃຈ ຄູ່ເຄີຍຮັກໝັ້ນ
ສຸດຄິດເຖິງ ເຈົ້າເຫຼືອໃຈ ຈະຂາດສະບັ້ນ
ສິ້ນສົງສານ ອ້າຍແລ້ວ ຫຼືດວງແກ້ວຕາ

3) ດວງໃຈ ນ້ອງຢູ່ໃສ ອ້າຍຄັ່ງອ້າຍປ່ວງ
ດວງໃຈ ອ້າຍຫ່ວງຫວງ ນ້ອງຈຽນບ້າ
ດວງໃຈ ຢູ່ແຫ່ງໃດ ຈົ່ງຈຳໄວ້ວ່າ
ເທົ່າສິ້ນດິນຟ້າ ທີ່ຮັກ ອ້າຍຍັງຮັກນາງ… 

ເນື້ອຮ້ອງ & ທຳນອງ : ສ. ແສງສິຣິວັນ (~1970)
ນັກຮ້ອງຕົ້ນສະບັບ : ພອນເທພ ເທພພິທັກສ໌

1) ຂໍຍອມຮັບວ່າ ອ້າຍອົດໃຈ ໄວ້ອີກບໍ່ໄຫວ
ທັ້ງທີ່ນ້ອງລອງໃຈ ແກ້ງໄປ ຄວງຄົນອື່ນມາ
ໄປເວົ້າຄົນນັ້ນ ກະຊິບຄົນນີ້ ມັນກວນສາຍຕາ
ອ້າຍຢາກຈະຂ້າ ຢາກຂ້າຢາກຂ້າ ຜູ່ມາຂວາງທາງ

2) ເຫັນຄູ່ຮັກອື່ນ ຊື່ນຊູໃຈ ຍິ່ງພາໃຫ້ເຫງົາ
ທີຄວາມຮັກຂອງເຮົາ ຕື້ນຕັນ ຄອຍວັນຈືດຈາງ
ຮູ້ໄວ້ຮູ້ໄວ້ ນ້ອງເຮັດແບບນັ້ນ ໃຈອ້າຍແຄ້ນຄາ
ມັນອາດຈະພາດ ມັນອາດຈະພັ້ງ ເມື່ອນາງຫຼົມໃຈ

• ທັ້ງໆ ທີ່ຮູ້ ວ່າລອງໃຈກັນ
ແຕ່ເຮັດຈັ່ງຊັ້ນ ອ້າຍທົນ ນ້ອຍໃຈບໍ່ໄດ້
ຂືນປ່ອຍ ໃຫ້ຄອງ ອີກຕໍ່ໄປ
ອ້າຍຄົງ ຊໍ້າຕາຍ ດ້ວຍຄວາມຫວງ

3) ນ້ອງກໍຮູ້ວ່າ ອ້າຍຮັກນາງ ຮັກຍິ່ງສິ່ງໃດ
ຮັກນາງເໜືອດວງໃຈ ບໍ່ເຄີຍ ຄິດວ່າຈະລວງ
ເຫດນີ້ຈຶ່ງຫ່ວງ ດ້ວຍຮັກຈຶ່ງຫວງ ຈຶ່ງຫວງຈຶ່ງຫ່ວງ
ບໍ່ໃຫ້ໃຜລ່ວງ ບໍ່ໃຫ້ໃຜລວງ ກີດຂວາງດວງໃຈ…

ເນື້ອຮ້ອງ & ທຳນອງ : ຄຳຫຼ້າ ໜໍ່ແກ້ວ (1965)
ນັກຮ້ອງຕົ້ນສະບັບ : ບຸນທ່ຽງ ມະນີວົງສ໌

1) ກ່ອນນັ້ນເຮົາສອງ ຮັກກັນຝັງຈິດ
ບໍ່ເຄີຍຄິດ ວ່າຮັກຈະຫ່າງກັນໄກ
ແຕ່ນ້ອງມາ ໜີໜ້າຈາກໄປ
ປ່ອຍອ້າຍໄວ້ ໃຫ້ຢູ່ກັບຄວາມຊໍ້າໃຈ

2) ບັດນີ້ເຮົາສອງ ແຍກທາງກັນຢູ່
ຢາກຈະຮູ້ ວ່ານາງຮັກຢູ່ກັບໃຜ
ຊາຍນັ້ນມີ ຮັກຈິງຫຼືໃດ
ສຸກສົມໃຈ ຫຼືນາງນໍ້າຕາຫຼັ່ງນອງ

• ຂ້າຍອມຮັບຄວາມ ເຈັບຊໍ້າ
ທຸກສິ່ງທີ່ທຳໃຫ້ໄວ້ ຂ້ານີ້ອະພັຍໃຫ້ນ້ອງ
ຍັງຮັກຍັງຫ່ວງ ບໍ່ລວງຮັບຮອງ
ນຶ່ງບໍ່ມີສອງ ບໍ່ຈືດຈາງ

3) ຫາກນາງຖືກລວງ ຣະທົມຂົມຂື່ນ
ຫາກສະອຶ້ນ ຍ້ອນຮັກເຂົາປ່ຽນເປັນຊັງ
ຈົ່ງຫວນຄືນ ຮັກຄົນທີ່ຫວັງ
ຢູ່ທາງຫຼັງ ອ້າຍຍັງຮັກນາງດັ່ງເຄີຍ…

ເນື້ອຮ້ອງ & ທຳນອງ : ສົມລິຕ ພັນນະວົງສ໌ (~1970)
ນັກຮ້ອງຕົ້ນສະບັບ : ສົມລິຕ ພັນນະວົງສ໌

1) ຄົນໃຈດຳ ແກ້ງທຳໃຫ້ຫຼົງ
ແລ້ວກໍບໍ່ຊື່ຕຣົງ ໝັ້ນຄົງເໝືອນດັ່ງຄຳໝັ້ນ
ສວາດທີ່ຫວັງ ຈະຮ້າງໄປຫົວໃຈໄຫວຫວັ່ນ
ອ້າຍຕ້ອງຈາບັນ ໂສກສັນກໍ້າກືນນໍ້າຕາ

2) ມີຄົນຄອຍ ແກ້ງຢູ່ຂ້າງຫຼັງ
ຫຼືນ້ອງຈຶ່ງຄິດຊັງ ອ້າຍດັ່ງເໝືອນຄົນໄຮ້ຄ່າ
ຈະເຮັດຈັ່ງໃດ ງອນງໍ້ໄປແລ້ວຍັງໜີໜ້າ
ບໍ່ຫວນຄືນມາ ຍິ່ງພາໃຈອ້າຍຣະທົມ

• ນ້ອງໄປ ເຊື່ອຄົນຍຸຄົນແຍ່
ສອງເຮົາມີແຕ່ ອົກຕ້ອງຣ້າວຣະບົມ
ມີຢູ່ໃສລະ ແຟນຄົນໃໝ່ທີ່ໝາຍມາຊົມ
ນ້ອງຄົນດຽວ ອ້າຍຍັງຊໍ້າຕຣົມ
ຫຼາຍຄົນ ຄົງອົກແຕກຕາຍ

3) ຈົ່ງຄືນມາ ຜູກຮັກອີກຫົນ
ຮັກໃຫ້ຊື່ນກະມົນ ສອງຄົນບໍ່ມີວັນໜ່າຍ
ຈະຊ່ວຍຖນອມ ຄວາມຮັກເຮົາດ້ວຍກັນສອງຝ່າຍ
ຮັກຫຼືຈະຄາຍ ຫາກໃຈເຮົາຊື່ຕໍ່ກັນ…

ເນື້ອຮ້ອງ & ທຳນອງ : ສ. ແສງສິຣິວັນ (~1970)
ນັກຮ້ອງຕົ້ນສະບັບ : ຄຳເຕີມ ຊານຸບານ

1) ເມືອງຫຼວງພຣະບາງ ຊ່າງງາມວິໄລແທ້ເອີຍ
ຂ້ານີ້ກໍເຄີຍ ໄດ້ໄປທ່ຽວຊົມຄັ້ງນຶ່ງ
ພູສີສູງສຸດທຽມຟ້າ ເຫັນແລ້ວຍິ່ງພາຕົກຕະລຶງ
ໂອ້ດາວະດຶງ ຫຼືແດນສວັນກັນແທ້

2) ໜຸ່ມສາວກໍງາມ ອາຣ່າມດັ່ງດວງມາລີ
ບານຈໍ່ຈຸມຈີ ຂ້ານີ້ຕ້ອງຫຼົງຫຼຽວແລ
ຢາກຮັກຢາກຢູ່ຄຽງສອງ ຈະຂໍປະຄອງບໍ່ປຽນແປ
ຈະຮັກນ້ອງແທ້ ດ້ວຍໃຈຊື່ຕຣົງຕລອດການ

• ນວນນ້ອງນາງ ງາມຍິ່ງ
ຂ້າຢາກຮັກເຈົ້າຈິງ ແອບອິງຮ່ວມຫໍສຳຣານ
ນໍ້າຂອງ ຍັງໄຫຼຮ່ວມແມ່ຄານ
ຂໍນ້ອງຈົ່ງສົງສານ ຜູກພັນຄວາມຮັກຂ້າໄວ້ ຮື…

3) ຈາກຫຼວງພຣະບາງ ຈາກນາງທີ່ແສນໂສພາ
ຈາກພຽງກາຍາ ຈິດຍັງຝັນຫາຂວັນໃຈ
ນ້ອງສາວເຈົ້າຈົ່ງເອັນດູ ຈະຂໍເປັນຄູ່ຢູ່ຄຽງໃກ້
ເຖິງຈາກນ້ອງໄປ ບໍ່ນານເທົ່າໃດຈະກັບມາ…