Category: ກະທູ້

ໄດ້ມີຄົນທີ່ສົນໃຈ ຂຽນມາຂໍໃຫ້ຂ້າພະເຈົ້າທຳການສາທິດແລະອະທິບາຍ ຂັ້ນຕອນຕ່າງໆໃນການ ແຍກເອົາສຽງດົນຕຣີທີ່ຫຼິ້ນສຽງ Piano ເປັນທຳນອງຮ້ອງຂອງເພງ (Melody) ອອກຈາກເອກສານ Midi File ທີ່ໄດ້ເຜີຍແຜ່ ເພື່ອນຳໄປອ່ານດ້ວຍຄີບອດ Yamaha PSR ເພື່ອຈະສາມາດຮ້ອງໃສ່ ແລະສາມາດປ່ຽນຣະດັບສູງຕໍ່າຂອງດົນຕຣີໄດ້ຕາມຄວາມຕ້ອງການ ແລະບໍ່ມີສຽງ Piano ທີ່ຫຼິ້ນທຳນອງຮ້ອງມາຣົບກວນນັ້ນ ຈະຕ້ອງເຮັດວິທີໃດ? ຈຳເປັນທີ່ຈະຕ້ອງໃຊ້ຄອມແລະໂປຣແກຣມ Cubase ອັດເພງດັ່ງທີ່ເຫັນວິດີໂອຊຶ່ງຂ້າພະເຈົ້າໂພສອອກຫຼືບໍ່?… ເພາະຕົນເອງກໍມີຄີບອດ Yamaha PSR ຢູ່ແລ້ວ ແຕ່ບໍ່ຮູ້ວິທີເຮັດ ແລະບໍ່ມີໂປຣແກຣມອັດເພງ Cubase ທີ່ຕ້ອງໃຊ້ຄອມ…

ຄຳຕອບແມ່ນດັ່ງນີ້ :
ຖ້າພະຍາຍາມທຳການສຶກສາຄົ້ນຄວ້າແລະມີຄວາມຮູ້ກ່ຽວກັບຫຼັກການຂອງ ພາສາ MIDI ແລະເຄື່ອງເສບທີ່ມີຣະບົບແທດເໝາະກັບການອ່ານເອກສານ Midi File, ກໍບໍ່ຈຳເປັນຕ້ອງຜ່ານການນຳໃຊ້ຄອມແລະໂປຣແກຣມ Cubase ອັດເພງ. ພຽງແຕ່ໃຊ້ໂປຣແກຣມໃນຕົວຂອງຄີບອດ Yamaha PSR ກໍສາມາດແກ້ບັນຫານີ້ໄດ້.

ແຕ່ກ່ອນອື່ນໝົດ ແມ່ນໃຫ້ເຂົ້າໃຈວ່າ…
ເອກສານ Midi File ດົນຕຣີບັນເລງຂອງຂ້າພະເຈົ້າ ບໍ່ແມ່ນເອກສານ Midi File ມາຕຖານ Karaoke ແຕ່ແມ່ນເອກສານທີ່ໄດ້ທຳການອັດເສບດ້ວຍຄີບອດ Yamaha PSR ແບບສົດໆ ຜ່ານໂປຣແກຣມພາຍໃນຕົວຂອງຄີບອດທີ່ເອີ້ນວ່າ Midi Multi Recording ຊຶ່ງສາມາດອັດການເສບເວລາຫຼິ້ນຄີບອດ ໃສ່ໃນຄັງຄວາມຈຳຂອງເຄື່ອງ ຄ້າຍໆຄືເຄື່ອງອັດເພງ Multi Tracks ໃນຄອມທົ່ວໆໄປ.

ຕາມຫຼັກການແລ້ວ ເອກສານ Midi File ທຸກໆຊະນິດ ແມ່ນບໍ່ສາມາດເກັບບັນທຶກສຽງດົນຕຣີຫຼືສຽງຮ້ອງໄດ້ ມີແຕ່ເກັບທ່າທີ, ທ່ວງທຳນອງ, ການເຄື່ອນໄຫວຂອງຜູ່ເສບ ເວລາບັນເລງດ້ວຍເຄື່ອງດົນຕຣີ ທີ່ເກັບບັນທຶກສິ່ງເຫຼົ່ານີ້ ເປັນຣະຫັດໃນພາສາ MIDI ໄວ້ເປັນເອກສານອີເລັກໂທຣນິກ ຊຶ່ງສາມາດນຳໄປເປີດອ່ານດ້ວຍເຄື່ອງທີ່ມີຣະບົບຊຶ່ງເຂົ້າກັນໄດ້ ແລະສາມາດທຳການດັດແປງແກ້ໄຂທຸກສິ່ງທີ່ໄດ້ອັດບັນທຶກໄວ້ລ່ວງໜ້ານັ້ນໄດ້… ດັ່ງນັ້ນ ການທີ່ຈະດັດແປງຂໍ້ມູນໃນເອກສານ Midi File ແມ່ນຮຽກຮ້ອງຄວາມຮູ້ພື້ນຖານແລະທັກສະການໃຊ້ໂປຣແກຣມໃນການດັດແປງຫຼາຍພໍສົມຄວນ ຈຶ່ງຈະເຮັດໄດ້…

ຂ້າພະເຈົ້າຈະພະຍາຍາມສາທິດເປັນຂັ້ນຕອນແບບຫຍໍ້ໆ ປະກອບດ້ວຍພາບທີ່ຈັບມາຈາກໜ້າຈໍຂອງຄີບອດ Yamaha PSR (ຮຸ່ນ SX900) ເປັນລຳດັບແລະຂັ້ນຕອນດັ່ງນີ້ :

1 – ໂຫຼດເອກສານ Midi File ໃສ່ຄີບອດ
ຈາກໜ້າຈໍຫຼັກຂອງຄີບອດ ແຕະໃສ່ຊ່ອງທີ່ໝາຍວ່າ MIDI ເພື່ອເປີດໜ້າຈໍໃຫ້ເລືອກເພງ Midi File ພາຍໃນເຄື່ອງຫຼືຈາກກະແຈ USB ພາຍນອກ.

2 – ເປີດຈໍ Song Recording Menu (ມີ 2 ວິທີ)

• ດ້ວຍການກົດໃສ່ດຸມ RECORDING ຢູ່ເທິງກໍ້າຊ້າຍໜ້າແປ້ນຂອງຄີບອດ ຫຼື
• ການກົດໃສ່ດຸມ MENU 2 ຢູ່ເທິງກໍ້າຂວາໜ້າແປ້ນຂອງຄີບອດແລະເລືອກເອົາ Song Recording.

3 – ໜ້າຈໍ MIDI Multi Recording
ຈາກໜ້າຈໍ Song Recording Menu, ແຕະໃສ່ຊ່ອງທີ່ມີຄຳວ່າ Multi Recording ເພື່ອເປີດຈໍ MIDI Multi Recording ອອກມາ.

• ຈາກໜ້າຈໍ MIDI Multi Recording, ແຕະໃສ່ຊ່ອງທີ່ມີຄຳວ່າ StepEdit ເພື່ອເຂົ້າໄປພາຍໃນໜ້າຣະຫັດ MIDI ຂອງບົດເພງ. ໂດຍປົກກະຕິ ໜ້າຈໍນີ້ຈະສະແດງໃຫ້ເຫັນຣະຫັດ MIDI ກັບຄ່າຕ່າງໆຂອງ Track Midi Chanel 1 ອອກມາ ພ້ອມດ້ວຍລາຍລະອຽດ ທີ່ແບ່ງເປັນຊ່ອງລວງຂວາງ ແລະດຸມຕ່າງໆສຳລັບດັດແປງຣະຫັດເຫຼົ່ານີ້.

4 – ອ່ານເພງ Midi File ໃນຄີບອດຜ່ານຈໍ MIDI Multi Recording
ການອ່ານເພງ Midi File ຜ່ານຈໍ MIDI Multi Recording ມີ 2 ກໍຣະນີ​ :

• ອ່ານເພື່ອຟັງວ່າບົດເພງ ໄດ້ຖືກຫຼິ້ນດ້ວຍເຄື່ອງເສບຈັກຢ່າງ ແລະຊະນິດໃດແດ່
• ເພື່ອທຳຄວາມເຂົ້າໃຈໂຄງຮ່າງຂອງບົດເພງ ວ່າມີຈັກວັກຈັກທ່ອນ ແຕ່ລະວັກຕອນນອນຢູ່ບ່ອນໃດຂອງເພງ ແລະມີການປ່ຽນເຄື່ອງເສບເວລາໃດແດ່…

ໃນຂັ້ນຕໍ່ໄປ ມາລົງພາກປະຕິບັດດັ່ງນີ້ :

• ຈາກໜ້າຈໍ MIDI Multi Recording, ແຕະໃສ່ດຸມ “ອ່ານ/ໂຈະ” (Play/Pause) ຢູ່ທາງກໍ້າຂວາມື, ບົດເພງ Midi File ຈະເລີ່ມຫຼິ້ນແຕ່ຕົ້ນບົດໃຫ້ເຮົາໄດ້ຍິນ ແລະຣະຫັດ MIDI ຕ່າງໆເທິງໜ້າຈໍກໍຈະເຄື່ອນຍ້າຍຈາກດ້ານເທິງລົງລຸ່ມ ຕາມລຳດັບຄວາມໄວຊ້າຂອງເພງທີ່ບັນທຶກໄວ້…
• ເມື່ອເພງຫຼິ້ນທ່ອນຂຶ້ນຕົ້ນເພງຈົບ ແລະພວມຫຼິ້ນຕໍ່ເຂົ້າວັກທີ 1 ຂອງເພງ, ເຄື່ອງເສບທ່ອນຂຶ້ນຕົ້ນເພງ ຈະປ່ຽນມາເປັນສຽງ Piano ເພື່ອຫຼິ້ນທຳນອງຮ້ອງຂອງເພງ. ເວລານັ້ນ ໃຫ້ແຕະໃສ່ດຸມ “ອ່ານ/ໂຈະ” (Play/Pause) ອີກນຶ່ງຄັ້ງເພື່ອໂຈະການອ່ານບົດເພງ Midi File ໄວ້ຊົ່ວຄາວ.
• ໃຊ້ດຸມ “ລູກສອນ4ທິດ-ເທິງລຸ່ມ” ເພື່ອເຄື່ອນຍ້າຍຂຶ້ນລົງແລະຊອກຫາໂຕໂນຕທຳອິດຂອງສຽງ Piano ທີ່ຫຼິ້ນທຳນອງຮ້ອງວັກທຳອິດຂອງເພງ.

• ແຕະໃສ່ດຸມ Insert ເພື່ອຊອນແນບຣະຫັດ MIDI ໃໝ່ໃສ່ຕຳແໜ່ງທີ່ເພງໂຈະຢຸດຊົ່ວຄາວໄວ້. ໂດຍປົກກະຕິ ຖ້າເຮົາເຄື່ອນຍ້າຍການອ່ານຂອງເພງດ້ວຍດຸມ “ລູກສອນ4ທິດ” ແລະໂຈະຢຸດຊົ່ວຄາວໄວ້ທີ່ໂຕໂນຕໂຕໃດນຶ່ງ, ເມື່ອຊອນແນບຣະຫັດ MIDI ໃໝ່ໃສ່ຕຳແໜ່ງດັ່ງກ່າວ ໂປຣແກຣມຈະເລືອກໃຊ້ຣະຫັດໂຕໂນຕທີ່ໄດ້ໂຈະຢຸດໄວ້.

• ໃຊ້ດຸມ “ລູກສອນ4ທິດ-ຊ້າຍຂວາ” ເພື່ອເຄື່ອນຍ້າຍໄປຕຳແໜ່ງ Note (ຫຼືອື່ນໆ) ແລ້ວໃຊ້ດຸມ DEC/INC ຫຼືດຸມວົງກົມ ALPHA DIAL ເພື່ອປ່ຽນຣະຫັດໃຫ້ເປັນ Ctrl. ຈາກນັ້ນ ໃຫ້ສືບຕໍ່ຍ້າຍໄປແຖວທີ່ມີຄ່າເປັນໂຕເລກ ຊຶ່ງຢູ່ຖັດໄປເບື້ອງຂວາຂອງຣະຫັດ Ctrl ແລ້ວທຳການປ່ຽນຄ່າໃຫ້ເປັນເລກ 7. ຮອດຈຸດນີ້ ເຮົາຈະເຫັນວ່າຄ່າຣະຫັດແຖວສຸດທ້າຍທາງກໍ້າຂວາ ຈະໝາຍວ່າ Volume ເຊິ່ງບົ່ງບອກໃຫ້ຮູ້ວ່າ ນີ້ແມ່ນຣະຫັດ MIDI ທີ່ມີໜ້າທີ່ບັງຄັບແລະຄວບຄຸມຄວາມຄ່ອຍແຮງຂອງເຄື່ອງເສບທີ່ໃຊ້ຫຼິ້ນທຳນອງຮ້ອງຂອງເພງ ໃນຊ່ວງນີ້ແມ່ນສຽງ Piano ນັ້ນເອງ.

ໂດຍປົກກະຕິ ເມື່ອຣະຫັດ Ctrl ເບີ 7 ໄດ້ຖືກຊອນໃສ່ດັ່ງນີ້, ຄ່າຂອງ Volume ຂອງມັນ ຈະແມ່ນ 0 ເຊິ່ງໝາຍຄວາມວ່າ “ມອດສຽງ” ຂອງເຄື່ອງເສບໃນເວລານີ້ ແລະໃນຊ່ວງນີ້ລົງ (ສຽງ Piano) ບໍ່ໃຫ້ມີສຽງດັງອີກຕໍ່ໄປ.

5 – ສືບຕໍ່ຊອກຫາໂນຕທຳອິດຂອງວັກທີ່ເພງທຳການເສບດົນຕຣີ (Solo) ຫຼັງຈາກຫຼິ້ນສຸດເພງ ເຊິ່ງໂດຍທົ່ວໄປຈະແມ່ນກັບມາຫຼິ້ນທ່ອນແຍກຂອງເພງ (Refrain). ມາຮອດຈຸດນີ້ ບໍ່ຕ້ອງກັງວົນເວລາ Midi File ຫຼິ້ນໄປສຸດເພງແລ້ວມີການປ່ຽນສຽງ Piano ເປັນສຽງອື່ນໆ ເພື່ອຫຼິ້ນທ່ອນ (Solo), ຣະຫັດ Volume ຈະເດັ້ງຄືນໃຫ້ມີສຽງເອງ. ລື້ມຄືນພາກປະຕິບັດຜ່ານມາ ໃນການຊອນແນບຣະຫັດ MIDI ໃໝ່ໃສ່ຕຳແໜ່ງກ່ອນໜ້າໂຕໂນຕທຳອິດຂອງວັກລື້ມຄືນພາຍຫຼັງ Solo. ປ່ຽນຣະຫັດຄ່າຂອງ Ctrl 7 ໃຫ້ເປັນ 0 ເພື່ອມອດສຽງ Piano ທີ່ຫຼິ້ນທຳນອງເພງ.

6 – ທຳການລົງບັນທຶກເກັບເອກສານ Midi File ເປັນຊື່ໃໝ່ (Save File) ດ້ວຍການເພິ່ມຄຳວ່າ Playback ຫຼືອື່ນໆ ເພື່ອບໍ່ໃຫ້ຫຼົງກັບເອກສານ Midi File ຕົ້ນສະບັບເຊິ່ງມີສຽງ Piano ຫຼິ້ນທຳນອງຮ້ອງຂອງເພງ.

7 – ເພື່ອກວດສອບຄືນວ່າ ການດັດແປງຣະຫັດ MIDI ກ່ຽວກັບ Volume ສຽງຂອງເຄື່ອງເສບທີ່ຫຼິ້ນສຽງທຳນອງຮ້ອງ (Melody) ຜ່ານພົ້ນໄປດ້ວຍດີ, ເຮົາສາມາດເປີດອ່ານ Midi File ຄືນໃໝ່ແຕ່ເລີ່ມຕົ້ນເພື່ອຟັງເບິ່ງວ່າທຸກສິ່ງທຸກຢ່າງເປັນໄປຕາມທີ່ມຸ່ງຫວັງ.

• ກົດດຸມ EXIT ຫຼາຍໆຄັ້ງເພື່ອຄືນອອກມາໜ້າຈໍຫຼັກຂອງຄີບອດ
• ກົດດຸມ MIXER/EQ ຢູ່ກໍ້າຊ້າຍດ້ານລຸ່ມຂອງຈໍຫຼັກເພື່ອເປີດຈໍ Mixer ອອກມາ
• ແຕະໃສ່ຊ່ອງທີ່ມີຄຳວ່າ Song ເພື່ອເປີດຈໍທີ່ສະແດງຮູບຮວມຂອງເຄື່ອງທີ່ໃຊ້ຄວບຄຸມເພງ ຄ້າຍໆຄືແປ້ນ Mixer 16 Tracks ທົ່ວໄປ ເຊິ່ງຖືກແບ່ງອອກເປັນ 2 ພາກສ່ວນ (ສອງໜ້າ) ຍ້ອນຄວາມນ້ອຍແລະແຄບຂອງຈໍຄີບອດ.
• ໃນຈໍທຳອິດນີ້ ໃຫ້ສັງເກດດຸມທີ່ສະແດງໃຫ້ເຫັນຄ່າຂອງ Volume ຂອງຊ່ອງທີ 1 (Track 1) ເວລາເລີ່ມຕົ້ນເພງ.
• ກົດດຸມ “ອ່ານ” (Play/Pause) Midi File ຢູ່ນອກຈໍ ດ້ານເທິງກໍ້າຊ້າຍທີ່ມີໝາຍວ່າ MIDI ໃນແຖວ PLAYER ດ້ານລຸ່ມຄຳວ່າ SONG.

ເພງ Midi File ຈະທຳການຫຼິ້ນໄປຕາມປົກກະຕິ. ພາຍໃນຈໍ Mixer ໃນຂະນະທີ່ເພງຫຼິ້ນໄປ ຈຸດສີຂຽວ (Led) ໃນແຕ່ລະ Track ຈະກະພິບຮຸ່ງແລະມອດຕາມສຽງເຄື່ອງເສບທີ່ອັດໄວ້.

• ເມື່ອຮອດທ່ອນທີ່ສຽງ Piano ຈະຫຼິ້ນທຳນອງ Melody ຂອງເພງ, ປຸ່ມ Volume ຂອງ Track ເບີ 1 ຈະລົດລົງມາຢູ່ຕຳແນ່ງ 0 ແລະສຽງ Piano ດັ່ງກ່າວຈະມອດສຽງໂດຍອັຕຕະໂນມັຕ.

ເມື່ອຮອດທ່ອນ Solo ກາງເພງ, ປຸ່ມ Volume ຂອງ Track ເບີ 1 ຈະເດັ້ງຄືນຂຶ້ນມາຣະດັບທີ່ໄດ້ອັດບັນທຶກໄວ້ໂດຍອັຕຕະໂນມັຕ ໃຫ້ໄດ້ຍິນສຽງຕາມປົກກະຕິ.

ການເປີດອ່ານເພງ Midi File ແລະນຳໃຊ້ດຸມຣະບົບ Transpose ທີ່ຢູ່ທາງນອກຈໍສຳພັດເພື່ອປ່ຽນຣະດັບສຽງຂອງເພງ…

ໝາຍເຫດ : ດຸມ Transpose ທີ່ຢູ່ທາງນອກຈໍສຳພັດນີ້ ຈະໃຊ້ງານໄດ້ສະເພາະເພງເປັນ Midi File ເທົ່ານັ້ນ ບໍ່ສາມາດບັງຄັບຣະດັບສຽງເພງທີ່ເປັນ Audio (Wav ຫຼື MP3).
ເພື່ອທຳການຜັນປ່ຽນຣະດັບສຽງສູງຕໍ່າຂອງເອກສານເພງທີ່ເປັນຣະບົບ Audio ແມ່ນຕ້ອງເຂົ້າໄປໃນຈໍ PLAYER SONG ທີ່ມີດຸມສຳລັບຄວບຄຸມສຽງໄດ້ຫຼາຍໆຊະນິດ ຕົວຢ່າງ : ປ່ຽນຣະດັບສູງຕໍ່າ, ເລັ່ງຄວາມໄວຊ້າຂອງຈັງຫວະເພງ, ຕອງສຽງຄົນຮ້ອງອອກ,​ ອ່ານລື້ມຄືນຣະຫວ່າງສອງຈຸດ… ແຕ່ການຄວບຄຸມສຽງ Audio ໃນທີ່ນີ້ ແມ່ນສະເພາະເວລາອ່ານຫຼິ້ນເທົ່ານັ້ນ ບໍ່ສາມາດອັດເກັບຄືນເປັນເອກສານໃໝ່ໄດ້.

ເພື່ອຄວບຄຸມຄວາມຄ່ອຍແຮງຂອງສຽງເພງຣະບົບ Audio, ໃຫ້ແຕະໃສ່ດຸມ Menu ຢູ່ກໍ້າຂວາດ້ານເທິງຂອງໜ້າຈໍ ເພື່ອເປີດຈໍ Mixer ຮວມອອກມາແລ້ວ ທຳການປ່ຽນຄ່າ Volume ຂອງຊ່ອງ Audio ຕາມຄວາມປະສົງ.

ເພື່ອກັບຄືນໄປໜ້າຈໍ ຄວບຄຸມການອ່ານ (PLAYER SONG), ແຕະໃສ່ດຸມກາກະບາດທີ່ຢູ່ກໍ້າຂວາດ້ານເທິງຂອງໜ້າຈໍ.

(ກະຣຸນາຕິດຕາມໃນບົດຕໍ່ໆໄປ…)

Paris, 28 ມົກກະຣາ 2024

ຕອບຄຳຖາມທີ່ວ່າ : “ຂັ້ນຕອນຂອງການຮຽບຮຽງການເສບບັນເລງເພງທີ່ໄດ້ແກະໄວ້ ດ້ວຍການໃຊ້ຄີບອດ Yamaha PSR ມາຊ່ວຍໃນການບັນທຶກແລະອັດສຽງເກັບໄວ້ເປັນທັງຣະບົບ Audio Wav, Audio MP3 ແລະ MidiFile…”

ໃນເບື້ອງຕົ້ນຂອງການຮຽບຮຽງການເສບບັນເລງເພງທີ່ໄດ້ແກະໂນຕແລະເນື້ອຮ້ອງໄວ້ລ່ວງໜ້າ ດ້ວຍການໃຊ້ຄີບອດ Yamaha PSR, ຂ້າພະເຈົ້າຈະພິມໂນຕແລະເນື້ອເພງໃສ່ເຈັ້ຽແລ້ວນຳມາສຶກສາວິເຄາະ ການເລືອກຈັງຫວະເສບ ການເລືອກສຽງຕ່າງໆໃນການບັນເລງດ້ວຍມືຊ້າຍແລະມືຂວາ ຕລອດຮອດການຮຽບຮຽງການນຳໃຊ້ເທັກນິກທາງເດີນຂອງຂອດ (Chords Progression) ຊຶ່ງຈະພາໃຫ້ບາງຂອດຕົ້ນສະບັບທີ່ແກະໄວ້ ຖືກປ່ຽນແປງໃຫ້ມີຄວາມສົມດຸນກັບຈັງຫວະໃໝ່ທີ່ເລືອກໃຊ້ດ້ວຍຄີບອດ…

ຖັດມາ ຂ້າພະເຈົ້າກໍຈະທຳການລົງທະບຽນຂອງຄ່າຕ່າງໆແລະເກັບບັນທຶກໄວ້ໃນຄີບອດ (Voice, Style, Tempo, Synchro Start-Stop, Multi Pad, Registration Memory…) ເພື່ອຄວາມສະດວກເວລາເສບບັນເລງ ຈະສາມາດກົດດຸມຕ່າງໆເພື່ອປ່ຽນສຽງຂອງມືຂວາ (ຕົວຢ່າງເວລາຂຶ້ນຕົ້ນເພງ, ເວລາເສບສອຍຕອນທ່ອນແຍກ, ເວລາຈົບເພງ…) ຫຼືປ່ຽນຮູບຮ່າງສີສັນປະເພດຂອງຈັງຫວະດ້ວຍມືຊ້າຍ (ຕົວຢ່າງການລົວກອງເພື່ອສົ່ງລະຫວ່າງວັກຕ່າງໆຂອງເພງ)…

ຈາກນັ້ນ ຂ້າພະເຈົ້າກໍຈະທົດລອງບັນເລງເພງປະມານສາມສີ່ເທື່ອ ເພື່ອຝຶກແອບນີ້ວມືໃຫ້ຄ່ອງແຄ້ວ ບວກກັບການອ່ານຕາມໂນຕເພງທີ່ຕັ້ງຢູ່ຕໍ່ໜ້າ ບໍ່ໃຫ້ຕົກຈັງຫວະຫຼືຫຼົງລືມວັກແລະທ່ອນຕ່າງໆຂອງເພງ… ເມື່ອແນ່ໃຈວ່າໄດ້ດັ່ງເປົ້າໝາຍແລ້ວ ຂ້າພະເຈົ້າກໍຈະເລີ່ມຈັດແຈງຕິດຕັ້ງກ້ອງມືຖືເພື່ອຖ່າຍເປັນວິດີໂອໂດຍສົດໆບໍ່ໃຫ້ຂາດເພງແຕ່ຕົ້ນຈົນຈົບລວດດຽວ ເພື່ອຫຼີກເວັ້ນການຕັດຕໍ່ໃນວິດີໂອພາຍຫຼັງ… ຫາກມີການຜິດພາດ ຂ້າພະເຈົ້າກໍຈະເລີ່ມຕົ້ນໃໝ່ ຈົນກວ່າຈະໄດ້ວິດີໂອລວດດຽວ ເພື່ອບໍ່ໃຫ້ຜູ່ຊົມຜູ່ຟັງຄຶດວ່າ ແມ່ນມີການຕັດຕໍ່ດ້ວຍຄອມ…

(ກະຣຸນາຕິດຕາມໃນບົດຕໍ່ໆໄປ…)

Paris, 05 ພຶສະຈິກາ 2023

4 ທັກສະທີ່ສຳຄັນໃນການຫຼິ້ນຄີບອດ…

1) ທັກສະການແກະເພງ – ແກະໂນຕທຳນອງເພງ (Melody) ແລະຂອດເພງ (Chords)

ການແກະທຳນອງຂອງເພງ (Melody) ເປັນທັກສະທີ່ທຸກຄົນສາມາດເຮັດໄດ້ໂດຍພື້ນຖານຢູ່ແລ້ວ ໂດຍການຟັງແລະຫຼິ້ນຕາມໃຫ້ໃກ້ຄຽງທີ່ສຸດກັບຕົ້ນສະບັບ, ຍິ່ງຝຶກຝົນ ກໍຍິ່ງຈັບສຽງໄດ້ດີແລະໄວຂຶ້ນ. ແຕ່ການແກະຂອດຂອງເພງ (Chords) ບໍ່ແມ່ນເຣື່ອງງ່າຍຄືກັບການແກະທຳນອງເພງ. ໃຜກໍຕາມທີ່ສາມາດຟັງຂອດອອກ ໝາຍຄວາມວ່າ ເຂົາເຈົ້າເຄີຍຫຼິ້ນດົນຕຣີມາເປັນເວລາດົນນານສົມຄວນ ແລະມີຄວາມຊຳນານຢູ່ໃນຣະດັບທີ່ບໍ່ທຳມະດາແລ້ວ.

2) ທັກສະການອອກແບບການຫຼິ້ນໄດ້ດ້ວຍຕົນເອງ (Personal Style)

ການຫຼິ້ນພຽງໃຫ້ໄດ້ຕາມເພງຫຼືຕາມໂນຕໃຫ້ຖືກ ໃຜໆກໍເຮັດໄດ້, ແຕ່ການທີ່ຈະອອກແບບການຫຼິ້ນ ໃຫ້ມີຄວາມແຕກຕ່າງ ການວາງສຽງສູງຕໍ່າແລະໜັກເບົາ ໃຫ້ເພງມີຄວາມໜັກແໜ້ນ ມີລີລາເປັນເອກລັກ ທີ່ພາໃຫ້ຜູ່ຟັງສງົນສົນໃຈຕິດຕາມ ຕ້ອງໄດ້ອາສັຍປະສົບການພໍສົມຄວນ. ຈະເຫັນໄດ້ຈາກການບັນເລງບົດເພງບົດດຽວ ຈາກຫຼາຍໆນັກດົນຕຣີມືອາຊີບ ຈະບໍ່ຊໍ້າກັນເລີຍ, ເພາະແຕ່ລະຄົນ ແມ່ນນຳໃຊ້ທັກສະການອອກແບບທີ່ເປັນເອກລັກຂອງຕົນເອງໃນການບັນເລງ.

3) ທັກສະການອອກແບບລູກຫຼິ້ນແລະລີລາສ່ວນຕົວ (Improvisation)

ເປັນທັກສະທີ່ໃກ້ຄຽງກັບການອອກແບບການຫຼິ້ນໄດ້ດ້ວຍຕົນເອງ ແຕ່ເປັນການເຈາະເລິກລົງໄປໃນ ແຕ່ລະຂອດ ແຕ່ລະຖ່ວງທຳນອງແລະຈັງຫວະຂອງບົດເພງ. ຕົວຢ່າງການເສີມລູກຫຼິ້ນໃສ່ລົງໄປໃນຊ່ອງຫວ່າງຂອງເພງ ເພື່ອໃຫ້ບົດເພງມີສີສັນແລະສົມບູນຂຶ້ນກວ່າເດີມ, ການປ່ຽນຂອດຈາກຂອດທຳມະດາສາມັນຂອງເພງ ໃຫ້ມີຄວາມໂດດເດັ່ນຂຶ້ນຕື່ມ, ການໄຫຼລູກສອຍໃຫ້ທຳນອງເພງ ດ້ວຍປະໂຫຍກໃໝ່ໆ, ເຫຼົ່ານີ້ ຄືທັກສະທີ່ຫຼາຍໆຄົນຍັງຄຶດບໍ່ອອກ ເພາະຕ້ອງໄດ້ອາສັຍຄວາມຮູ້ສຶກສ່ວນຕົວ ບວກກັບປະສົບການແລະຄວາມຊຳນານໃນການຫຼິ້ນເຄື່ອງດົນຕຣີຫຼາຍພໍສົມຄວນ.

4) ທັກສະໃນການປ່ຽນຣະດັບສຽງ (Key) ໄດ້ທຸກໆຣະດັບໂດຍທຳມະຊາດ

ການຫຼິ້ນເພງບົດນຶ່ງໆໄດ້ ໃນທຸກໆຣະດັບສຽງ (ໂດຍບໍ່ຕ້ອງເພິ່ງດຸມຫຼືກົນໄກ Transpose ຂອງຄີບອດມາຊ່ອຍ) ສະແດງເຖິງຄວາມຊຳນານໃນການຫຼິ້ນເຄື່ອງດົນຕຣີນັ້ນໆຢ່າງເຖິງຖອງ. ການຈື່ຈຳທຳນອງເພງ ແລະທາງເດີນຂອງຂອດຕ່າງໆຢ່າງຖືກຕ້ອງ ຮອດຂັ້ນທີ່ສາມາດຍ້າຍການບັນເລງໄປຫຼິ້ນໃນຣະດັບສຽງອື່ນໆໄດ້ຢ່າງຄ່ອງແຄ້ວ ສະແດງວ່າ ຄວາມເຂົ້າໃຈໃນທິດສະດີດົນຕຣີ ກ່ຽວກັບບັນໄດສຽງແລະການເດີນທາງຂອງກຸ່ມຂອດປະສານຕ່າງໆ ຄືພື້ນຖານທີ່ເຊື່ອງຊ້ອນຢູ່ເບື້ອງຫຼັງຄວາມສຳຄັນຂອງທັກສະດັ່ງກ່າວນີ້. ສຳລັບຄົນທົ່ວໆໄປ ທີ່ຫຼິ້ນດົນຕຣີເພື່ອຄວາມສຸກແລະຄວາມມ່ວນຊື່ນໃນວົງແຄບ ແມ່ນບໍ່ຈຳເປັນຈະຕ້ອງມີທັກສະນີ້. ແຕ່ສຳລັບນັກດົນຕຣີມືອາຊີບ ບາງຄັ້ງອາດຈະຕ້ອງໄດ້ພົບກັບສະຖານະການແບບນີ້ ເຊັ່ນ ການເສບເພງຜູ່ຊາຍໃຫ້ຜູ່ຍິງຮ້ອງ ຫຼືການຕ້ອງໄດ້ຫຼຸດຣະດັບສຽງຂອງເພງລົງ ເພື່ອໃຫ້ນັກຮ້ອງທີ່ບໍ່ແມ່ນນັກຮ້ອງອາຊີບຮ້ອງໄດ້ງ່າຍຂຶ້ນ ຫຼືການເຂົ້າຫຼິ້ນຮ່ວມກັບວົງດົນຕຣີ ທີ່ແກະເພງກັນມາຄົນລະຣະດັບ (Key), ເຫຼົ່ານີ້ ລ້ວນແຕ່ຕ້ອງອາສັຍທັກສະການປ່ຽນຣະດັບສຽງທັງສິ້ນ.

Paris, 20 ທັນວາ 2023

ບໍ່ວ່າທ່ານຈະມີຄີບອດ Yamaha PSR-2000 ຫຼຸ້ນເກົ່າ (ອອກເມື່ອປີ 2001) ຫຼືທ່ານຫາກໍຊື້ PSR-SX900 ຫຼຸ້ນຫຼ້າສຸດ (ທີ່ຫາກໍອອກໃນປີ 2019), ທ່ານກໍສາມາດນຳໃຊ້ບົດຂຽນນີ້ ເພື່ອຊ່ວຍໃນການຮຽນຮູ້ລັກສະນະແລະພື້ນຖານຂອງຄີບອດຂອງທ່ານ. ທຸກໆຄີບອດ Yamaha ເລີ່ມແຕ່ຫຼຸ້ນຣະດັບຂັ້ນປານກາງ (PSR ແລະ PSR-S) ຂຶ້ນໄປຈົນຮອດຫຼຸ້ນຣະດັບສູງ (Tyros) ລ້ວນແຕ່ມີຣະບົບໂຕ້ຕອບແລະຣະບົບປະຕິບັດງານທີ່ຄ້າຍຄືກັນ. ຄີບອດຫຼຸ້ນໃໝ່ ຈະມີສຽງຫຼາຍກວ່າ, ມ່ວນກວ່າ, ມີຈັງຫວະຫຼາຍກວ່າແລະມີປະສິດທິພາບສຳຄັນກວ່າຫຼຸ້ນເກົ່າ ແຕ່ວິທີການໃຊ້ (ການເລືອກຈັງຫວະແລະສຽງ, ການເກັບບັນທຶກການຈັດວາງຂອງຄີບອດ, ການຫຼິ້ນແລະການບັນທຶກບົດເພງ) ແມ່ນບໍ່ມີຫຍັງປ່ຽນແປງຫຼາຍ ນັບຕັ້ງແຕ່ຫຼຸ້ນ PSR-2000 ຈົນເຖິງຫຼຸ້ນ PSR ຫຼ້າສຸດ. ຄີບອດ Tyros ທຸກຫຼຸ້ນ ກໍໄດ້ນຳໃຊ້ຣະບົບປະຕິບັດງານດຽວກັນກັບຂອງຫຼຸ້ນ PSR ແລະ PSR-S.

ເລີ່ມແຕ່ປີ 2018, ຄີບອດຫຼຸ້ນ GENOS ໄດ້ມາແທນຫຼຸ້ນ Tyros 5 ແລະຕໍ່ມາໃນປີ 2019, ຫຼຸ້ນ PSR-SX (SX900 ແລະ SX700) ໄດ້ນຳໃຊ້ຣະບົບໂຕ້ຕອບແບບ “ຈໍສັມພັດ” ອອກສູ່ທ້ອງຕລາດ ພາໃຫ້ວິທີການນຳໃຊ້ທົ່ວໄປຂອງຄີບອດ ປ່ຽນຈາກຣະບົບການນຳໃຊ້ແບບເກົ່າດ້ວຍການກົດດຸມຕ່າງໆ ມາເປັນການສັມພັດໂດຍຕຣົງເທິງໜ້າຈໍຂອງຄີບອດ ຄ້າຍດັ່ງຈໍຂອງໂທຣະສັບມືຖື.

ບົດຂຽນນີ້ ຈະອີງໃສ່ການນຳໃຊ້ຣະບົບໂຕ້ຕອບແບບການໃຊ້ດຸມກົດເອົາ ຂອງຄີບອດຫຼຸ້ນ PSR, PSR-S ແລະ Tyros ຮວມທັງຫຼຸ້ນ Piano CVP ເພື່ອໃຫ້ຜູ່ທີ່ໃຊ້ຄີບອດທຸກຫຼຸ້ນສາມາດນຳໃຊ້ໄດ້ເຊັ່ນດຽວກັນ. ໃນອັນດັບຕໍ່ໄປ ຈະມີບົດຂຽນເພີ່ມເຕີມກ່ຽວກັບຄວາມແຕກຕ່າງຣະຫວ່າງຫຼຸ້ນ GENOS ແລະ PSR-SX.

ບົດຂຽນນີ້ແບ່ງອອກເປັນ 3 ພາກທີ່ສຳຄັນດັ່ງນີ້.

(ພາກທີ່ 1) ຈຸດເລີ່ມຕົ້ນ – ພາກນີ້ແນໃສ່ຜູ່ທີ່ຫາກໍຊື້ຄີບອດໃໝ່ໆ ແລະມີຈຸດປະສົງຢາກລົງມືຫຼິ້ນທັນທີ. ເປັນບົດການແນະນຳເບື້ອງຕົ້ນ ໃຫ້ທ່ານໄດ້ຮູ້ຈັກກັບຄີບອດຂອງທ່ານ ແລະອະທິບາຍອົງປະກອບສຳຄັນຕ່າງໆ ທີ່ທ່ານຕ້ອງເຂົ້າໃຈເພື່ອເລີ່ມເສບບັນເລງບົດເພງບົດນຶ່ງໆທັນທີ.

(ພາກທີ່ 2) ກ່ອນຈະເສບບັນເລງ – ພາກນີ້ແນໃສ່ໃຫ້ທ່ານເຂົ້າໃຈວິທີການດຳເນີນງານຂອງຄີບອດ, ຣະບຽບການຈັດແຈງຂອງຂໍ້ບັນທຶກ, ປະເພດຂອງຂໍ້ບັນທຶກທີ່ຕ້ອງໄດ້ໃຊ້ ແລະລົງເລິກກ່ຽວກັບອົງປະກອບແລະຄຸນສົມບັດພື້ນຖານການນຳໃຊ້ຂອງຄີບອດ. ພາກນີ້ແບ່ງອອກເປັນ 4 ສ່ວນຍ່ອຍດັ່ງນີ້ :

• ຣະບົບບັນທຶກຂອງ Yamaha (Yamaha Files System) – ຄີບອດຂອງທ່ານ ປຽບດັ່ງຄອມພິວເຕີ້ ຊຶ່ງນຳໃຊ້ “ແຟ້ມ” ຕ່າງໆໃນການດຳເນີນງານ. “ແຟ້ມ” ດັ່ງກ່າວໂຮມມີ ແຟ້ມຈັງຫວະ, ແຟ້ມສຽງ, ແຟ້ມຣະບົບການຈັດແຈງການບັນເລງ ແລະແຟ້ມບັນທຶກບົດເພງ. ບົດຍ່ອຍນີ້ ຈະອະທິບາຍວິທີການດຳເນີນງານຂອງ “ແຟ້ມ” ແລະການນຳໃຊ້.
  
  
• ຣະບົບຄົ້ນຫາປະເພດຂອງເພງ (Music Finder System) – ຕໍ່ໜ້າຈຳນວນອັນມາກມາຍກ່າຍກອງແລະສັບສົນຂອງຈັງຫວະແລະຈຳນວນສຽງຂອງເຄື່ອງບັນເລງທີ່ມີມານຳຄີບອດ, ມັນເປັນການຍາກສຳລັບຜູ່ທີ່ເລີ່ມຫຼິ້ນໃໝ່ໆ ຈະຕັດສິນໃຈເລືອກໄດ້ວ່າ ຈະເລີ່ມຕົ້ນຈາກຈຸດໃດແທ້. ຣະບົບຄົ້ນຫາເພງ Music Finder ເປັນຖານຂໍ້ມູນໃນຄີບອດ ຊຶ່ງສາມາດມາຊ່ວຍການຊອກຫາຈັງຫວະທີ່ເໝາະສົມແລະໃກ້ຄຽງກັບເພງທີ່ທ່ານຕັ້ງໃຈຈະບັນເລງໄດ້ທັນທີທັນໃດ.
  ໝາຍເຫດ : ຣະບົບຄົ້ນຫາເພງ Music Finder ໄດ້ຖືກປ່ຽນແລະທົດແທນດ້ວຍຣະບົບໃໝ່ທີ່ມີຊື່ວ່າ PLAYLIST ສຳລັບຄີບອດ Yamaha ນັບຕັ້ງແຕ່ຫຼຸ້ນ GENOS ແລະ PSR-SX ເປັນຕົ້ນມາ.
  
  
• ການລົງທະບຽນ (Registrations) – ໂດຍທົ່ວໄປ ຜູ່ໃຊ້ຄີບອດສ່ວນຫຼາຍ ຈະຕ້ອງການຢາກເລືອກສຽງແລະຈັງຫວະຕາມໃຈຂອງຕົນເອງ ສຳລັບເພງທີ່ຈະເລີ່ມບັນເລງ. ການລົງທະບຽນ Registrations ຈະຊ່ວຍໃຫ້ທ່ານສາມາດ “ເກັບບັນທຶກ” ການຕັ້ງຄ່າຕ່າງໆຂອງຄີບອດ ໃຫ້ຢູ່ໃນສະພາບພ້ອມພຽງທີ່ຈະເລີ່ມບັນເລງເພງໃນທັນທີ.
  
  
• ການອັດບັນທຶກເພງ (Recording Songs) – ທ່ານບໍ່ພຽງແຕ່ຈະສາມາດເກັບບັນທຶກການຕັ້ງຄ່າຕ່າງໆຂອງຄີບອດ, ແຕ່ທ່ານຍັງສາມາດອັດແລະບັນທຶກລີລາການເສບແລະບັນເລງເພງໃສ່ໃນແຟ້ມຂອງຄີບອດ ແລະນຳໄປແບ່ງປັນກັບຄົນອື່ນໄດ້ອີກດ້ວຍ!

(ພາກທີ່ 3) ການປັບແລະການຕັ້ງຄ່າຣະບົບຂອງເຄື່ອງ – ເມື່ອຮູ້ຈັກວິທີໃຊ້ໃນສິ່ງທີ່ມີມານຳຄີບອດແລ້ວ, ຂັ້ນຕໍ່ໄປແມ່ນການສຶກສາໃຫ້ເຂົ້າໃຈແລະສາມາດປ່ຽນແລະດັດແປງສິ່ງທີ່ມີມານຳຄີບອດ ໃຫ້ສອດຄ່ອງກັບຄວາມຕ້ອງການສ່ວນຕົວ. ພາກນີ້ແບ່ງອອກເປັນ 4 ສ່ວນຍ່ອຍດັ່ງນີ້ :

• ການປັບຈັງຫວະ (Adjusting Styles) – ຈັງຫວະ ຫຼືທີ່ເອີ້ນກັນວ່າ ສະໄຕລ໌ (Styles) ແມ່ນອົງປະກອບພື້ນຖານຂອງຄີບອດອັຕຕະໂນມັຕ. ນັກຫຼິ້ນຄີບອດທຸກຄົນ ບໍ່ໄວກໍຊ້າ ມື້ນຶ່ງແມ່ນຈະຕ້ອງມີຄວາມປະສົງຢາກປ່ຽນຫຼືດັດແປງຈັງຫວະທີ່ມີມານຳເຄື່ອງ ເພື່ອໃຫ້ເປັນຈັງຫວະສ່ວນຕົວທີ່ເໝາະສົມສອດຄ່ອງກັບເພງທີ່ຕົນເອງຢາກເສບ. ໃນບົດນີ້ ທ່ານຈະໄດ້ຮຽນຮູ້ ການເລືອກສຽງສຳລັບມືຂວາ, ການປັບຄວາມໄວຊ້າຂອງຈັງຫວະ (Tempo) ຕລອດຮອດການດັດແປງແລະຈັດແຈງພາກສ່ວນເຄື່ອງເສບ​ບັນເລງຮ່ວມເປັນວົງໂດຍອັຕຕະໂນມັຕຂອງຄີບອດ.
  
  
• ການສ້າງຈັງຫວະ (Create New Styles) – ການສ້າງຈັງຫວະໃໝ່ (New Styles) ບໍ່ໄດ້ແມ່ນເຣື່ອງງ່າຍດາຍສຳລັບທຸກຄົນສເມີໄປ. ຕົວຢ່າງ ຫາກທ່ານມັກທຳນອງກອງຂອງຈັງຫວະໃດຈັງຫວະນຶ່ງ ແລະຢາກນຳໄປປະກອບກັບສຽງກີ່ຕ້າຂອງອິກຈັງຫວະນຶ່ງ, ທ່ານກໍສາມາດເຮັດໄດ້. ບົດຍ່ອຍນີ້ ຈະອະທິບາຍວິທີປະສົມປະສານ ພາກສ່ວນເຄື່ອງບັນເລງຂອງຈັງຫວະນຶ່ງ ເພື່ອສ້າງເປັນຈັງຫວະໃໝ່.
  
  
• ການປັບເພງ (Adjusting Songs) – ມີຫຼາຍແຫ່ງຫົນທີ່ທ່ານສາມາດໄປຊອກຊື້ຫຼືຖອດເອົາເພງໃນຣະບົບ Midifiles ມາເປີດຫຼິ້ນໃນຄີບອດຂອງທ່ານ. ບົດນີ້ ຈະໃຫ້ຄຳແນະນຳກ່ຽວກັບວິທີປັບປຸງຫຼືປ່ຽນແປງແຟ້ມ Midifile ໃຫ້ເປັນເພງໃໝ່ຕາມທີ່ທ່ານປະສົງແລະຕ້ອງການຢາກໄດ້.
  
  
• ຣະບົບຮ້ອງປະສານສຽງ (Vocal Harmony) – ຄີບອດບາງໜ່ວຍ ຈະມີຊ່ອງສຽບໄມຄ໌ (Microphone) ເພື່ອໃຫ້ທ່ານສາມາດຮ້ອງເພງໃນຂະນະທີ່ເສບບັນເລງໄປພ້ອມ. ສຳລັບນັກຮ້ອງບາງຄົນ ພາກນີ້ຈະຊ່ວຍໃຫ້ທ່ານເຂົ້າໃຈກົນໄກບາງສ່ວນ ຂອງການຮ້ອງແບບປະສານສຽງ.

ບົດສຣຸບ – ຮຽນຮູ້ວິທີຈັດຣະບຽບໂຄງສ້າງຂອງແຟ້ມຕ່າງໆ, ປະເພດແລະຊະນິດຂອງແຟ້ມ, ວິທີເຂົ້າຫາຣະບົບຂອງແຟ້ມ, ວິທີຕັ້ງຄ່າສຳລັບການອັດເພງ, ການເກັບບັນທຶກແຟ້ມສຽງແລະຈັງຫວະຕ່າງໆ.

Paris, 20 ມົກກະຣາ 2020

ຄວາມຮູ້ບາງຢ່າງທີ່ໜ້າສົນໃຈ ເຣື່ອງການຢາກຫັດຫຼິ້ນ Keyboard ກັບເພງລາວ

ມີຫຼາຍຄົນສົນໃຈ ໄດ້ຖາມມາວ່າ ຢາກຫັດຫຼິ້ນ Keyboard ກັບເພງລາວອະມະຕະ ຊຶ່ງຂ້າພະເຈົ້າໄດ້ຮຽບຮຽງແລະບັນເລງເປັນແບບຢ່າງມານັ້ນ ຂໍໃຫ້ຄຳແນະນຳບາງຢ່າງດັ່ງນີ້.

1) ພະຍາຍາມຮຽນອ່ານໂນຕດົນຕຣີ (ເພາະມັນແມ່ນພາສາຂີດຂຽນຂອງສຽງເພງ ຄືດັ່ງ ຫຼັກການຂີດຂຽນຂອງທຸກໆພາສາປາກເວົ້າ ເມື່ອເຮົາເຂົ້າໃຈເຣື່ອງໂນຕ ຊຶ່ງປຽບດັ່ງຫຼັກໄວຍາກອນຂອງພາສາປາກເວົ້າ ການຫັດຫຼິ້ນເພງດ້ວຍເຄື່ອງດົນຕຣີ ບໍ່ວ່າຊະນິດໃດ ກໍຈະສະດວກສະບາຍ ແລະງ່າຍດາຍ ກວ່າການແອບຕາມເພງ ຊຶ່ງເປັນພຽງການຖ່ອງຂຶ້ນໃຈດ້ວຍຫູແບບນົກແກ້ວ ມັນອາດຈະໄດ້ຜົນໄວດັ່ງໃຈ ແຕ່ຈະພົບບັນຫາຫຍຸ້ງຍາກຕາມມາພາຍຫຼັງ)

2) ພະຍາຍາມຄົ້ນຄວ້າທຳຄວາມເຂົ້າໃຈ ກັບເຄື່ອງດົນຕຣີທີ່ໃຊ້ ວ່າມັນສາມາດຕອບສນອງສິ່ງທີ່ເຮົາຕ້ອງການປະການໃດແດ່ (ໂດຍສະເພາະ Electronic Keyboard, Arranger Keyboard ຊຶ່ງເປັນເຄື່ອງດົນຕຣີທັນສມັຍ ທີ່ເຕັມປ່ຽມດ້ວຍ ຣະບົບກົນໄກອັນຊັບຊ້ອນແລະ ໜ້າອັດສະຈັນທີ່ສຸດ ຊຶ່ງນັບເປັນອຸປສັກທີ່ຄ່ອນຂ້າງຈະຫຍຸ້ງຍາກແລະລຳບາກແດ່ສຳລັບຜູ່ຝຶກຫັດຫຼິ້ນໃໝ່ໆ ທີ່ຈະເຂົ້າໃຈໄດ້ເຖິງຖອງ)

3) ພະຍາຍາມຊອກເບິ່ງ ວິດິໂອ (Youtube) ກ່ຽວກັບຫຼັກການດົນຕຣີ ການເສບ ຫຼືແບບຝຶກຫັດຂອງຫຼາຍໆຄົນ ເພື່ອທຳຄວາມເຂົ້າໃຈ ແລະຝຶກຫັດຕາມ.

ແລະສຸດທ້າຍ ຫາໂອກາດໄປເບິ່ງ ນັກດົນຕຣີອາຊີບ ເສບສົດໆ ເພື່ອຍົກຣະດັບແນວຄຶດ ແລະປັບປຸງຄວາມຮູ້ສຶກຂອງຕົນເອງ ເວລາຟັງເພງຢູ່ບ້ານ ກັບຟັງຢູ່ງານ ມັນມີຄວາມແຕກຕ່າງກັນຢ່າງໃດ.

Paris, 14 ມິຖຸນາ 2017

---

ເຄັດລັບຄວາມຮູ້ ແລະປຣະສົບການສ່ວນຕົວຂອງຂ້າພະເຈົ້າ ໃນການຫຼິ້ນ Keyboard ປະເພດ Arranger…

ການຫຼິ້ນ Keyboard ປະເພດ Arranger ມີຈຸດບວກແລະຈຸດລົບດັ່ງນີ້.

1) ຈຸດບວກ ຄືສາມາດຫຼິ້ນຄົນດຽວ ແລະໄດ້ສຽງອອກມາຄ້າຍຄືຫຼິ້ນເປັນວົງຫຼາຍຄົນພ້ອມກັນ.

2) ຈຸດລົບ ແລະທີ່ລຳບາກທີ່ສຸດ ຄືຕ້ອງຝຶກຝົນການນຳໃຊ້ມືຊ້າຍໃຫ້ວ່ອງໄວແລະຊຳນານ ເພື່ອບັງຄັບພາກສ່ວນສຽງກອງແລະສຽງເຄື່ອງດົນຕຣີອື່ນໆ ທີ່ປະກອບເປັນວົງດົນຕຣີດັ່ງຫຼາຍຄົນຫຼິ້ນໄປນຳພ້ອມໆກັນ.

ຣະບົບສຳເຣັດຮູບ ຂອງການບັງຄັບດ້ວຍມືເບື້ອງຊ້າຍ ຊຶ່ງເອີ້ນວ່າ Style ຫຼືຈັງຫວະນັ້ນ ໂດຍທົ່ວໄປ ຢູ່ໃນທຸກໆຍີ່ຫໍ້ຂອງເຄື່ອງ ຈະຖືກອັດແລະບັນທຶກເກັບໄວ້ລ່ວງໜ້າ ເມື່ອເຖິງເວລາຈະເສບ ກໍພຽງແຕ່ກົດປຸ່ມຂຶ້ນມາ ແລ້ວເລີ່ມຫຼິ້ນໄດ້ເລີຍ. ຣະບົບສຳເຣັດຮູບ (Style) ດັ່ງກ່າວ ສ່ວນຫຼາຍຈະເປັນຈັງຫວະຕາມພື້ນຖານຫຼັກການດົນຕຣີສາກົນ ຖ້າໃຜສຶກສາຄົ້ນຄວ້າເຂົ້າໃຈເຄື່ອງເສບໄດ້ດີ ແລະມີຄວາມຮູ້ທາງດ້ານເພງ ກໍສາມາດປ່ຽນແປງປັບປຸງ ຫຼືປະດິດສ້າງຈັງຫວະສ່ວນຕົວໄດ້ ແຕ່ຕ້ອງມີຄວາມຮູ້ຮອບດ້ານກ່ຽວກັບຫຼັກການດົນຕຣີຢ່າງແໜ້ນໜາ ເປັນຕົ້ນແມ່ນການຮຽບຮຽງສຽງບັນເລງໃຫ້ວົງດົນຕຣີຫຼິ້ນແບບຄົບວົງຫຼາຍໆຄົນພ້ອມກັນ ຊຶ່ງປະເດັນສຸດທ້າຍນີ້ ບໍ່ແມ່ນເຣື່ອງງ່າຍ ສຳລັບຜູ່ທີ່ຮຽນຫຼິ້ນໃໝ່ໆ…

ມືຊ້າຍຂອງການຫຼິ້ນ Keyboard Arranger ແຕກຕ່າງກັບການຫຼິ້ນ Piano ຫຼື Synthesizer ທີ່ຫຼິ້ນກັບວົງດົນຕຣີ ເພາະມັນຕ້ອງເຮັດວຽກ ຢ່າງນ້ອຍສາມເທົ່າຕາມກົດຣະບຽບທຳມະດາ ຄືຕ້ອງເປັນທັງ ມືກອງ (Drum) ມືເບສ (Bass) ແລະມື ອໍແກນ (Organ).

Paris, 20 ມິຖຸນາ 2017

---

ຄວາມເຫັນສ່ວນຕົວສຳລັບຜູ່ຝຶກຫັດຫຼິ້ນ Keyboard ໃໝ່ໆ

ເມື່ອທຸກໆຄົນເລີ່ມຕົ້ນຫັດຫຼິ້ນ Piano ຫຼື Keyboard ໃໝ່ໆ ຈະພົບກັບອຸປສັກຂັ້ນທີ່ນຶ່ງ ນັ້ນຄືການບໍ່ສາມາດບັງຄັບນີ້ວມືຂອງຕົນເອງໄດ້ດັ່ງໃຈ. ສາເຫດແມ່ນຍ້ອນວ່າ ການຄວບຄຸມແລະການນຳໃຊ້ເຄື່ອງດົນຕຣີ ແມ່ນພຶດຕິການທີ່ບໍ່ແມ່ນຫຼັກທັມມະຊາດ ສຳລັບນິ້ວມືຂອງຄົນເຮົາ ຄືດັ່ງການນຳໃຊ້ເຄື່ອງມືຊະນິດອື່ນໆໃນຊີວິດປະຈຳວັນ. ເພາະເຄື່ອງມືອື່ນໆ ທີ່ມະນຸດປະດິດຄິດສ້າງຂຶ້ນມາເພື່ອນຳໃຊ້ໃນຊີວິດປະຈຳວັນ ແມ່ນອີງຕາມຄວາມສະດວກຂອງພຶດຕິການຕາມຫຼັກທັມມະຊາດໃນການເຄື່ອນໄຫວຂອງນິ້ວມືຂອງຄົນທົ່ວໄປ… ຄືແນໃສ່ໃຊ້ແຕ່ນີ້ວທີ່ມີພະລັງມາແລ້ວຕາມທັມມະຊາດ (ນີ້ວໂປ້ ນີ້ວຊີ້ ນີ້ວກາງ ແລະມືຂວາເປັນສ່ວນໃຫຍ່). ດັ່ງນັ້ນ ມືເບື້ອງຊ້າຍຈະມີຄວາມອ່ອນແອກວ່າມືເບື້ອງຂວາ ໂດຍສະເພາະແມ່ນນິ້ວນາງແລະນີ້ວກ້ອຍ (ນີ້ວທີ່ 4 ແລະທີ່ 5). ການຝຶກຝົນແລະຝຶກແອບນີ້ວມື ຕ້ອງໄດ້ໃຊ້ເວລາ ເພື່ອເສີມສ້າງນິ້ວມືໃຫ້ມີພະລັງ ແລະໃຫ້ຄວາມເປັນອິສຣະແກ່ແຕ່ລະນິ້ວມື, ເຊິ່ງເອີ້ນວ່າ ການຖອນນິ້ວມື.

ການຖອນນິ້ວມື ແມ່ນການຝຶກຫັດເພື່ອປົດປ່ອຍ ຄວາມເປັນອິສຣະໃຫ້ນິ້ວມືແຕ່ລະນີ້ວ, ຊຶ່ງມັນແມ່ນນຶ່ງໃນພື້ນຖານຂອງການຫຼິ້ນ Piano ຫຼື Keyboard. ແລະການເສີມສ້າງຄວາມເຂັ້ມແຂງໃຫ້ນິ້ວມື ຈະເຮັດໃຫ້ເຮົາສາມາດບັງຄັບນິ້ວມືຂອງຕົນເອງ ໃຫ້ມີຄວາມວ່ອງໄວແລະທົນທານອີກດ້ວຍ. ບໍ່ສະນັ້ນ, ແນວໂນ້ມການເຄື່ອນໄຫວຂອງນິ້ວມືເວລາຫຼິ້ນ Piano ຫຼື Keyboard ຈະອ່ອນແອ ຕິດຄັດ ຝືດເຄືອງ ບໍ່ວ່ອງໄວພຽງພໍ ພາໃຫ້ຫຼິ້ນຜິດພາດ ບໍ່ທັນຈັງຫວະ ແລະປວດເມື່ອຍນິ້ວມືໂດຍໄວວາ.
ເປົ້າໝາຍຂອງການຝຶກຫັດ ແມ່ນເພື່ອເຮັດໃຫ້ນິ້ວມື ມີຄວາມກໍ້າເກິ່ງກັນລະຫວ່າງນິ້ວມືແຕ່ລະນີ້ວ ແລະມືຊ້າຍກໍຕ້ອງໃຫ້ມີຄວາມເຂັ້ມແຂງພຽງພໍ ຄືດັ່ງມືຂວາ.

ແບບຝຶກຫັດການຖອນນິ້ວມື ສຳລັບຫຼິ້ນ Piano ຫຼື Keyboard ທີ່ມີຊື່ສຽງຄື :

• ແບບຝຶກຫັດ Hanon
• ແບບຝຶກຫັດ Czerny
• ແບບຝຶກຫັດ Schmitts
• ແບບຝຶກຫັດ Pischna

ສະເພາະສ່ວນຕົວແລ້ວ ຂ້າພະເຈົ້າບໍ່ເຄີຍນຳໃຊ້ແບບຝຶກຫັດນິ້ວມື ທີ່ເອີ່ຍມາເຫຼົ່ານີ້ຈັກຢ່າງເລີຍ!!! ທຸກສິ່ງທຸກຢ່າງ ແມ່ນອາສັຍການສັງເກດ ການຄົ້ນຄວ້າຊອກຫາ ແລະຄວາມພະຍາຍາມຝຶກຝົນດ້ວຍຕົນເອງຕລອດມາ…

Paris, 28 ພຶສຈິກາ 2018

ດົນຕຣີ ມີປໂຍດຫຍັງແດ່?

ດົນຕຣີ ມີບົດບາດໃນຊີວິດປະຈໍາວັນຫຼາຍທີ່ສຸດ ມັນມີຄຸນຄ່າຕໍ່ຊີວິດ ບໍ່ວ່າຈະເປັນຄວາມສຸກ, ຄວາມທຸກ, ຄວາມໂສກເສົ້າ, ຄວາມໂດດດ່ຽວຫງອຍເຫງົາ ຫຼືຄວາມຮັກ ແລະຄວາມຜິດຫວັງ…

ດົນຕຣີ ແມ່ນພາສາຂອງສຽງ ທີ່ຄົນທຸກຊາດ ທຸກພາສາສາມາດເຂົ້າໃຈໄດ້ດີ ເຖິງແມ່ນວ່າພວກ​ເຮົາ​ອາດຈະບໍ່ສາມາດສົນທະນາຕໍ່ກັນແລະກັນໄດ້ກໍຕາມ ແຕ່ພວກ​ເຮົາ​ກໍສາມາດຫຼິ້ນດົນຕຣີຮ່ວມກັນໄດ້. ດົນຕຣີ ເປັນສິ່ງທີ່ຜ່ອນຄາຍຈິດໃຈຂອງມະນຸດ ສາມາດບັນເທົາຄວາມທຸກໄດ້. ດົນຕຣີ ມີປໂຍດໃນການຜ່ອນຄາຍອາຣົມ ເວ​ລາ​ທີ່​ມີ​ຄວາມ​ກົດ​ດັນ​ທາງຈິດໃຈ ມີຄວາມເຄັ່ງຄຽດແລະຮ້ອນຮົນ.​ ດົນຕຣີ ຊ່ວຍເຮັດໃຫ້ຈິດໃຈມີຄວາມເຍືອກເຢັນລົງ ເປັນເພື່ອນທີ່ດີໃນເວລາຫງອຍເຫງົາ ຊຸກຍູ້ຄວາມຮູ້ສຶກໃຫ້ມີຄວາມກ້າຫານໃນເວລາມີຄວາມຢ້ານກົວ.

ເຊັ່ນດຽວກັນກັບອາຫານທີ່ມີປໂຍດຕໍ່ຮ່າງກາຍ, ດົນຕຣີ ແມ່ນມີປະໂຫຍດຕໍ່ຈິດໃຈ ເພາະເມື່ອເຮົາຟັງເພງມ່ວນໆ ​ເຮົາ​ຈະມີ​ຄວາມ​ຮູ້​ສຶກ​ປາບປື້ມແລະອີ່ມ​ໃຈ ຄືກັນກັບເມື່ອເຮົາເຫັນສິ່ງທີ່ສວຍງາມ, ມັນເຮັດໃຫ້ຊີວິດມີຄວາມສົດຊື່ນ ແລະມີຄວາມສຸກສະບາຍໃຈ. ດົນຕຣີ ເປັນພາສາສາກົນ ຊຶ່ງພວກເຮົາສາມາດເຂົ້າໃຈເຊິ່ງກັນແລະກັນໂດຍບໍ່ມີການເລືອກເຊື້ອຊາດແລະພາສາ ມັນເປັນສື່ກາງສໍາລັບຄວາມສໍາພັນ ຄວາມເຂົ້າໃຈທີ່ດີຣະຫ່ວາງບັນດາມະນຸດທົ່ວໂລກ, ບໍ່ຈຳແນກອາຍຸ ຊັ້ນວັນນະ ແລະເຊື້ອຊາດ, ເຊິ່ງຈະເຫັນໄດ້ຈາກການຫຼີ້ນດົນຕຣີ ຣະຫວ່າງປະເທດທີ່ເວົ້າພາສາແຕກຕ່າງກັນ. ດົນຕຣີ ສະແດງເຖິງຄວາມສາມັກຄີ ແລະທີ່ສໍາຄັນທີ່ສຸດ ໂລກຂອງດົນຕຣີ ແມ່ນໂລກແຫ່ງຄວາມເປັນສັນຕິ.

ສິລະປະດົນຕຣີ ແມ່ນສ່ວນນຶ່ງທີ່ມີຄວາມສຳຄັນຫຼາຍ ທາງດ້ານສວັດດີການຂອງຄົນເຮົາ. ເປັນຄວາມຮູ້ແລະການບັນເທີງ ເປັນປະເພນີທີ່ວາງພື້ນຖານສໍາລັບຄວາມຈະເຣີນຮຸ່ງເຮືອງ ແລະເປັນຕົວແທນຂອງວັທນະທັມ ເຊິ່ງເປັນຈິນຕະນາການຮວມກັບດົນຕຣີ. ມັນມີພະລັງທີ່ສາມາດປ່ຽນແປງຄວາມໂກດແຄ້ນແລະຄວາມຄຽດແຄ້ນ ເປັນພະລັງງານໃຫ້ມີຄວາມຕັ້ງໃຈ ຄວາມມານະອົດທົນ ແລະ ຄວາມໝັ້ນໃຈໃນຕົນເອງ.

ດົນຕຣີ ເປັນພາສາສາກົນທີ່ອະນຸຍາດໃຫ້ການສື່ສານ ໄປມາຫາສູ່ກັນໄດ້ທົ່ວໂລກ ສາມາດຖ່າຍທອດຄວາມຮູ້ສຶກຂອງມະນຸດໄດ້, ດັ່ງນັ້ນຈຶ່ງເປັນສ່ວນນຶ່ງຂອງຊີວິດປະຈໍາວັນທີ່ຂາດບໍ່ໄດ້. ມະນຸດມີຄວາມຄຸ້ນເຄີຍກັບດົນຕຣີ ທັງທາງດ້ານການຮຽນຮູ້, ການສື່ສານ, ການສະແດງອອກ, ແລະການສະແດງຄວາມສາມາດ ທີ່ບຸກຄົນຄວນຈະຮຽນຮູ້. ກິຈກັມດົນຕຣີ ສາມາດຊ່ວຍປົດປ່ອຍອາຣົມ ເປັນວິທີຜ່ອນຄາຍຄວາມຕຶງຄຽດໃນເວລາເຮັດວຽກ ຫຼື ເວລາຫວ່າງ.

ສະຫຼຸບແລ້ວ, ດົນຕຣີແມ່ນເປັນກິຈກັມພັກຜ່ອນຢ່ອນອາຣົມ ທີ່ຕ້ອງໄດ້ຮວມເຂົ້າກັບສັງຄົມ ແລະເປັນສ່ວນນຶ່ງຂອງຊີວິດປະຈໍາວັນ ທີ່ມີບົດບາດໃນສ່ວນບຸກຄົນ ຊຸມ​ຊົນ​ແລະ​ປະ​ເທດ​ຊາດ.​ ມັນສາມາດເສີມຂຍາຍຣົດຊາດຂອງບຸກຄົນ, ສ້າງຄວາມມີສເນ່, ສ້າງຄຸນສົມບັດແລະສາມາດເຮັດໃຫ້ການເຮັດວຽກຂອງອະວັຍວະຕ່າງໆຂອງຮ່າງກາຍ ໃຫ້ຢູ່ໃນສະພາບກຽມພ້ອມ. ເນື່ອງຈາກວ່າໃນຂະນະທີ່ຟັງເພງ ສມອງຈະປ່ອຍຮໍໂມນ Endorphins ອອກມາເຊິ່ງເປັນສານທີ່ເຮັດໃຫ້ເກີດຄວາມສຸກທາງກາຍແລະຈິດໃຈ.
ເພາະສະນັ້ນ ຈົ່ງສັນຫາຄວາມສຸກ ດ້ວຍການຟັງເພງແລະການຮຽນຮູ້ທາງດົນຕຣີກັນເທາະ…

Paris, 22 ທັນວາ 2023

ທິສດີດົນຕຣີ ມີປໂຍດຫຍັງແດ່?

ມີນັກດົນຕຣີຫຼາຍຄົນ ໂດຍທົ່ວໄປ ມັກຈະໃຫ້ຄວາມສຳຄັນກັບການເສບແລະຝຶກຫັດທາງດ້ານສີມື ຫຼາຍກ່ວາການສຶກສາຄົ້ນຄວ້າທາງດ້ານທິສດີ ເພາະທິສດີ ມັກຈະຖືເປັນເຣື່ອງຫນ້າເບື່ອ ແລະຫຍຸ້ງຍາກ ບໍ່ມີປໂຍດ ບໍ່ສາມາດນຳໄປສະແດງຄວາມສາມາດ ຕໍ່ໜ້າຜູ່ຊົມຜູ່ຟັງໄດ້. ແຕ່ຄວາມຈິງແລ້ວ ກ່ອນທີ່ຈະເປັນນັກບັນເລງທີ່ດີນັ້ນ​ຕ້ອງມີຄວາມຮູ້ທາງດ້ານທິສດີຂອງດົນຕຣີ ໃຫ້ເລິກຊຶ້ງເສັຽກ່ອນ.

ປຽບດັ່ງ ການຖ່ອງບົດຮຽນ ຫຼືບົດອ່ານ ຊຶ່ງເປັນພາສາຕ່າງປະເທດ ເຖິງວ່າເຮົາຈະມີຄວາມສາມາດ ຖ່ອງໄດ້ທັງໝົດ ແຕ່ບໍ່ຮູ້ວ່າມັນມີຄວາມໝາຍວ່າຢ່າງໃດແດ່ ກໍຈະພາກັນຖ່ອງແບບຜິດໆຖືກໆ ຫຼືແບບຫຼົງໆລືມໆ ຢູ່ຕລອດ. ເມື່ອບໍ່ຮູ້ແລະບໍ່ເຂົ້າໃຈ ຄວາມໝາຍຂອງສຽງຕ່າງໆທາງຫຼັກການຂອງດົນຕຣີ ເຮົາກໍຈະບໍ່ສາມາດຖ່າຍທອດອາຣົມ ອອກມາໄດ້ ຢ່າງເຕັມເມັດເຕັມໜ່ວຍ ດັ່ງດຽວກັບການເສບບັນເລງດົນຕຣີ ແບບບໍ່ເຂົ້າໃຈຄວາມໝາຍຂອງ “ພາສາດົນຕຣີ” ນັ້ນເອງ.

ທິສດີດົນຕຣີ ຈະກວມສາມຫົວຂໍ້ທີ່ສໍາຄັນ ດັ່ງນີ້…

1) ການຂຽນອ່ານ ໂຕໂນຕ ໂຕຢຸດ ຣະດັບສູງຕໍ່າຂອງສຽງ ຄວາມໄວຊ້າຂອງຈັງຫວະ ປຽບດັ່ງການຮຽນຮູ້ແລະເຂົ້າໃຈດ້ານ “ຕົວອັກສອນ” ຂອງພາສາຂຽນ ທີ່ຈະໃຊ້ ປະກອບກັນເປັນທຳນອງເພງ ດັ່ງບົດອ່ານ ຫຼືບົດກາບກອນ.

2) ກະແຈສຽງ (Key) ແລະຄວາມສໍາພັນຣະຫວ່າງ Keys ຕ່າງໆ, ການໝຸນປ່ຽນຂອງສຽງ (Modulation), ຮວມທັງກຸ່ມສຽງ (Chords) ຕ່າງໆ ຊຶ່ງເປັນສ່ວນປະກອບທີ່ສໍາຄັນ ທາງດ້ານການປະສານສຽງ (Harmony) ໃນບົດເພງ.

3) ໂຄງສ້າງຂອງບົດເພງ (Structure) ທຽບກັບກົດຣະບຽບແລະຂໍ້ບັງຄັບຕ່າງໆ ຂອງກາບກອນໂຄງສານ.

ເມື່ອເຮົາເຂົ້າໃຈຫຼັກໄວຍາກອນ ຂອງດົນຕຣີ ຈະພາໃຫ້ການເສບບັນເລງ ມີຣະດັບດີກວ່າປົກກະຕິ ເພາະວ່າ ຖ້າເຮົາເຂົ້າໃຈໂຄງສ້າງຂອງບົດເພງໄດ້ດີ ເຮົາຈະສາມາດຖ່າຍທອດອາຣົມຂອງບົດເພງນັ້ນ ອອກມາໄດ້ຢ່າງມີທິດທາງ ແລະມີແບບແຜນທີ່ຖືກຕ້ອງ ບໍ່ແມ່ນເສບບັນເລງແບບເດົາສຸ່ມ ໂດຍການອາສັຍພຽງແຕ່ຫູ ເປັນເຄື່ອງຊ່ວຍຕັດສິນ. ການເຂົ້າໃຈທາງດ້ານ Keys, ຄວາມສັມພັນລະຫວ່າງ Chords ເຮັດໃຫ້ເຮົາເຂົ້າໃຈປໂຍກຕ່າງໆຂອງເພງ ແລະສາມາດຕັດສິນໃຈເລືອກໃຊ້ Chords ທຸກຮູບແບບໃນການບັນເລງບົດເພງໄດ້ຢ່າງຖືກຕ້ອງ.

ນອກຈາກນັ້ນ ການມີຄວາມຮູ້ທາງດ້ານທິສດີດົນຕຣີ ຢ່າງເລິກຊຶ້ງ ຈະພາໃຫ້ເຮົາກາຍເປັນຄົນ ທີ່ມີໄຫວພິບວ່ອງໄວ ສາມາດສັງເກດເຫັນ ຫຼາຍສິ່ງຫຼາຍຢ່າງ ທີ່ເຊື່ອງຊ້ອນຢູ່ໃນບົດເພງ ແລະພາໃຫ້ເຮົາມີຄວາມໝັ້ນໃຈໃນຕົນເອງ ເວລາເສບບັນເລງ ຈະບໍ່ມີຄວາມລັງເລໃຈອີກ ພ້ອມດຽວກັນນັ້ນ ການແກະເພງ ກໍຈະສະດວກສະບາຍຂຶ້ນກວ່າທຳມະດາ.

ສຸດທ້າຍ ເມື່ອເຮົານຳເອົາບົດເພງບົດນຶ່ງ ມາຮຽບຮຽງເສບບັນເລງໃໝ່ ໂດຍການສວມອາຣົມສິລ ຂອງເຮົາເຂົ້າຕື່ມ ຈະພາໃຫ້ບົດເພງດັ່ງກ່າວ ມີສີສັນ ແລະໜ້າສົນໃຈ ພ້ອມທັງເປັນຕາໜ້າຟັງຍິ່ງຂຶ້ນ.

Paris, 14 ມິຖຸນາ 2017

---

“ຄວາມຮູ້ກ່ຽວກັບວິວັທນາການ ຂອງເຄື່ອງດົນຕຣີທັນສມັຍ”

ພາກທີ່ 01 : ຣະບົບພາສາ MIDI

ຕົ້ນກຳເນີດຂອງຣະບົບ MIDI

ຣະບົບມາຕຖານ MIDI ໄດ້ເລີ່ມຕົ້ນປາກົດຕົວຂຶ້ນເມື່ອປະມານຕົ້ນປີ ຄ.ສ. 1980.
ກ່ອນໜ້ານັ້ນ ເຄື່ອງດົນຕຣີໄຟຟ້າຂອງແຕ່ລະຍີ່ຫໍ້ ບໍ່ສາມາດເສື່ອມຕໍ່ກັນຫຼາຍໆໜ່ວຍ ເພື່ອຈະຫຼິ້ນຫຼາຍໆສຽງພ້ອມກັນໄດ້ ເມື່ອນັກດົນຕຣີຜູ່ນຶ່ງ ໂດຍສະເພາະມືອໍແກນ (Organ) ຢາກຫຼິ້ນສອງສຽງຕ່າງກັນດ້ວຍສອງມື ເຂົາຕ້ອງມີເຄື່ອງດົນຕຣີສອງໜ່ວຍ ແຕ່ຈະບໍ່ສາມາດຫຼີ້ນພ້ອມໆກັນ ເກີນສາມສຽງຂຶ້ນໄປ ເພາະມະນຸດຜູ່ນຶ່ງ ມີມືພຽງສອງຂ້າງເທົ່ານັ້ນ ບໍ່ດັ່ງນັ້ນ ກໍຈຳເປັນຕ້ອງແບ່ງໜ້າທີ່ໃຫ້ມືອໍແກນຜູ່ທີ່ສອງ ຫຼືທີ່ສາມເປັນຄົນຫຼິ້ນຊ່ອຍກັນ.

MIDI (ຫຍໍ້ມາຈາກຄຳວ່າ Musical Instrument Digital Interface) ຖ້າຈະແປໂດຍຕຣົງນັ້ນກໍຄື ຣະບົບສື່ສານຣະຫວ່າງເຄື່ອງດົນຕຣີໄຟຟ້າປະເພດດີຈິຕອລ (Digital). MIDI ແມ່ນຣະບົບສື່ສານຣະຫວ່າງເຄື່ອງດົນຕຣີຕ່າງໆ ທັງຊະນິດດຽວກັນ ຫຼືຕ່າງກັນ ບໍ່ຈຳແນກຍີ່ຫໍ້ ຫຼືຮຸ່ນ ແລະຍັງຮວມເຖິງເຄື່ອງຄອມ (Computers) ຫຼືເຄື່ອງອຸປກອນດີຈິຕອລອື່ນໆ ທີ່ມີຊ່ອງເສຶ່ອມສອດ ສຳລັບສຽບປັກສາຍສັນຍານ (MIDI Interface) ໄດ້ອີກດ້ວຍ.

ຣະບົບມາຕຖານ MIDI ໄດ້ຖືກສ້າງຕັ້ງຂຶ້ນທຳອິດ ໂດຍການຮ່ວມມືກັນຣະຫວ່າງ ບັນດາບໍຣິສັດຜູ່ຜລິດເຄື່ອງດົນຕຣີໄຟຟ້າສາກົນ ຍີປຸ່ນແລະອະເມຣິກາ ເພື່ອອຳນວຍຄວາມສະດວກແກ່ນັກດົນຕຣີ ໃນການເສື່ອມຕໍ່ເຄື່ອງຫຼາຍໆຊະນິດເຂົ້າດ້ວຍກັນ ໂດຍບໍ່ຕ້ອງຄຳນຶງເຖິງຄວາມແຕກຕ່າງຣະຫວ່າງ ຍີ່ຫໍ້ ຫຼືຮຸ່ນອີກ. ບໍຣິສັດຜລິດເຄື່ອງດົນຕຣີສາກົນທຳອິດ ທີ່ໄດ້ຮ່ວມຮັບຮອງເອົາຣະບົບ MIDI ເຂົ້າໃນ Keyboard Synthesizer ແມ່ນໄດ້ແກ່ Roland (Jupiter 6, JX-3P), Yamaha (DX7) ແລະ Sequential Circuit (Prophet 600).

ນັບຕັ້ງແຕ່ນັ້ນມາ ນັກດົນຕຣີ ນັກເສບ ນັກແຕ່ງເພງ ນັກອັດສຽງ ທີ່ນຳໃຊ້ເຄື່ອງດົນຕຣີ ຫຼືອຸປກອນທີ່ມີຣະບົບ MIDI ຕິດຕັ້ງໃນຕົວ ກໍສາມາດພັທນາການສ້າງຜົນງານເພງແລະດົນຕຣີ ອອກມາຢ່າງກວ້າງຂວາງ ເພາະສາມາດທຳການນຳໃຊ້ຫຼາຍໆເຄື່ອງເສື່ອມຕໍ່ເຂົ້າດ້ວຍກັນ ໂດຍບໍ່ມີຂອບເຂດພົມແດນ ຫຼືຂໍ້ບັງຄັບຈຳແນກຮຸ່ນ ຫຼືຍີ່ຫໍ້ບໍຣິສັດ ອີກຕໍ່ໄປ.

ບໍ່ພຽງແຕ່ເທົ່ານັ້ນ ຣະບົບພາສາ MIDI ຍັງອຳນວຍຄວາມສະດວກແລະວ່ອງໄວທັນໃຈ ແກ່ນັກດົນຕຣີ ໃນການເຜີຍແຜ່ແລະແລກປ່ຽນຜົນງານການສ້າງສັນຂອງຕົນເອງ ກັບຜູ່ອື່ນ ໂດຍການນຳໃຊ້ພາສາ MIDI ທີ່ສາມາດເກັບບັນທຶກໂນຕດົນຕຣີຂອງບົດເສບ ຫຼືບົດປະພັນ ໄວ້ໃນເອກສານ ທີ່ເອີ້ນກັນວ່າ MIDI File ຊຶ່ງຫຼາຍໆຄົນຍັງເຂົ້າໃຈຜິດ ຄິດວ່າແມ່ນອັນດຽວກັນກັບ ຣະບົບ MP3 ຫຼືຣະບົບ Karaoké ຊຶ່ງຂ້າພະເຈົ້າຈະຊີ້ແຈງອະທິບາຍ ແລະລົງເລິກໃນອັນດັບຕໍ່ໆໄປ.

Paris, 06 ມີນາ 2017