ສາຣະບານເພງລາວ ຊຸດທີ່ 10 (ເລີ່ມຕົ້ນເຜີຍແຜ່ ວັນທີ່ 03 ສິງຫາ 2022) 451 - ດວງໃຈນ້ອງຢູ່ໃສ 452 - ຫາກຄົນອື່ນດີກວ່າ 453 - ຄິດດູເສັຽກ່ອນ 454 - ຮັກມີກັມ 455 - ພໍແລ້ວເຈັບແລ້ວສາບແລ້ວ 456 - ຮັກກັນຊັງກັນ 457 - ຊັງອ້າຍເຣື່ອງໃດ 458 - ວັງວຽງແດນສວັນ 459 - ບຸງພ້າວສາວງາມ 460 - ເສັຽແຮງຮັກ 461 - ສເນສາວວຽດນາມ 462 - ໃຝ່ຮັກ 463 - ສວນດອກໄມ້ໃນອະດີດ 464 - ຍອດຮັກ 465 - ຟ້າເທົ່ານັ້ນ 466 - ພວງມາລັຍນ້ຳໃຈ 467 - ແກ້ວລືມຄອນ 468 - ສຸດທີ່ຮັກ 469 - ສາຍເລືອດລາວ 470 - ຫິນເຫີບແດນງາມ 471 - ພອນສົມຣົສ 472 - ຢູ່ໄປເຮັດຫຍັງ 473 - ຍິ້ມສເມີ 474 - ຄຳສາບຍິງເສົ້າ 475 - ຢ່າຄິດຫວັ່ນໄຫວ 476 - ກຸຫລາບສວັນ 477 - ກຸຫລາບຫລວງພຣະບາງ 478 - ເສື້ອຂຽວທີ່ຮັກ 479 - ໜາວນີ້ອ້າຍແສນຣະທົມ 480 - ຫຼັກແປດແດນສວັນ 481 - ສຽງແຄນ 482 - ໂອ້ເມືອງວຽງຈັນ 483 - ເຫັນໃຈແມ່ຮ້າງ 484 - ພໍ່ໝ້າຍລູກຕິດ 485 - ສີ່ຫ້ອງຫົວໃຈຫາຄູ່ 486 - ຍິ່ງແຍງຍິ່ງງາມ 487 - ວິມານບ້ານເຮົາ 488 - ຢ່າລືມບ້ານເຮົາ 489 - ຕື່ນເຖີດພີ່ນ້ອງລາວ 490 - ສາຍຝົນ 491 - ກິ່ນແກ້ມ 492 - ມີຄູ່ເສັຽເຖີດ 493 - ຢາກມີຄົນຮັກ 494 - ຮັກສາວວຽງຈັນ 495 - ບ້ານນາລະເມີ 496 - ຫິວ 497 - ເບື່ອຜູ່ຍິງ 498 - ສາວສະຜ່າຍ 499 - ດອກຈຳປາ 500 - ເກີດເປັນຄົນ
ເພງ “ເກີດເປັນຄົນ”
ເນື້ອຮ້ອງ & ທຳນອງ : ຄຳຫຼ້າ ໜໍ່ແກ້ວ (1988)
ນັກຮ້ອງຕົ້ນສະບັບ : ຄຳຫຼ້າ ໜໍ່ແກ້ວ
1) ເກີດມາເປັນຄົນ ຢ່າທຳຕົນເໝືອນງົວເໝືອນຄວາຍ
ຢ່າສັບສົນວົນວາຍ ໃຫ້ພູມໃຈທີ່ໄດ້ເກີດເປັນຄົນ
ຮັກຊາດບ້ານເມືອງ ຢ່າໃຫ້ເຄືອງຜູ່ທີ່ຢູ່ໃກ້ຕົນ
ກໍ່ສ້າງຝຶກຝົນ ທຳຕົນໃຫ້ເປັນຄົນດີ
• ຕົນເອງເປັນທີ່ເພິ່ງຂອງຕົນ ຕ້ອງອົດທົນສ້າງຕົນເຕັມທີ່
ສັງຄົມຕ້ອງການແຕ່ຄົນດີ ຄົນອັບປີໄລ່ໜີໄກໆ
ອັນຄົນໂກງຄົນກິນປີ້ນປົດ ເອົານໍ້າກົດຫົດປາກໃຫ້ຮາກໄຫຼ
ຢ່າໃຫ້ເຫຼືອຫຼົງລະປະໄວ້ ຈະເປັນພັຍເປັນພິດຜິດຄອງ
2) ເກີດແລ້ວຕ້ອງຕາຍ ເຖິງຈະຕາຍໃຫ້ຕາຍດ້ວຍດີ
ສ້າງຄຸນງາມຄວາມດີ ຄຸນຄວາມດີນັ້ນຈະຕອບສນອງ
ໃຜໆກໍນິຍົມ ເຊີຍຊົມສົ່ງເສີມຍໍຍ້ອງ
ໂດ່ງດັງທັງຜອງ ໝາຍປອງເປັນຫຼັກຄຸນນະທັມ
•• ຢ່າຫຼົງກົນຄົນອື່ນຍືນຍໍ ຄອຍພະນໍລໍ້ລວງຫຼົງຕາມ
ທຸກເວລາທຸກນາທີທຸກໂມງຍາມ ຈະເຣີນຕາມຍຸກສມັຍໃໝ່ໆ
ອັນທຳດີຕ້ອງໄດ້ດີແນ່ນອນ ຈົ່ງສັງວອນຮໍ່າຮອນສອນໃຈ
ຢ່າຫຸນຫັນຮ້ອນຮົນກວ່າໄຟ ຈະເສັຽໃຈພາຍຫຼັງຈົນວັນຕາຍ…
ເພງ “ດອກຈຳປາ”
ເນື້ອຮ້ອງ & ທຳນອງ : ຄຳຫຼ້າ ໜໍ່ແກ້ວ (1959)
ນັກຮ້ອງຕົ້ນສະບັບ : ຄຳຫຼ້າ ໜໍ່ແກ້ວ
1) ໂອ ດອກຈຳປາ
ເຈົ້າເປັນມາລາ ທີ່ສຸດໂສພາງາມຜ່ອງ
ພໍຕາເວັນ ສາດແສງສີທອງ
ຈຳປາອ້າກີບລະອອງ ຮັບແສງທອງຈາກດວງສຸຣີ
2) ຍ້ອນ ໂຊກວາສນາ
ບຸນຕາມນຳພາ ໄດ້ພົບບຸບຜາມາລີ
ປຣາຖນາ ຜູກໃຈໄມຕຣີ
ຈອງໄວ້ເປັນຄູ່ຊີວີ ຄູ່ຂວັນມາລີແມ່ນພລີຊີວາ
• ມວນມາລີ ທີ່ເຂົາເລົ່າລື
ບໍ່ເຫັນສົມນາມສົມຊື່ ທີ່ເຂົາລືໜັກໜາ
ດອກຈຳປານີ້ໜາ ທີ່ແສນໂສພາ
ໃຜເຫັນຄົງປຣາຖນາ ຄວ້າຈຳປາໄວ້ແນບອຸຣາ
3) ຫາກ ສົມດັ່ງໝາຍ
ຈະເປັນຫຼືຕາຍ ບໍ່ຂໍຫ່າງໄກຂວັນຕາ
ພຽງດວງດຽວ ກ່ຽວຂ້ອງສເນຫາ
ຈົນສູນສິ້ນຊີບຊີວາ ຖນອມຈຳປາຊົ່ວຟ້າມະລາຍ…
ເພງ “ສາວສະຜ່າຍ”
ເນື້ອຮ້ອງ & ທຳນອງ : ຄຳພູ ທະວີວັນ (~1970)
ນັກຮ້ອງຕົ້ນສະບັບ : ຄຳພູ ທະວີວັນ
1) ໄດ້ຂ່າວວ່າສາວດົງໂດກ ບ້ານເກິນງາມເດັ່ນ
ແຕ່ບາດວ່າໄດ້ມາເຫັນ ສາວງາມບ້ານນຶ່ງບໍ່ທຳມະດາ
ສີບໍ່ຕ້ອງແຕ່ງແກ້ມຍັງແດງໆ ແປ້ງບໍ່ເຄີຍທາ
ແຕ່ກໍຍັງງາມບາດຕາ ແຖມຍັງມີໜ້າຍິ້ມແຍ້ມແຈ່ມໃສ
2) ບໍ່ແມ່ນຖແລງແປງຄວາມ ຫາມາຍົກຍ້ອງ
ສາວງາມບ້ານຢູ່ແຄມຂອງ ໃຜເຫັນຍັງຕ້ອງຫຼົງນອນຫຼັບໃຫຼ
ໃຜໄປບໍ່ແວ່ເສັຽໃຈຕັ້ງແຕ່ ມື້ເກີດຈົນຕາຍ
ນີ້ລະຄືສາວໝູ່ບ້ານສະຜ່າຍ ສືບສາຍສວຍງາມແມ່ຍ່າມະໂລງ
• ຈະອວດສີມື ກໍນັບວ່າລືວ່າເດັ່ນ
ຫຍິບປັກຖັກຮ້ອຍກໍເປັນ ແຖມຍັງສວຍເດັ່ນເຫັນລືມບໍ່ລົງ
ສີມືຕໍ່າແຜ່ນຢູ່ໃນດິນແດນ ແຄວ້ນຍ່າມະໂລງ
ຍົກໃຫ້ແມ່ສາວຄີ້ວກົ່ງ ຫຼານຍ່າມະໂລງເທົ່ານັ້ນ
3) ປູ່ບາຈຽງຫຼົງ ຮັກຍ່າມະໂລງລົ້ນຈິດ
ຂ້ອຍເອງກໍຢາກເປັນມິດ ກັບສາວສະຜ່າຍມານານແສນນານ
ຂໍວິນຍານປູ່ບາຈຽງຊ່ວຍຊູ ຫາຄູ່ໃນຝັນ
ໃຫ້ກັບໜຸ່ມນ້ອຍວຽງຈັນ ມາເປັນເຂີຍປູ່ບາຈຽງ…
ເພງ “ເບື່ອຜູ່ຍິງ”
ເນື້ອຮ້ອງ & ທຳນອງ : ຄຳພູ ທະວີວັນ (~1970)
ນັກຮ້ອງຕົ້ນສະບັບ : ຄຳພູ ທະວີວັນ
1) ເຊື່ອບໍ່ໄດ້ ດອກໃຈຍິງ
ຮັກຈິງ ເຂົາມີພຽງແຕ່ປາກ
ນໍ້າໃຈຍິງ ນີ້ມັນເຊື່ອຍາກ
ເພາະໃຈກັບປາກ ມັນບໍ່ຕົງກັນ
2) ເກີດມາເປັນ ຫົວອົກຜູ່ຊາຍ
ຕ່າງກໍໝາຍ ໃຈຮັກໝັ້ນ
ແຕ່ໃຈຍິງ ເຂົາມີທີ່ແບ່ງປັນ
ຮັກຈິງພຽງວັນ ບໍ່ນານກໍຫາຍ
• ນໍ້າໃຈຜູ່ຍິງ ຫຼຽວຫາຍາກຈະສ່ອງເຫັນ
ຫຼອກກັນທັງເປັນ ເຫັນມາແລ້ວນັບບໍ່ໄດ້
ມັນເປັນຄວາມຈິງ ຍິງຄົນທີ່ຫວັງຫຼອກຊາຍ
ຢູ່ພາຍໃນ ໃຈເຂົາບໍ່ແນ່ນອນ
3) ເບື່ອຜູ່ຍິງ ທີ່ບອກວ່າຮັກ
ແຕ່ບໍ່ນານໜັກ ກໍຄາຍຮັກເຮົາໄປກ່ອນ
ນໍ້າໃຈຍິງ ນີ້ບໍ່ແນ່ນອນ
ຂໍລາໄປກ່ອນ ເບື່ອແລ້ວລະຜູ່ຍິງ…
ເພງ “ຫິວ”
ເນື້ອຮ້ອງ & ທຳນອງ : ຄຳພູ ທະວີວັນ (~1970)
ນັກຮ້ອງຕົ້ນສະບັບ : ຄຳພູ ທະວີວັນ
(ໂອຍ… ຫິວ ຮື! ຫິວເດ ຫາເງິນກີບນຶ່ງກະບໍ່ມີ…ຮື)
1) ເກີດຫິວມາ ໄດ້ຕັ້ງສີ່ຫ້າວັນ
ແຕ່ຈາກສວັນ ມາເຖິງວຽງຈັນຄາວນີ້
ເງິນຢູ່ໃນຖົງ ຫຼືມັນກໍໝົດພໍດີ (ຊໍ້າ)
ຈົກຖົງໃດຫຼືກໍບໍ່ມີ ຊວຍເຕັມທີທີ່ມາວຽງຈັນ
2) ທ້ອງຂອງເຮົາ ຫຼືມັນກໍເບົາເຕັມທົນ
ຍ່າງຕາມຖນົນ ນຶກເຖິງຄວາມຈົນໃຈສັ່ນ
ອັນຄົນມັນຫິວ ຫິວມາຕັ້ງສີ່ຫ້າວັນ (ຊໍ້າ)
ຢາກລັກເກງເຂົາຈະຕາມທັນ ຕະລາງວຽງຈັນໃຜວ່າມັນດີ
• ນອນເທົ່າໃດ ຫຼືກໍບໍ່ຫຼັບ
ພໍຫຼັບຕາໄປ ຝັນເຫັນແຕ່ໄກ່ຢ້າງຕົວພີໆ
ຂາຈົນເປັນມັນ ເກີນວ່າຝັນໄດ້ຝັນດີ (ຊໍ້າ)
ຕື່ນຂຶ້ນມາແລ້ວກໍບໍ່ມີ ແມ່ນມີກໍເປັນຂອງຂາຍ
3) ຢາກເຕັມທົນ ເສັຽທີແຕ່ບໍ່ມີເງິນ
ຖ້າມີເງິນ ມຶງເອີຍຈະກິນຈົນທ້ອງໃຫຍ່
ຍາມຈົນທົນຫິວ ຫິວຈົນວ່າໜ້າຕາລາຍ (ຊໍ້າ)
ຫາກເງິນເດືອນນັ້ນອອກເມື່ອໃດ ເຫັນທີຈະຕາຍເພາະກິນ…
(ໂອຍ… ຫິວ…)
ເພງ “ບ້ານນາລະເມີ”
ເນື້ອຮ້ອງ & ທຳນອງ : ຄຳພູ ທະວີວັນ (1969)
ນັກຮ້ອງຕົ້ນສະບັບ : ຄຳພູ ທະວີວັນ
1) ຢູ່ບ້ານດົງ ເຄີຍກິນແຕ່ເຂົ້າກັບປາ
ຢູ່ບ້ານນາ ເຄີຍກິນແຕ່ປາກັບເຂົ້າ
ທ່ຽວເມືອງຫຼວງ ຫຼົງມອງແຕ່ພຽງໜ້າສາວ
ປາແລະເຂົ້າ ມັນກໍອີ່ມເລີຍ
2) ໄດ້ມາເຫັນສາວງາມ ຈົນເກືອບເປັນລົມ
ແມ່ແອວກົມ ສົມຄຳເຂົາລືແທ້ເອີຍ
ໄດ້ມອງສາວ ຫຼົງຢືນກາງທາງນິ້ງເສີຍ
ຈະຣາຈອນເຂົາເລີຍ ຊ່ວຍຄວັກອອກທາງ
• ຫາກໄດ້ນາງ ນ້ອງໄປເປັນຄູ່
ຈະບໍ່ໃຫ້ນາງນອນຢູ່ ຜູ່ດຽວດອກນາງ
ໜັກເບົາກໍຈະສູ້ ທົນຖາກຖາງ
ຈະບໍ່ໃຫ້ນາງ ລຳບາກຕໍ່ໄປ
3) ຫາກໄດ້ນາງ ນ້ອງໄປເປັນຄູ່ຢູ່ຄຽງ
ຢູ່ຮ່ວມຕຽງ ທີ່ທຳເອົາດ້ວຍໄມ້ໄຜ່
ຕລອດທັງຄືນ ຂໍຊົມໃຫ້ນ້ອງສຸກໃຈ
ຈະບໍ່ຂໍໄກ ຂວັນໃຈບ້ານນາ…
ເພງ “ຮັກສາວວຽງຈັນ”
ເນື້ອຮ້ອງ & ທຳນອງ : ຄຳພູ ທະວີວັນ (~1970)
ນັກຮ້ອງຕົ້ນສະບັບ : ຄຳພູ ທະວີວັນ
1) ເປັນບຸນຕາ ຫຼືວາສນາເສີມສົ່ງ
ຈຶ່ງໄດ້ມາຟ້ອນລຳວົງ ຮ່ວມກັບສາວເມືອງວຽງຈັນ
ຮູບສວຍແສນງາມ ຜ່ອງພັນ (ຊໍ້າ)
ຫາໃສທຽບທຽມທັນ ສາວວຽງຈັນງາມຍິ່ງ
2) ຄົນເດີນດິນ ຫຼືຫຸ່ນພຣະອິນຫຼົງແຕ່ງ
ຫຼືວ່ານາງຟ້າຈຳແລງ ຈຶ່ງງາມທຸກແຫ່ງເກີນຍິງ
ຫາກແມ່ນໄດ້ນ້ອງ ມານອນແອບອີງ (ຊໍ້າ)
ຈະຮັກເຈົ້າດ້ວຍໃຈຈິງ ຍິ່ງກວ່າຊີວາ
• ງາມແທ້ແມ່ເອີຍ ຫາໃສເອີ່ຍບໍ່ເໝືອນແກ້ວຕາ
ຢາກຈະມາ ຂໍເປັນພີ່ນ້ອງ
ມາຂໍຄຽງຄອງ ຮ່ວມຫໍຫ້ອງເມື່ອຍາມນິທຣາ
ຢ່າເມີນເສີຍເລີຍນະ ດວງແກ້ວຕາ (ຊໍ້າ)
ຂ້ອຍປຣາຖນາ ຮັກເຈົ້າສຸດຫົວໃຈ
3) ເປັນບຸນຕາ ຂອງເຮົາຢູ່ແລ້ວແຕ່ຄັ້ງກ່ອນ
ເຈົ້າຢ່າໄປຫຼົງລືມຄອນ ກັບມານອນໝອນຄຽງກາຍ
ໂປຣດເຖີດນ້ອງ ສາວວຽງຈັນຢ່າອຽງອາຍ (ຊໍ້າ)
ຮັກເຈົ້າຢ່າງຈິງໃຈ ຂໍເປັນເຂີຍໃໝ່ພໍ່ນາງ…
ເພງ “ຢາກມີຄົນຮັກ”
ເນື້ອຮ້ອງ & ທຳນອງ : ຄຳພູ ທະວີວັນ (~1970)
ນັກຮ້ອງຕົ້ນສະບັບ : ຄຳພູ ທະວີວັນ
1) ຢາກຈະມີ ຮັກຈັກນຶ່ງຄົນ
ມາເຫັນໜ້າມົນ ຫົວໃຈວຽນວົນເໝືອນຄົນເປັນໄຂ້
ຢາກເຂົ້າໄປຖາມ ກໍເກງນ້ອງບໍ່ເຍື່ອໃຍ (ຊໍ້າ)
ໂປຣດເຖີດດວງໃຈ ຍິ້ມຈັກນ້ອຍເຖີດໜາແມ່ນາງ
2) ຕັ້ງແຕ່ເກີດມາ ບໍ່ເຄີຍຮັກກັບຜູ່ໃດ
ມາເຫັນດວງໃຈ ສຸດວິສັຍຫົວໃຈຈະຢັ້ງ
ຢາກຈະຝາກກາຍ ທັງຫົວໃຈໃຫ້ກັບແມ່ນາງ (ຊໍ້າ)
ແຕ່ວ່າໃຈຍັງ ເກງແມ່ນາງຈະບໍ່ໃຍດີ
• ນາງເປັນຄົນງາມ ຂໍຢ່າໃຈດຳໄປເລີຍຂວັນອ່ອນ
ເຫັນໃຈແດ່ທ້ອນ ມາຂໍວອນເພື່ອຝາກໄມຕຣີ
ມາຂໍເປັນທອງ ແຜ່ນດຽວຮ່ວມກັບຄົນດີ (ຊໍ້າ)
ໂປຣດຢ່າໜ່າຍໜີ ຂໍເປັນຄູ່ຢູ່ສອງຄອງໃຈ
3) ຖ້າຫາກພໍໃຈ ສົ່ງຮອຍຍິ້ມໃຫ້ເຖີດນາງ
ພໍເຫັນແນວທາງ ວ່າຈະມີຫວັງຄຽງນາງຢູ່ໃກ້
ອ້າຍຈະໄປຫາ ຂອງດີມາໝັ້ນດວງໃຈ (ຊໍ້າ)
ຍາກຈົນພຽງໃດ ກໍຈະໄປຫາມາໃຫ້ນາງ…
ເພງ “ມີຄູ່ເສັຽເຖີດ”
ເນື້ອຮ້ອງ & ທຳນອງ : ກອບແກ້ວ ປ່ຽມມະໄລ (~1970)
ນັກຮ້ອງຕົ້ນສະບັບ : ກອບແກ້ວ ປ່ຽມມະໄລ
1) ມີຄູ່ ເສັຽເຖີດນ້ອງສາວ
ເດືອນແລະດາວ ນ້ອງສາວຢ່າຝັນໃຝ່
ຮີບມີຄູ່ ເສັຽເຖີດຍອດດວງໃຈ
ນອນດຽວຢູ່ໄດ້ ຂວັນໃຈຈະແກ່ຕາຍ
2) ມີຄູ່ ເສັຽເຖີດນວນນ້ອງ
ຈະຈັບຈອງ ນັກຮ້ອງກໍຍັງໄດ້
ຍັງບໍ່ມີ ຍິງທີ່ເຂົາສົນໃຈ
ແຕ່ນ້ອຍຈົນໃຫຍ່ ຫ້ອງຫົວໃຈຍັງຫວ່າງມາ
• ນອນ… ຢູ່ດຽວປ່ຽວໃຈ
ຫາສິ່ງໃດ ມັນຈະສຸກອຸຣາ
ຫາຄູ່ຄຽງ ມາແນບເນື້ອກາຍາ
ກັນໜາວດີກ່ວາ ຜ້າຫົ່ມຕັ້ງຮ້ອຍຜືນ
3) ມີຄູ່ ເສັຽເຖີດຄົນດີ
ໜ້າໜາວນີ້ ເໝືອນກັບມີເງິນໝື່ນ
ຫາກມີຄູ່ ຄຽງຢູ່ຍາມຄໍ່າຄືນ
ຮັກຄົງຫວານຊື່ນ ໜາວຄໍ່າຄືນຄົງສຸກສະບາຍ…
