Author: Phong DAVONG

ເນື້ອຮ້ອງ & ທຳນອງ : ຄຳຫຼ້າ ໜໍ່ແກ້ວ (~1970)
ນັກຮ້ອງຕົ້ນສະບັບ : ບັງອອນ

1) ຊາຍອື່ນ ໝື່ນແສນ
ມາຈາກເມືອງແຖນ ເມືອງແມນແດນສວັນ
ບໍ່ເຄີຍບໍ່ເຄີຍ ຈະຄິດຜູກພັນ
ບໍ່ຢາກໄດ້ເປັນມິ່ງຂວັນ ບໍ່ຝັນແມ່ນຍາມນິທຣາ

2) ຊາຍນຶ່ງ ເທົ່ານີ້
ເປັນຍອດຊາຕຣີ ເປັນທີ່ປຣາຖນາ
ບໍ່ລືມບໍ່ລືມ ພໍສ້ຽວເວລາ
ຢາກຢູ່ເປັນຄູ່ສເນຫາ ໄກຕາຄົງໝອງຣຶດີ

• ດາວເດືອນເກື່ອນຟ້າ ແຜ່ນພະສຸທາ
ເງິນທອງເຂົ້າຂອງ ມາກມີ
ບໍ່ໄດ້ກະຕຸກຕຸ້ນເຕືອນ ລືມອ້າຍຈັກດີ້
ຍິ່ງຮັກຍິ່ງຫວງເຕັມທີ ຢາກໃຫ້ນາຣີມີນ້ອງຄົນດຽວ

3) ຊາຍນຶ່ງ ເທົ່ານັ້ນ
ທີ່ນ້ອງໃຝ່ຝັນ ຄືນວັນຜູ່ດຽວ
ຫຼັບຕາມືນຕາ ຢາກເຫັນຊາຍດຽວ
ບໍ່ຢາກໃຫ້ໃຜມາຫຼຽວ ກົມກຽວກ່ຽວກ້ຽວອ້າຍເລີຍ…

ເນື້ອຮ້ອງ & ທຳນອງ : ຄຳແພງ ຈຸນລະມະນີ (≃1967)
ນັກຮ້ອງຕົ້ນສະບັບ : ພອນເທພ ເທພພິທັກສ໌

1) ດວງໃຈໃນຊີວີ ນ້ອງຈົ່ງຊົງຈຳໃຫ້ດີ
ອ້າຍຄວນເພງນີ້ ເພາະເຮົານັ້ນມີເບື້ອງຫຼັງ
ທີ່ຍັງຝັງດວງຈິດ ສຖິດໃຫ້ຄິດພະວັງ
ເໝືອນດັ່ງບົນຂອບຟ້າ ທີ່ຮັກຜືນພະສຸທາ

2) ດວງໃຈໃນຊີວັນ ນ້ອງລືມຫຼືຄຳສາບານ
ທີ່ປະຕິຍານ ສັມພັນຮັກປຣາຖນາ
ນ້ອງມາລືມຫໍຫ້ອງ ຄອງສຸກສນຸກອຸຣາ
ອ້າຍໝອງໝົ່ນຜວາ ເໝືອນນາສິ້ນຄົນໃຍດີ

• ຂາດນ້ອງຄົນດຽວ ຮື… ແສນປ່ຽວອຸຣາ
ປຽບເໝືອນດວງຈັນທຣາ ເມື່ອຍາມສິ້ນແສງສຸຣີ
ຂ້າມອງເງົາຕົວເອງ ຫວັ່ນເກງເພາະຕໍ່າສັກສີ
ຮັກຈຶ່ງເມີນໜ່າຍໜີ ຫົວໃຈແສນທໍຣະມານ

3) ນາງຄົງລືມຄວາມດີ ຮັກມີພະລັງອາຍກິ່ນ
ທີ່ເຄີຍຖວິນ ສິ້ນຄວາມເຍື່ອໃຍສົງສານ
ຮັກເຄີຍຫວານສນິດ ດວງຈິດອຸທິດທຸກວັນ
ຄ້າຍເໝືອນດາວຕ່າງຝັນ ອຳພາງໃຫ້ໝອງຊີວາ…

ເນື້ອຮ້ອງ & ທຳນອງ : ສົມລິຕ ພັນນະວົງສ໌ (≃1970)
ນັກຮ້ອງຕົ້ນສະບັບ : ສົມລິຕ ພັນນະວົງສ໌

1) ບໍ່ຄິດບໍ່ຝັນ ພົບກັນແລ້ວຈະຕ້ອງຈາກ
ພຽງເຣີ່ມຈະຮັກ ກໍມາຕ້ອງຈາກກັນໄກ
ນ້ອງວ່າມີ ພັນທະຫົວໃຈ
ປະເພນີກັ້ນໄວ້ ອ້າຍຕ້ອງຕຣົມໂສກສັນ

2) ບໍ່ຄິດບໍ່ຝັນ ພົບກັນແລ້ວຈະຕ້ອງຫ່າງ
ພຽງເຣີ່ມກໍຈາງ ເລືອນລາງເໝືອນດັ່ງຄວາມຝັນ
ເຮົາບໍ່ຄວນ ຈະຄິດຮອດກັນ
ໂອ້ຄວາມຮັກເຮົານັ້ນ ນ້ອຍບຸນແລະວາສນາ

• ຍາມນີ້ ເໝືອນນ້ອງຢູ່ບົນສວັນ ສ່ວນຕົວອ້າຍນັ້ນ ຢູ່ພື້ນພະສຸທາ
ກໍມີຊ່ອງຫວ່າງ ຂຶ້ນທີ່ກາງເວຫາ
ຍາມຄິດຮອດແກ້ວຕາ ບໍ່ອາດໄປມາຫາກັນ

3) ບໍ່ມັກຈະຝັນ ພົບກັນຄັ້ງໃນອະດີດ
ພຣົມຊ່າງລິຂິດ ແກ້ງເຮົາໃຫ້ຕຣົມໂສກສັນ
ເຮົາບໍ່ຄວນ ຈະມາພົບກັນ
ດ້ວຍການພົບເຮົານັ້ນ ພົບກັນແລ້ວຕ້ອງຈາກໄປ…

ເນື້ອຮ້ອງ & ທຳນອງ : ສ. ບົວລະພັນ (≈1965)
ນັກຮ້ອງຕົ້ນສະບັບ : ສ. ບົວລະພັນ

1) ລືມໄລບ້ານປ່າ ແລ້ວບໍ່ນົງເຍົາ
ບ່ອນທີ່ເຄີຍທຸກໆແລງເຊົ້າ ບ່ອນເຈົ້າເຄີຍຢູ່ກ່ອນນັ້ນ
ໄປຢູ່ວຽງວັງ ລືມບ້ານຫຼັງແລ້ວບໍ່ນົງຄານ
ໄດ້ໄປຢູ່ນະຄອນວຽງຈັນ ລືມບ້ານເກົ່າແລ້ວຫຼືໃດ

2) ປູປາກຸ້ງຊິວ ທີ່ເຈົ້າເຄີຍຈ່ອມ
ລືມແລ້ວບໍຣົດກິ່ນແກງອ່ອມ ກິ່ນຫອມປາລ້າປາໄຫຼ
ໄດ້ກິນອັນດີ ລືມແລ້ວຕິປານ້ອຍຖືກໄຊ
ໄດ້ກິນປາທະເລກຸ້ງໃຫຍ່ ລືມໄລແລ້ວບໍ່ບ້ານນາ

• ເຈົ້າຄົງລືມເສັຽສິ້ນ ລືມຖິ່ນທີ່ເຄີຍ
ຈຶ່ງບໍ່ເຫັນເຈົ້າກ່າວອ້າງເອີ່ຍ ເຖິງເລີຍບ້ານດົງບ້ານປ່າ
ໄດ້ມີຄວາມສຸກຄົງລືມທຸກ ໄປແລ້ວແກ້ວຕາ
ລືມຄວາມຮັກລືມຄຳສັນຍາ ລືມວາຈາໄປແລ້ວບໍ່ນາງ

3) ແດນດົງບ້ານປ່າ ຂອງເຈົ້າຍັງຄອງ
ໄປຢ້ຽມຢາມແນ່ເດີນວນນ້ອງ ອ້າຍຄອງດ້ວຍໃຈອ້າງຫວ້າງ
ຫາກຍັງບໍ່ລືມ ຈົ່ງໄດ້ຄືນບ້ານເກີດເຖີດນາງ
ຢ່າຕັດໃຈໜີໄກເຫີນຫ່າງ ນວນນາງຂໍຈົ່ງລ້ຽວຄືນ…

ເນື້ອຮ້ອງ & ທຳນອງ : ສ. ແສງສິຣິວັນ (≲1970)
ນັກຮ້ອງຕົ້ນສະບັບ : ມະນີວັນ ວໍຣະວົງ

1) ຜືນດິນຖິ່ນນາ ບ້ານປ່າຂາດອນແຫ່ງນີ້
ຊ່າງສວຍງາມດີ ເມື່ອແສງສຸຣີສາດສ່ອງ
ເຫັນເຂົ້າໃນນາອຣ່າມ ໄກວແກວ່ງຮວງງາມເມື່ອລົມຕ້ອງ
ງາມແທ້ຮວງທອງ ເມື່ອຍາມຫຼຽວມອງສຸກໃຈ

2) ນົກນ້ອຍກໍມາ ຫາບ່ອນທີ່ເຄີຍຊອກກິນ
ແຄມຫ້ວຍນໍ້າລິນ ຖິ່ນນີ້ຍິ່ງງາມສົດໃສ
ເຫັນນົກມີຄູ່ຄຽງຂ້າງ ດວງຈິດນ້ອງຊ່າງເກີດຫວັ່ນໄຫວ
ລົມພັດກໍໄຜ່ສຽງດັງ ກ່ອມໃຫ້ນ້ອງຍິ່ງຫຼົງໃຫຼອ່ອນຊວງ

• ເຫັນພໍ່ນາກ່ຽວເຂົ້າ ຊ່ວຍກັນ
ແດດກໍຮ້ອນຍັງອົດດັນ ເກັບກ່ຽວເຂົ້ານັ້ນຫວັງໃຫ້ໝົດຮວງ
ຫຼຽວໄປແຄມປ່າ ໂອ໋ນັ້ນຜະກາບານຢູ່ເປັນພວງ
ພໍຕາເວັນຈະສິ້ນດວງ ດອກໄມ້ທັງປວງສົ່ງກິ່ນຫອມມາ

3) ຟ້າຄົງເສກສັນ ປັ້ນແຕ່ງບ້ານນາແຫ່ງນີ້
ຊ່າງງາມເກີນທີ່ ຂ້ານີ້ຈະພັລນາ
ພໍເຖິງຄາວຈະໄກຈາກ ມາພາກໜີໄປອາລັຍຫາ
ລາແລ້ວບ້ານປ່າ ຂ້ານີ້ຄິດວ່າຈະກັບຄືນມາດັ່ງເຄີຍ…

ເນື້ອຮ້ອງ & ທຳນອງ : ສນອງ ອຸ່ນວົງ (1968)
ນັກຮ້ອງຕົ້ນສະບັບ : ກ. ວິເສດ

1) ຂໍສັ່ງລາ ລຸງຕາປ້າອາທັງຫຼາຍ
ຫຼານຂໍລາໄປ ລາໄປສູ້ເສິກສົງຄາມ
ດຽວນີ້ເມືອງລາວ ກຳລັງພັຍລາມ
ຍ້ອນການຄຸກຄາມ ຈຶ່ງຕ້ອງຈາກໄປ

2) ຂໍປ້າອາ ລຸງຕາເຖົ້າແກ່ທຸກຄົນ
ຢ່າຄິດກັງວົນ ກັງວົນໃຫ້ໝົ່ນໝອງໃຈ
ຄິດວ່າຫຼານເອງ ເກີດມາເປັນຊາຍ
ຢ່າຄິດນ້ອຍໃຈ ຫຼານໄປບໍ່ນານກັບມາ

• ຢູ່ທາງບ້ານ ຈົ່ງຊ່ວຍດູແລ
ນ້ອງນ້ອຍທັງພໍ່ແມ່ ຈົ່ງແລຊ່ວຍຫຼານເຖີດໜາ
ຊ່ວຍຄອບຄົວຫຼານ ຍາມຈົນແລ່ນຫາ
ຂໍຈົ່ງເມດຕາ ຍາມຍາກຂັດສົນ

3) ເຖິງຈາກໄປ ກໍໄປເພາະໜ້າທີ່ຫຼານ
ເມື່ອຊາດຕ້ອງການ ຕ້ອງການຊາຍໜຸ່ມທຸກຄົນ
ເພື່ອຊາດຂອງເຮົາ ຈຶ່ງຍອມສູ້ທົນ
ຫາກເຊົາຫວຸ້ນວົນ ບໍ່ດົນຄົງຫວນຕ່າວມາ…

ເນື້ອຮ້ອງ & ທຳນອງ : ສ. ບົວລະພັນ (1968)
ນັກຮ້ອງຕົ້ນສະບັບ : ກ. ວິເສດ

1) ຢູ່ດີເຖີດນ້ອງ ຢູ່ຄອງຄອຍອ້າຍ
ຂໍສັ່ງຂວັນໃຈ ລາໄປສູ້ຣົບສົງຄາມ
ບ້ານເມືອງເຮົາ ຖືກເຂົາລຸກລາມ
ຂໍຈາກຄົນງາມ ໄປສູ່ສນາມແນວໜ້າ

2) ເບິ່ງແຍງລູກນ້ອຍ ຈົ່ງຄອຍພຽນລ້ຽງ
ຂໍຢ່າລຳອຽງ ຊິງຊັງລູກເຖີດຂວັນຕາ
ອ້າຍຂໍວອນ ງາມງອນໂສພາ
ນ້ອງຈົ່ງຄອຍຖ້າ ຢ່າມີມາຍາໃນຫົວໃຈ

• ພໍ… ສິ້ນສັ່ງຂວັນຕາ
ຣົຖໂຕໂຍຕາ ແວ່ວມາຂໍລານ້ອງໄປ
ສິ້ນສົງຄາມ ລຸກລາມຍາມໃດ
ຈະຢູ່ຄຽງໃກ້ ແນບກາຍຈົນສິ້ນຊີວາ

3) ຢູ່ເຮືອນຄອຍອ້າຍ ດວງໃຈຢ່າເສົ້າ
ຂໍຢ່າງ່ວມເຫງົາ ຈົ່ງເຊົາໄວ້ກ່ອນຄົນດີ
ແມ່ນເທວັນ ອິນພຣົມປຣານີ
ພົ້ນຈາກພັຍຣີ ບຸນເຮົາມີຄົງໄດ້ພົບກັນ…

ເນື້ອຮ້ອງ & ທຳນອງ : ສນອງ ອຸ່ນວົງ (1968)
ນັກຮ້ອງຕົ້ນສະບັບ : ກ. ວິເສດ

(ເວົ້າ) “ຊີວິດທະຫານ ບໍ່ຄືຂ້າຣາຊການພົລເຮືອນ
ຄໍ່າບໍ່ໄດ້ຢືນ ຄືນບໍ່ໄດ້ຢູ່ ນອນຄ້າຍເປັນປະຈຳ…”

1) ຢ່າທໍຣະມານ ຫົວໃຈກັນເລີຍ
ເຈົ້າຢ່າເມີນເສີຍ ລະເລີຍເໝືອນຄົນຊັງກັນ
ຂ້າຜິດສິ່ງໃດ ດວງໃຈຈຶ່ງລົງໂທດທັນ
ດ່ວນມາຕັດຮັກຂາດບັ້ນ ຫົວໃຈຈາບັນສຸດຝືນ

2) ຢ່າທໍຣະມານ ຫົວໃຈກັນເຫຼັ້ນ
ຂ້າບໍ່ຢາກເຫັນ ນ້ອງເປັນຂອງຊາຍຄົນອື່ນ
ກ້າຕັດສິນໃຈ ລືມໄດ້ປ່ອຍອ້າຍຂົມຂື່ນ
ເປັນຫຍັງບໍ່ສົ່ງຮັກຄືນ ຄືນອ້າຍກ່ອນຈະປ່ຽນໃຈ

• ຄວນຫຼືໃຈໂຫດ ລົງໂທດລົງທັນ
ຜິດພຽງເທົ່ານັ້ນ ຫາກຄົນຮັກກັນຄວນໃຫ້ອະພັຍ
ຂ້າພຽງຜິດນັດ ຄັ້ງດຽວເທົ່ານັ້ນ
(ເວົ້າ) “ນ້ອງເອງກໍຮູ້ຢູ່ແລ້ວວ່າ ວຽກການຂອງອ້າຍປະມືບໍ່ໄດ້ ໂທ້…”
ຈຳເປັນໄປຫາບໍ່ໄດ້ ເທົ່ານີ້ຫຼືຈຶ່ງປ່ຽນໃຈ
ຊ່າງໂຫດຊ່າງຮ້າຍ ເຫຼືອທົນ

3) ຢ່າທໍຣະມານ ຫົວໃຈກັນເຫຼັ້ນ
ຂ້າບໍ່ຢາກເປັນ ເປັນເພັຊຄາດຂ້າຄົນ
ຂໍເຈົ້າຈົ່ງໄປ ຕາມທາງແສນໄກໃຫ້ພົ້ນ
ຢ່າທໍຣະມານໃຈຄົນ ເຫຼືອທົນເຈົ້າອາດຈະຕາຍ…

ເນື້ອຮ້ອງ & ທຳນອງ : ສ. ບົວລະພັນ (1968)
ນັກຮ້ອງຕົ້ນສະບັບ : ກ. ວິເສດ

1. ໃຜລວງໃຜຫຼອກ ໃຜບອກວ່າຮັກແທ້ນັ້ນ
   ໃຜຕັດສັມພັນ ໃຜບັ່ນທາງເດີນ
   ສັນຍາ ວ່າຈະບໍ່ໝາງເມີນ
   ໃຜໜໍລ່ວງເກີນ ສັນຍາກ່ອນໃຜ
   
   
2. ໃຜລວງໃຜແທ້ ໃຜແກ້ໂສ້ຮັກກ່ອນນັ້ນ
   ໃຜຖິ້ມຄຳໝັ້ນ ແກ້ງກັ່ນລືມລັຍ
   ຫົນທາງ ທີ່ເຮົາເຄີຍສຸກໃສ
   ແຕ່ແລ້ວຂາດໄປ ຍ້ອນໃຜຫວັງລວງຫຼອກກັນ
   
   
3. ສ່ວນອ້າຍນີ້ ບໍ່ເຄີຍລະເມີດສັນຍາ
   ຕັ້ງໝັ້ນສັດຈະວາຈາ ບໍ່ເຄີຍຫາທາງຫ່າງຫັນ
   ເມື່ອເຫັນນ້ອງເມີນ ຈຶ່ງເມີນໄປຕາມໆກັນ
   ຢ້ານເຂົາກ່າວຂວັນ ວ່າຊາຍງໍ້ຍິງ
   
   
4. ໃຜລືມໃຜກ່ອນ ໃຜອ້ອນຄວາມຮັກໃຫ້ໝັ້ນ
   ໃຜຫຼີກສາບານ ປີ້ນປັ່ນຄວາມຈິງ
   ຫົວໃຈ ຊ່າງໂຫດຮ້າຍເໝືອນປີງ
   ດູດເລືອດເຊືອດຄີງ ບໍ່ຫຼິງບໍ່ແລຕໍ່ກັນ…

ເນື້ອຮ້ອງ & ທຳນອງ : ສນອງ ອຸ່ນວົງ (1969)
ນັກຮ້ອງຕົ້ນສະບັບ : ກ. ວິເສດ

1. ນີ້ຫຼືນີ້ຫຼື ຄົນຮັກກັນ
   ບໍ່ທັນຂ້າມວັນ ຮັກຜັນເປັນອື່ນ
   ບໍ່ມີເຍື່ອໃຍ ເຫຼືອໄວ້ໃຫ້ຊື່ນ
   ຮັກບໍ່ຍັ້ງຍືນ ສຸດຝືນຫົວໃຈອາວອນ
   
   
2. ນີ້ຫຼືນີ້ຫຼື ຄືສັນຍາ
   ເຫດໃດນ້ອງມາ ວິວາໄປກ່ອນ
   ບໍ່ຄິດເຖິງວັນ ສັມພັນເກົ່າກ່ອນ
   ຮັກບໍ່ແນ່ນອນ ຫຼອກຫຼອນປ່ຽນຄຳສັນຍາ
   
   
3. ກ່ອນເຄີຍ ສາບານ
   ຮັກຍັ້ງຍືນນານ ດັ່ງຈັນຄຽງຄູ່ຟ້າ
   ຈະຖືຮັກນັ້ນ ເໝືອນດັ່ງສັນຍາ
   ຮັກກັນຈົນກວ່າ ດິນຟ້າມະລາຍ
   
   
4. ນີ້ຫຼືນີ້ຫຼື ຄືຮັກຈິງ
   ຫຼອກກັນເໝືອນລີງ ໃຈຍິງລືມງ່າຍ
   ບໍ່ເຫຼືອນໍ້າຄຳ ດັ່ງສັນຍາໄວ້
   ຮັກບໍ່ໝັ້ນໝາຍ ຢູ່ໃສນໍ້າຄຳສັນຍາ…