ໝວດໝູ່: ຊຸດທີ່ 04

ເນື້ອຮ້ອງ & ທຳນອງ : ສ. ແສງສິຣິວັນ (1965)
ນັກຮ້ອງຕົ້ນສະບັບ : ຈັນທະຣາ ອຸເທນສັກດາ

ແມຊ ໂປເຕໂຕ! ແມຊ ໂປເຕໂຕ! ແມຊ ໂປເຕໂຕ!

1) ຄໍ່າຄືນວັນນີ້ ຂ້າມີສຸກໜັກ
ຈິດໃຈຄຶກຄັກ ຊັກພາເຕັ້ນຕື່ນ
ດົນຕຣີບັນເລງ ຄື້ນເຄງຕລອດຄືນ
ຊີວິດຍັ້ງຍືນ ຍາວນານພັນປີ

2) ໜຸ່ມແກ່ແລະສາວ ລື່ນເລີງເບີກບານ
ດັ່ງຢູ່ສະຖານ ວິມານສິມພະລີ
ຟັງເພງເບົາໆ ແຖມເຫຼົ້າຢ່າງດີ
ສວັນແຫ່ງນີ້ ໃສມີປຽບປານ

• ເພີນກັບສຽງ ສຽງເພງອັນເຍົ້າໃຈ
ຟັງເທົ່າໃດ ຍິ່ງພາຫຼົງໃຫຼໃຝ່ຝັນ
ຈັງຫວະເພງ ໂປເຕໂຕສຸກສຳຣານ
ສນຸກສນານ ຕ່າງຟ້ອນກັນຕາມແບບມີ

3) ບາງຄົນກໍຟ້ອນ ແມຊແນວແປກໜັກ
ບາງຄົນຢືນຊັກ ຊັກຈົນຕາຕີ່
ເພງພາເພີນໃຈ ລືມອາຍໄດ້ດີ
ຄວາມທຸກທີ່ມີ ໜີໄປໝົດເລີຍ…

ເນື້ອຮ້ອງ & ທຳນອງ : ສ. ແສງສິຣິວັນ (1965)
ນັກຮ້ອງຕົ້ນສະບັບ : ຈັນທະຣາ ອຸເທນສັກດາ

1) ໂອະ ໆ ໆ ໆ ຮ້ອນໃນຈິດ
ເຝົ້າແຕ່ຄິດ ຈົນອ່ອນໃຈ
ທັ້ງໆທີ່ເປັນ ຍາມໜາວ
ແຕ່ຂ້າຍັງຮ້ອນໃນ ບະ! ຮ້ອນຢ່າງໃດກັນ

2) ໂອະ ໆ ໆ ໆ ຮ້ອນເຕັມທີ
ດັ່ງອັກຄີ ໄໝ້ເຜົາຜານ
ຄິດໆຍິ່ງພາປວດໃຈ ສຸດຮ້ອນໃນດວງມານ
ຮ້ອນແທບທານ ທົນບໍ່ໄຫວ

• ນັ່ງໆຍັງຮ້ອນ ຈະນອນຍິ່ງຊໍ້າໆ
ອາບນໍ້າບໍ່ເຊົາ ໂອະ ໆ ໆ ເອົ້າຈະຕາຍ
ຄົງເປັນເພາະຮັກ ໜີໜ້າ
ຂ້າຈຶ່ງເກີດຮ້ອນໃນ ຮ້ອນໃນຣຶດີ

3) ໂອະ ໆ ໆ ໆ ຮ້ອນໃນຈິດ
ຊ່ວຍດັບພິດ ຮ້ອນໃຫ້ທີ
ຈະທົດຈະແທນບຸນຄຸນ ຈະຄໍ້າຈຸນນານປີ
ແມ່ນຮ້ອນນີ້ ຫາຍຈາກໃຈ…

ເນື້ອຮ້ອງ & ທຳນອງ : ປ. ຕຣີຈັນ (1964)
ນັກຮ້ອງຕົ້ນສະບັບ : ຈັນສມອນ ສິນບັນດິດ

1) ຮັກແທ້ນັ້ນມີ ຢູ່ໃສ
ໃກ້ຫຼືໄກ ແຫ່ງໃດຮັກແທ້ນັ້ນຢູ່
ສູ່ແດນດິນຟ້າ ເບື້ອງບົນສວັນ
ຂໍດົ້ນດັ້ນ ໄປຈົນໄດ້

2) ຮັກແທ້ນັ້ນມີ ຢູ່ແຫ່ງໃດ
ໂລກໝຸນໄປ ປຽບດັ່ງໃຈຊາຍແສນໜ່າຍ
ກ່ອນເຄີຍມຸ່ງໝາຍ ມອບໃຈແລະກາຍ
ແມ່ນຍິ່ງຫ່າງ ຮັກຍັງເລື່ອນລອຍ

• ໃຜວ່າຮັກ ຫວານຊື່ນອຸຣາ
ແຕ່ວາສນາ ນ້ອງນີ້ຕໍ່າຕ້ອຍ
ຮັກຈຶ່ງໄດ້ທຳ ຈິດໃຫ້ເລື່ອນລອຍ
ຫຼືສຸດເອື້ອມສອຍ ຮັກແທ້ຢູ່ສູງ

3) ຮັກແທ້ນັ້ນມີ ຢູ່ທີ່ໃຈ
ຫາກຊາຍໃດ ມີໃຈເຫຼື້ອມໃສໝາຍມຸ່ງ
ນ້ອງຈະຖນອມ ເທີດທູນຢູ່ສູງ
ໃຫ້ເຮືອງຮຸ່ງ ເໝືອນຈັນແຈ່ມຟ້າ…

ເນື້ອຮ້ອງ & ທຳນອງ : ປ. ຕຣີຈັນ (1970)
ນັກຮ້ອງຕົ້ນສະບັບ : ຈັນສມອນ ສິນບັນດິດ

1) ລົມໜາວພັດຜ່ານ ຈິດໃຈສະທ້ານໜາວສັ່ນທົ່ວກາຍ
ຮັກດຽວທີ່ນ້ອງໝັ້ນໝາຍ ກໍມາປ່ຽນໃຈເສັຽແລ້ວແກ້ວຕາ
ຫວັງປຣາຖນາ ຫວັງໄດ້ອ້າຍມາຄູ່ຄອງ
ນ້ອງຫວັງຈະສຸກສົມປອງ ໄດ້ຢູ່ຄຽງສອງມາຄອງໃຈ…

2) ແວ່ວສຽງອ້າຍສັ່ງ ວ່າຈະຄອຍຮັກຮັກຢູ່ບໍ່ວາຍ
ເຫມັນບໍ່ທັນສລາຍ ອ້າຍກໍກັບກາຍເສັຽແລ້ວດວງໃຈ
ຍິ່ງໂສກຍິ່ງຕຣົມ ຣະທົມໝົ່ນໝອງເລື້ອຍໄປ
ຍອດຮັກມາຫ່າງໜີໄກ ປ່ອຍນ້ອງຮ້ອງໄຫ້ນ້ອຍໃຈໂສກສັນ…

• ຫາກຄວາມຮັກ ນັ້ນສົມດວງໃຈ
ໜາວມາຄັ້ງໃດ ນ້ອງບໍ່ຫວັ່ນໄຫວໃຈຫວັ່ນ
ຈະມອບຊີວິດ ຈິດໃຈໃຫ້ອ້າຍໝາຍໝັ້ນ
ໃຈດຽວຮັກດຽວເທົ່ານັ້ນ ຊົ່ວຊີວັນສລາຍ…

3) ນ້ອງຄອຍອ້າຍຢູ່ ເມື່ອໃດອ້າຍຮູ້ວ່ານ້ອງຍັງຄອຍ
ລົມເຢັນຜ່ານມານ້ອຍໆ ນ້ອງຍັງຈະຄອຍຄອຍອ້າຍໄປຈົນຕາຍ
ຢ່າທໍຣະມານ ເຖິງນານນ້ອງນີ້ຈະຄອຍ
ສົງສານນ້ອງນີ້ພຽງນ້ອຍ ຢ່າປ່ອຍໃຫ້ຄອຍຄອຍຈົນຂາດໃຈ…

ເນື້ອຮ້ອງ & ທຳນອງ : ປ. ຕຣີຈັນ (1967)
ນັກຮ້ອງຕົ້ນສະບັບ : ຈັນສມອນ ສິນບັນດິດ

1) ຄືນນຶ່ງຍັງຊຶ້ງ ດວງໃຈ
ບົນຟ້າໃສ ງາມຕາ
ດາວດວງນ້ອຍ ລອຍບົນນະພາ
ພະພາຍພັດມາ ກ່ອມໝູ່ພຶກສາງາມຍິ່ງ

2) ຄືນນຶ່ງຍັງຊຶ້ງ ອຸຣາ
ຍອດປຣາຖນາ ຮັກຈິງ
ມອບກາຍໃຈ ໃຫ້ອ້າຍທຸກສິ່ງ
ລວງຍິງຫຼືໃດ ອ້າຍຈາກໄປໃສແສນດົນ

• ຄອຍ… ທຸກຄືນແລະວັນກໍຄອຍ
ຄອຍເສັຽຈົນເດືອນຕໍ່າ ໝູ່ດາວອັບເສົາມືດມົນ
ທົນ… ນ້ອງທົນໝອງໝົ່ນອຸຣາ
ອ້າຍສັນຍາໄວ້ນັ້ນ ແປຜັນປ່ຽນຄຳຫຼືໃດ

3) ດາວຕົກອົກນ້ອງ ອາວອນ
ເຝົ້າຖອດຖອນ ຣຶທັຍ
ຟ້າງຽບເຫງົາ ອັບເສົາຫົວໃຈ
ອ້າຍຢູ່ຫົນໃດ ປ່ອຍໃຫ້ນ້ອງຄອຍທຸກຄືນ…

ເນື້ອຮ້ອງ & ທຳນອງ : ວິລລ້ຽມ ດິດທະວົງສ໌ (1971)
ນັກຮ້ອງຕົ້ນສະບັບ : ວິລລ້ຽມ ດິດທະວົງສ໌

1) ຍາມ ຄໍ່າຄືນເຊັ່ນນີ້
ຣາຕຣີ ມີແຕ່ຄວາມເຫງົາ
ປຽບ ຄ້າຍດັ່ງຕົວເຮົາ
ລອຍເໝືອນວ່າວ ຢູ່ບົນເວຫາ

2) ເມື່ອ ຣາຕຣີມີຝົນ
ຕ້ອງທົນ ໝອງເສົ້າໜັກໜາ
ປຽບ ຄ້າຍດັ່ງດາຣາ
ຖືກເມຄາ ປິດບັງເອົາໄວ້

• ຟັງ ສຽງລົມພັດເປົ່າ
ຍິ່ງເຫງົາ ໂສກໃນຣຶທັຍ
ປຽບ ດັ່ງຄົນໜາວໄຂ້
ຫ່ວງອາລັຍ ຢູ່ທຸກເວລາ

3) ເມື່ອ ຣາຕຣີມີຈັນ
ນັ່ງຝັນ ໃຈລ່ອງລອຍຫາ
ເມື່ອ ໃດນ້ອງກັບມາ
ຄວາມໂສກາ ຄົງສິ້ນຈາກໃຈ…

ເນື້ອຮ້ອງ : ສາຍຄຳ ສີສວາດ & ສິລ ເມືອງໃຕ້
ທຳນອງເພງຂເມນ : ຣາຕຣີເຊກອງ ‘Reatrey Sekong’ by Sin Sisamouth (1967)
ນັກຮ້ອງຕົ້ນສະບັບ : ສົມມະນີ ສີສວາດ

1) ທີ່ຝັ່ງເຊກອງ ສອງເຮົາຮ່ວມໃຈ
ແສນຊື່ນສົດໃສ ສອງເຮົາສຸກສັນ
ຕ່າງຝາກຄວາມຫວັງ ດ້ວຍໃຈຜູກພັນ
ຝັ່ງເຊ ຄືນນັ້ນ ຍັງເປັນສັກຂີ

2) ທີ່ຝັ່ງເຊກອງ ນ້ອງຍັງນັ່ງຄອຍ
ຫົວໃຈເລື່ອນລອຍ ນ້ອຍໃຈເຕັມທີ
ນ້ອງສຸດຫ່ວງຫຼາຍ ຍາມອ້າຍຫ່າງໜີ
ຈົ່ງມີ ໂຊກດີ ຍາມປາບປວງມານ

• ສົງຄາມປຣະຊິດ ແຄວ້ນອັຕຕະປື
ນີ້ຫຼື ທີ່ໃຫ້ ເຮົາຕ້ອງຫ່າງກັນ
ອ້າຍໄປ ເພື່ອໄປ ຂັບໄລ່ປວງມານ
ຫວັງອີກບໍ່ນານ ອ້າຍຄົງໄດ້ກັບຄືນມາ

3) ທີ່ຝັ່ງຍັງມີ ນ້ອງນີ້ຜູ່ດຽວ
ທຸກຄືນນັ່ງຫຼຽວ ເມີ່ມອງທ້ອງຟ້າ
ປາບໝູ່ມານສູນ ມ້ວຍມອດເຖີດໜາ
ແລ້ວມາ ຮ່ວມສອງ ເຊກອງແຫ່ງນີ້…

ເນື້ອຮ້ອງ & ທຳນອງ : ພົມມະ ພິມມະສອນ (19??)
ນັກຮ້ອງຕົ້ນສະບັບ : ມະລີຈັນສຸກ ເທບສຸວັນ

1) ອ້າຍຢູ່ຫົນໃດ ສຸດທີ່ຮັກ
ທີ່ຮັກ ນ້ອງວ້າເວ່ໃຈ
ເຄີຍຮັກເຄີຍພະນໍ ຢອກລໍ້ກັນຊື່ນໃຈ
ບັດນີ້ອ້າຍຢູ່ໃສ ຢູ່ໃສຈຶ່ງບໍ່ມາ

2) ອ້າຍລືມນໍ້າຄຳ ວ່າຮັກແລ້ວ
ລືມໝົດແລ້ວ ຫຼືຖ້ອຍສັດຈາ
ເຄີຍລັ່ນໄວ້ກັບໃຜ ຈະຮັກຈົນຊົ່ວຟ້າ
ລືມແລ້ວຫຼືສັນຍາ ສັນຍາວ່າຈະຮັກດຽວ

• ເສັຍແຮງນ້ອງ ຫຼົງເຊື່ອຄຳ
ຈຶ່ງເຈັບຈຶ່ງຊໍ້າ ໃຈຜູ່ດຽວ
ຫົວໃຈແຫ່ງນ້ອງ ຕ້ອງເປົ່າປ່ຽວ
ຣະທົມທຸກຕຣົມຄົນດຽວ ບໍ່ມີໃຜເຊັດນໍ້າຕາ

3) ອ້າຍຢູ່ຫົນໃດ ສຸດທີ່ຮັກ
ທີ່ຮັກ ນ້ອງຮ້ອງຮຽກຫາ
ຟັງແລ້ວຈົ່ງຮັບຮູ້ ວ່ານ້ອງເສົ້າໂສກາ
ສຸດແສນທໍຣະມາ ເທົ່າໃດເທົ່າໃດອ້າຍເອີຍ…

ເນື້ອຮ້ອງ & ທຳນອງ : ພົມມາ ສົມສຸທິ (1969)
ນັກຮ້ອງຕົ້ນສະບັບ : ສຸມຸນທາ ສີຣິມະໂນທັມ

1) ນ້ອງເຄີຍສັນຍາ ຮັກໝັ້ນຣຶທັຍໄວ້ກ່ອນ
ຈະຮັກແນ່ນອນ ບໍ່ປ່ຽນແປຜັນ
ຫຼົງຜິດຄິດຝັນວ່າເປັນຈິງ ທີ່ແທ້ກໍຍິງຫວັງພຽງໝັ້ນ
ຫຼອກໃຫ້ເຮົາຝັນ ຕາຍໃຈ

2) ແທ້ຈິງນ້ອງມີ ຮັກທີ່ໝາຍປອງໄວ້ກ່ອນ
ມາຮູ້ກໍຕອນ ທີ່ມັນແສນສວາຍ
ນ້ອງຢິບຍື່ນຮັກໃຫ້ຈອມປອມ ຮັກແທ້ເຈົ້າທອມໃຫ້ຄົນໃໝ່
ບົ່ມຄວາມເຈັບໄວ້ ເສົ້າໃຈໂສກສັນ

• ເມື່ອມາພົບ ປະສົບແກ້ວຕາ
ອ້າຍຂໍຄືນຄຳທີ່ວ່າ ຮັກສຸດຊົ່ວຟ້ານິຣັນ
ມອບຄຳໃໝ່ໄວ້ ຂໍຈາກໄປຈົນຊົ່ວຊີວັນ
ແມ່ນເກີດຊາດໃດຢ່າພານ ພົບນົງຄານຜູ່ມີສອງໃຈ

3) ສົງສານຕົວເອງ ທີ່ຖືກນັກເລງຮັກຫຼອກ
ອົກຊໍ້າຈິດຊອກ ເກືອບຊີບສລາຍ
ບົດຮຽນບົດຮັກປະຈັກມາ ສູງເໜືອຣາຄາທີ່ຄວນໄດ້
ຈະຈົດຈຳໄວ້ ຈົນໃຈສິ້ນເອີຍ…

ເນື້ອຮ້ອງ & ທຳນອງ : ຄຳແຫວນ ປ້ອງພິມຄຳ & ສີລາວົງ ແກ້ວ (1968)
ນັກຮ້ອງຕົ້ນສະບັບ : ແສນສັກດາ

1) ຄິດເຖິງທ່າເດື່ອ ເມື່ອຍາມຈາກມາ
ມີທັງນໍ້າຕາ ອຸຣາສະອື້ນອ່ອນໃຈ
ທົບທວນ ຄໍ່າຄວນເພາະຢູ່ຫ່າງໄກ
ແສນເສົ້າຣຶທັຍ ສຸດອາລັຍເຖິງຂວັນຕາ

2) ຄິດເຖິງເຮົາສອງ ນັ່ງມອງນໍ້າໄຫຼ
ແສນເພີນສຸກໃຈ ທີ່ໄດ້ຄູ່ຄຽງຂວັນຕາ
ສາຍລົມ ໂບກໂບຍໂຊຍແຜ່ວພັດມາ
ຊາບຊຶ້ງຕຣຶງຕາ ຊັກພາໃຫ້ໃຈໃຝ່ຝັນ

• ຄ້ອຍຄໍ່າ ນໍ້າໄຫຼລົງສູ່ເວີນວັງ
ຮິມສອງຟາກຝັ່ງ ຊ່າງງາມດັ່ງແດນສວັນ
ເມື່ອແລມອງ ພາໃຫ້ສອງເຮົາສຸກສັນ
ໂອ້ຈອມຂວັນ ພາບນັ້ນອ້າຍຍັງຈຳໄດ້

3) ຄິດເຖິງທ່າເດື່ອ ເມື່ອຍາມຈາກມາ
ແສນເສົ້າໜັກໜາ ດັ່ງຟ້າຜ່າລົງຫົວໃຈ
ຄິດມາ ນໍ້າຕາອ້າຍຫຼັ່ງລິນໄຫຼ
ບໍ່ຢາກຫ່າງໄກ ສຸດອາລັຍສຸດຄໍ່າຄວນ…