ເນື້ອຮ້ອງ & ທຳນອງ : ບິນ ສຸດາຈັນທ໌ (1971-72)
ນັກຮ້ອງຕົ້ນສະບັບ : ພອນສວາດ ພານທອງສິງ

1) ສີ່ຫ້ອງຫົວໃຈ ຍັງລໍຊາຍຢູ່
ຍັງຄອຍຍອດຊູ້ ຢູ່ມາຕັ້ງນານຫຼາຍປີ
ຍັງບໍ່ມີຊາຍ ໝາຍຮ່ວມຊີວິ
ຕ້ອງທົນນອນໜາວຣຶດີ ບໍ່ມີຊາຍໃດຕ້ອງການ

2) ສີ່ຫ້ອງຫົວໃຈ ນ້ອງຍັງຫວ່າງເປົ່າ
ຍັງບໍ່ມີບ່າວ ເຂົ້າມາຮ່ວມຫໍສັມພັນ
ຄອງຄວາມເປັນໂສດ ມານານແສນນານ
ຍັງບໍ່ມີຊາຍສົງສານ ປະທານຄວາມຮັກໃຫ້ມາ

• ຫົວໃຈ ຊ່າງທໍຣະມານ
ໂທ້ເອີຍສວັນ ຈົ່ງທານຮັກມາເຖີດໜາ
ຂໍໃຫ້ຊາຍນັ້ນ ຮັກຈິງດັ່ງວ່າ
ແຕ່ສ່ວນຕົວຂ້າ ຂໍບູຊາຮັກດ້ວຍຫົວໃຈ

3) ສີ່ຫ້ອງຫົວໃຈ ນ້ອງຍັງຄອຍຄູ່
ໂປຣດເຖີດຍອດຊູ້ ເອັນດູຍິງທີ່ຂາດຊາຍ
ຈະເປັນຊາຍແກ່ ຫຼືບ່າວກໍໄດ້
ຂໍພຽງອ້າຍຮັກຈິງໃຈ ນ້ອງກໍຮັກໄດ້ສເມີ…

ເນື້ອຮ້ອງ & ທຳນອງ : ປ. ຕຣີຈັນ (1958)
ນັກຮ້ອງຕົ້ນສະບັບ : ປ. ຕຣີຈັນ

1) ພຣະພົມລິຂິດ ຊີວິດຂ້າໜໍ
ທຸກຍາກຍັງບໍ່ພໍ ແຖມມີເວນກັມຊໍ້າເຕີມເຈັບຊໍ້າ
ເມັຽຮັກເມັຽແກ້ວ ຈາກໄປແລ້ວແສນຣະກຳ
ປ່ອຍລູກຕາດຳໆ ໃຫ້ພໍ່ຮັບກັມລ້ຽງລູກດຽວດາຍ

2) ສຽງລູກອອດອ້ອນ ວອນແອ່ວກິນນົມ
ແສນຣະທົມໃຈໜັກໜາ ພໍ່ເຝົ້າອົດສາຫານົມດັ່ງໝາຍ
ບ້ານດົງແດນປ່າ ພໍ່ຊອກຊອນຫານົມໃຫ້
ນໍ້າຕາພໍ່ຫຼັ່ງໄຫຼນອງ ເມື່ອໄດ້ມອງລູກນ້ອຍຫິວນົມ

• ສາຍລົມ ຍັງຫວນຄືນມາ
ເມັຽຮັກຂອງຂ້າ ບໍ່ມາຕາມສາຍລົມ
ແສນທໍຣະມານ ວິນຍານເມັຽຂ້າຄົງຕຣົມ
ໂອ້ພຣະພົມ ເຫັນໃຈຕົວຂ້າເຖີດໜາ

3) ນໍ້າຕາລູກນ້ອຍ ຫຼັ່ງລົງທຸກຢົດ
ເໝືອນນໍ້າກົດລາດຫົດຫົວໃຈ ພໍ່ສູ້ທົນໄປດ້ວຍໃຈເມດຕາ
ແມ່ນເຈົ້າບໍ່ມີ ພໍ່ນີ້ຄົງໜີເຂົ້າປ່າ
ຝາກຕົວກັບສາສນາ ເຂົ້າເພິ່ງພາຣົດພຣະທັມ…

ເນື້ອຮ້ອງ & ທຳນອງ : ພ. ເພັດຄັນທະ (~1970)
ນັກຮ້ອງຕົ້ນສະບັບ : ພ. ເພັດຄັນທະ

1) ຄົນເຂົາຊ່າ ວ່ານ້ອງເປັນແມ່ຮ້າງ
ຍິ່ງຟັງຍິ່ງສົງສານນາງ ແມ່ຮ້າງເອີຍຢ່ານ້ອຍໃຈ
ຢ່າຄໍ່າຄວນ ຫຼືໂຫຍຫວນຮ້ອງໄຫ້
ເຖິງຜົວເຈົ້າປະລະໄປ ຢ່າເສັຽໃຈຫາໃໝ່ຍັງມີ

2) ອ້າຍຍັງຢູ່ ຮູ້ແກ່ໃຈເຖີດນ້ອງ
ອ້າຍເອງຈະຂໍປະຄອງ ລູກສອງອ້າຍກໍຍິນດີ
ຈະລ້ຽງດູ ແລະອຸ້ມຊູເຕັມທີ່
ຈະເປັນພໍ່ໃໝ່ທີ່ດີ ຈະເປັນສາມີທີ່ດີຂອງເມັຽ

• ເຊັດນໍ້າຕາ ເຖີດໜາຢ່າມົວຮ້ອງໄຫ້
ນັບຕັ້ງແຕ່ນີ້ຕໍ່ໄປ ອ້າຍຈະບໍ່ປະໃຫ້ນ້ອງອ່ອນເພັຽ
ຈະຊ່ວຍລ້ຽງລູກ ປູກຝັງຜັກມັນຄວັດເຂັ່ຽ
ຈະຫາລ້ຽງລູກແລະເມັຽ ບໍ່ເສັຽດາຍແມ່ນແຕ່ຊີວາ

3) ເຖິງເຂົາຊ່າ ວ່າເຈົ້າເປັນແມ່ຮ້າງ
ກະຊ່າງເຖີດໜານ້ອງນາງ ແມ່ຮ້າງກະຊ່າງເຖີດໜາ
ຢ່ານ້ອຍໃຈ ເຖິງຜູ່ໃດເຂົາວ່າ
ແມ່ຮ້າງໝົດສິ້ນຣາຄາ ນັກຮ້ອງບ້ານນາຄົນນີ້ເຫັນໃຈ…

ເນື້ອຮ້ອງ & ທຳນອງ : ຄຳແພງ ຈຸນລະມະນີ (~1970)
ນັກຮ້ອງຕົ້ນສະບັບ : ຄຳແພງ ຈຸນລະມະນີ

1) ໂອ້…ເມືອງ ວຽງຈັນ
ງາມດັ່ງວິມານ ເບື້ອງບົນນະພາ
ໃຜໄດ້ມາເຫັນ ກໍເປັນບຸນຕາ
ສົມປຣາຖນາ ຕັ້ງໃຈ

2) ເມື່ອຍາມ ຣາຕຣີ
ທຸກແຫ່ງກໍມີ ແຕ່ສີແສງໄຟ
ສົມເປັນເມືອງຫຼວງ ທີ່ງາມວິໄລ
ບໍ່ມີແຫ່ງໃດ ປຽບທັນ

• ງາມແທ້ນໍ ວຽງຈັນເຈົ້ານີ້
ທຸກຢ່າງມີ ແຕ່ຄວາມສຸກສັນ
ເຖິງຍາມແລງ ລົງລອຍອາບນໍ້າຂອງກັນ
ແສນສຸກແທ້ນໍວຽງຈັນ ດັ່ງວິມານສວັນແທ້ນີ້

3) ເມື່ອຍາມ ຈາກໄປ
ໄດ້ແຕ່ອາລັຍ ຫາວຽງທຸກທີ
ເຄີຍໄດ້ສຸກສັນ ທຸກວັນທຸກປີ
ແຕ່ມາບັດນີ້ ຈາກໄກ…

ເນື້ອຮ້ອງ & ທຳນອງ : ຄຳພູ ທະວີວັນ (1967)
ນັກຮ້ອງຕົ້ນສະບັບ : ຄຳພູ ທະວີວັນ

1) ສຽງແຄນ ເຂົາເປົ່າອອດອ້ອນ
ຂ້ອຍນອນ ແລ້ວຫຼັບບໍ່ລົງ
ເປົ່າແລ້ວເປົ່າ ຄິດເຖິງເຈົ້າຢູ່ແຄມຝັ່ງຂອງ
ປານນີ້ຄົງ ມີຄູ່ຫຼືຍັງ…

2) ສຽງແຄນ ເຂົາເປົ່າອອດອ້ອນ
ເມື່ອກ່ອນ ນັ້ນເຈົ້າເຄີຍຟັງ
ແຕຣແລັນແຕຣ ຄິດເຖິງແຕ່ເຈົ້າປາງຄາວຫຼັງ
ປານນີ້ຍັງ ຄິດເຖິງອ້າຍບໍ່ນໍ້…

3) ແມ່ນໃຈ ນ້ອງຍັງຊື່ຕຣົງ
ໝັ້ນຄົງ ຄິດຕັ້ງໃຈລໍ
ບໍ່ຜັນແປ ຈະຫາເຖົ້າແກ່ເພິ່ນໄປສູ່ຂໍ
ໄປຢູ່ເຮືອນຫໍ ວິມານຂອງເຮົາ…

ເນື້ອຮ້ອງ & ທຳນອງ : ສ. ແສງສິຣິວັນ (≤1975)
ນັກຮ້ອງຕົ້ນສະບັບ : ບຸນທ່ຽງ ມະນີວົງສ໌

1) ຕາດນໍ້າຫ້ວຍຍາງ ຢູ່ຫ່າງປາກເຊນ້ອຍດຽວ
ບຸນຫຼາຍໄດ້ທ່ຽວ ຊົມນໍ້າຕົກໂຕນລົງຫິນຊັນ
ງາມ ດ້ວຍທັມມະຊາດເສກສັນ
ສາລາມີພັກຜ່ອນພັນ ສຸດແສນສຳຣານຣຶທັຍ

2) ພຣຶກສາຊື່ນບານ ແຕ່ພູມລຳທານໃສເຢັນ
ໝູ່ມວນນົກເຕັ້ນ ຕາມກ້ານກິ່ງສົ່ງສຽງກ້ອງໄກ
ປາ ກໍລອຍຫຼິ້ນນໍ້າສົດໃສ
ສາຍລົມພັດແຜ່ວຜິວກາຍ ສຸກໃຈຫາຖິ່ນໃດປານ

• ພູບາຈຽງ ສູງເດັ່ນງາມຕາ
ແຄມສາຍທາຣາ ສະລ້ຽງປາມີປາຫຼາຍພັນ
ໂອ້ຫຼັກແປດ ແດນນີ້ຄ້າຍດັ່ງສວັນ
ສຽງນໍ້າຕົກໂຕນສນັ່ນ ຊວນໃຫ້ຝັນເຖິງຄົນຮັກຂ້າ

3) ສຸກເຫຼືອເມື່ອມາ ຫຼັກແປດແດນອັນວິໄລ
ບໍ່ລືມຫຼົງໄດ້ ດັ່ງພາບຖ່າຍຕິດຕຶງຝັງຕາ
ຍາມ ຂ້າໄກຊວນໃຫ້ໃຝ່ຫາ
ແມ່ນໄກກໍຍັງຫວນມາ ຫາກບຸນຂ້າຫາກຍັງມີ…

ໂອໂອ່ໂອ້…ໂອໂອ່ໂອ້…ໂອ້ໂອ…

ເນື້ອຮ້ອງ & ທຳນອງ : ພ. ເພັດຄັນທະ (~1970)
ນັກຮ້ອງຕົ້ນສະບັບ : ພ. ເພັດຄັນທະ

1) ໜາວປີນີ້ ບໍ່ມີນ້ອງຢູ່ຄຽງໝອນ
ໜາວໃນຄາວປີກ່ອນ ມີບັງອອນນອນແນບອຸຣາ
ໜາວມາຄັ້ງໃດ ກອດຂວັນໃຈໃຫ້ໜາວອິດສາ
ໜາວໃນປີນີ້ໜາ ຂວັນຕານ້ອງຢູ່ແຫ່ງໃດ

2) ໜາວປີນີ້ ບໍ່ມີນ້ອງຢູ່ຄຽງຂວັນ
ຫົວໃຈອ້າຍມັນສັ່ນ ຄິດເຖິງວັນເຄີຍຄູ່ດວງໃຈ
ຍິ່ງລົມໜາວໂບກ ອ້າຍຍິ່ງໂສກຊອກຊໍ້າຊວງໃນ
ອີກຈະນານປານໃດ ຍອດຂວັນໃຈຈະຢ້ອນຄືນມາ

• ໜາວໆຢ່າງນີ້ ຄົນດີນ້ອງຢູ່ຢ່າງໃດ
ຫຼືມີຄົນຮັກໃໝ່ ຄອຍເອົາໃຈໃຫ້ອຸ່ນອຸຣາ
ຫຼືຍັງຫວ່າງເປົ່າ ໂສກເສົ້າກໍ້າກືນນໍ້າຕາ
ອ້າຍມີແຕ່ເອກາ ນໍ້າຕາໄຫຼຫຼັ່ງອາບປາງ

3) ໜາວຢ່າງນີ້ ຄົນດີນ້ອງຢູ່ກັບໃຜ
ຢູ່ກັບຄົນຮັກໃໝ່ ຫຼືຂວັນໃຈໝອງໄໝ້ຄວນຄາງ
ນ້ອງມີຄວາມສຸກ ຫຼືວ່າທຸກຢ່າງໃດໜໍນາງ
ອ້າຍມີແຕ່ອ້າງວ້າງ ນາງເອີຍນາງອ້າຍແສນຣະທົມ…

ເນື້ອຮ້ອງ & ທຳນອງ : ໄຊພອນ ສິນທະຣາດ (1970)
ນັກຮ້ອງຕົ້ນສະບັບ : ໄຊພອນ ສິນທະຣາດ

1) ເຄີຍພົບຍິງ ມາແລ້ວຫຼາຍໆ
ບໍ່ເຄີຍສົນໃຈ ບໍ່ເຄີຍຮັກໃຜຈົນໝົດຫົວໃຈ
ເສື້ອແດງເສື້ອເຫຼືອງກໍມີ ຜູ່ຈົນຜູ່ມີກໍຫຼາຍ
ບໍ່ເຄີຍອາລັຍ ບໍ່ເຄີຍໃຝ່ຝັນ

2) ພໍພົບຍິງ ຄົນໃສ່ເສື້ອຂຽວ
ຫົວໃຈໂນ້ມໜ່ຽວ ຫຼົງຮັກເສື້ອຂຽວນັ້ນຢູ່ທຸກວັນ
ຄຶດເຖິງຮອຍຍິ້ມແສນຫວານ ຄຶດເຖິງສາບານຄືນນັ້ນ
ຕຣາບຊົ່ວຊີວັນ ຮັກດຽວແນ່ນອນ

• ເປີດ ວິທະຍຸ
ເປີດຟັງເບິ່ງດູ ສູ່ຟ້າວຫຼັບນອນ
ມີໃຜຜູ່ນຶ່ງ ຄິດເຖິງເຈົ້າຢູ່ບັງອອນ
ຄົນນີ້ເຂົາຊື່ໄຊພອນ ຫຼົງຮັກງາມງອນເສື້ອຂຽວບາງໆ

3) ພໍສຽງເພງ ດັງແວ່ວມາຫາ
ຂໍນາງເຈົ້າຢ່າ ຢ່າຄິດນິນທາຫຼືວ່າກຽດຊັງ
ມີແຟນນັກຮ້ອງລະດີ ຮັບຮອງບໍ່ມີຜິດຫວັງ
ຢ້ານແຕ່ນວນນາງ ນ້ອງເຈົ້າຈະລວງ…

ເນື້ອຮ້ອງ & ທຳນອງ : ຄຳຫຼ້າ ເພັດດາຣາ (~1959)
ນັກຮ້ອງຕົ້ນສະບັບ : ວຽງແວວ ວົງວຽງຄຳ

1) ໂອ້ຫລວງພຣະບາງ ຟາກຟ້າແດນໄກ
ແດນພູປ່າພະນາອຳໄພ ນຶກເຖິງຍັງໃກ້ນໍ້າໃຈຂອງນາງ
ແຜ່ນພູແລະຜາ ໜາກັ້ນເປັນທາງ
ຂັ້ນດວງໃຈໃຫ້ຫ່າງ ຂໍນ້ອງຢ່າຮ້າງຫ່າງລາ

2) ແມ່ຂອງແມ່ຄານ ໄຫຼກ້ຽວຜູກພັນ
ເໝືອນດັ່ງເຊັ່ນດວງໃຈອ້າຍນັ້ນ ມາຂໍຮັກໝັ້ນສັມພັນຊົ່ວຟ້າ
ແບກຮັກຂ້າມຂອງ ໝົ່ນໝອງອຸຣາ
ນຶກເຖິງວາສນາ ຈະມາຄູ່ຄຽງຄົນດີ

• ອ້າຍ… ແບກຄວາມຮັກມາຫາ
ກາຍແລະຈິດອຸທິດຊີວາ ມຸ່ງມາຫາເພື່ອຕາຍແດນນີ້
ລົມໜາວໂບກມາ ອຸຣາໝອງໄໝ້ທະວີ
ເກງຄວາມຮັກຈະເກີນສັກສີ ນ້ອງຄົນດີທີ່ອ້າຍໝັ້ນໝາຍ

3) ເຖິງແມ່ນຢ່າງໃດ ຂໍໃຫ້ເວົ້າມາ
ຮັກຫຼືໂກດໂປຣດໄດ້ເອີ່ຍຈາ ຢ່ານຶກເລີຍວ່າຜູ່ຊາຍແດນໄກ
ຫາກຮັກຈະຂໍ ດົ້ນດັ້ນປ່າໄພ
ພູແລະຜາກວ້າງໃຫຍ່ ດ້ວຍໃຈມາຫາເຈົ້າເອີຍ…

ເນື້ອຮ້ອງ & ທຳນອງ : ຄຳຫຼ້າ ເພັດດາຣາ (1960)
ນັກຮ້ອງຕົ້ນສະບັບ : ຄຳເຕີມ ຊານຸບານ

1) ກຸຫລາບສວັນ ທຸກວັນອ້າຍຝັນເຖິງເຈົ້າ
ເພີ້ຣຳພັນຝັນເຝົ້າ ປອງເອົາແຕ່ນ້ອງນວນນາງ
ແຕ່ເຈົ້ານັ້ນ ສັນໃດຈຶ່ງໄດ້ເຫີນຫ່າງ
ຫຼືມີຄູ່ຄຽງຂ້າງ ນວນນາງຈຶ່ງບໍ່ຂ້ອງກ່ຽວ

2) ວາສນາ ຊາຕາອ້າຍນີ້ຕໍ່າຕ້ອຍ
ຮັກຈຶ່ງໄດ້ເລື່ອນລອຍ ເຝົ້າຄອຍຮັກນ້ອງຂ້າງດຽວ
ຊ່າງລືມລັຍ ນໍ້າໃຈກ່ອນນັ້ນຍຶດໜ່ຽວ
ຫຼືມີຄູ່ຂ້ອງກ່ຽວ ແໜ້ນໜຽວກັບໂສມຍຸພິນ

• ໂອ້… ເມືອງສວັນ
ຫວັງຜູກສຳພັນ ຮັກກັນຊົ່ວຟ້າແລະດິນ
ມາບັດນີ້ ນ້ອງລັຍລືມເລີຍເສັຽສິ້ນ
ຄົງເຫຼືອແຕ່ຟ້າກັບດິນ ໃຫ້ເປັນອະນຸສອນ

3) ສິ້ນແລ້ວຊາດນີ້ ບໍ່ມີຣົຖເບັ້ນໃຫ້ເຈົ້າ
ອ້າຍຈຶ່ງຕ້ອງໝອງເສົ້າ ອົກເອົ້າເຝົ້າຝັນອາທອນ
ເຖິງຊາດໜ້າມີ ອ້າຍນີ້ກໍຂໍບໍ່ຢ້ອນ
ຍອດຮັກເອີຍລາກ່ອນ ນວນນ້ອງຈົ່ງມີໂຊກດີ…